തിരുവനന്തപുരം:യുവതിയെ കാറില്‍ കയറ്റികൊണ്ടുപോയി പീഡിപ്പിക്കാന്‍ ശ്രമിച്ച രണ്ടു പേര് അറസ്റ്റിലായി. വെങ്ങാനൂര്‍ സ്വദേശി അജിത് രാജ് (44), കോവളം സ്വദേശി അശോകന്‍ (54) എന്നിവരാണ് പിടിയിലായത്. വിഴിഞ്ഞം വെങ്ങാനൂര്‍ റോഡിലെ കല്ലുവെട്ടാന്‍കുഴിയില്‍ കഴിഞ്ഞ ദിവസം രാവിലെയാണ് സംഭവം. തമ്പാനൂരിലേക്ക് പോകാന്‍ ബസ് സ്റ്റോപ്പില്‍ നില്‍ക്കുകയായിരുന്നു യുവതി. ഈ സമയം കാറിലെത്തിയ അജിത് രാജും അശോകനും ഷെയര്‍ ടാക്‌സി ആണെന്നു പറഞ്ഞു യുവതിയെ വിളിച്ചു. വരുന്നില്ലെന്ന് പ്രതികരിച്ചെങ്കിലും 200 രൂപ നല്‍കിയാല്‍ മതിയെന്ന് പറഞ്ഞ് യുവതിയെ കാറിന്റെ പിന്‍സീറ്റില്‍ കയറ്റി.
അല്‍പദൂരം മുന്നോട്ടു പോയപ്പോള്‍ ആളൊഴിഞ്ഞ സ്ഥലത്ത് വച്ച് യുവതിയെ പീഡിപ്പിക്കാന്‍ ശ്രമിച്ചെന്നാണ് പരാതി. യുവതി ബഹളം കൂട്ടിയതിന് പിന്നാലെ കാറിന്റെ വേഗം കുറഞ്ഞപ്പോള്‍ കാറിന്റെ ഡോര്‍ തുറന്നു പുറത്തേക്കു ചാടി.ഇതോടെ കാറുമായി അജിത് രാജും അശോകനും കടന്നെങ്കിലും കാറിന്റെ നമ്പര്‍ ഉള്‍പ്പെടെ ചിത്രം യുവതി പകര്‍ത്തിയിരുന്നു യുവതി തമ്പാനൂര്‍ പൊലീസില്‍ പരാതി നല്‍കിയത് പ്രകാരം കാറിന്റെ രജിസ്‌ട്രേഷന്‍ നമ്പര്‍ കണ്ടെത്തിയാണ് ഇരുവരെയും വിഴിഞ്ഞം പൊലീസ് പിടികൂടിയത്.കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു
