കാറ്റലോണിയ: സ്പാനിഷ് സൂപ്പര് താരം ലാമിനെ യമാലിന് പരിക്ക്. സ്പാനിഷ് ലാലിഗയില് സെല്റ്റ വിഗോയ്ക്കെതിരായ മത്സരത്തില് ഗോള് നേടിയ പെനാല്റ്റി ഷോട്ട് തൊടുത്തിന് തൊട്ടുപിന്നാലെ താരം കാല് വേദനയെ തുടര്ന്ന് മൈതാനത്ത് കിടക്കുകയായിരുന്നു.
നിമിഷങ്ങള്ക്കകം യമാലിനെ ചികിത്സയ്ക്കായി പുറത്തേക്ക് മാറ്റി. റൂണി ബര്ഗ്ജി പകരക്കാരനായി ഇറങ്ങുകയും ചെയ്തു. സെല്റ്റ വിഗോയ്ക്കെതിരായ മത്സരത്തിന്റെ 41-ാം മിനിറ്റിലാണ് യമാല് ഗോള് നേടിയത്. കുറച്ച് നേരം എഴുന്നേല്ക്കാന് ശ്രമിച്ചുനോക്കിയെങ്കിലും കടുത്ത വേദനയെ തുടര്ന്ന് കളം വിട്ടു. മത്സരത്തിന്റെ ആദ്യ പകുതി സ്റ്റോപ്പേജ് സമയത്താണ് കളം വിട്ടത്.
പിന്നീട് നടത്തിയ വൈദ്യ പരിശോധനകളില് യമാലിന്റെ ഇടത് കാല് തുടയ്ക്ക് സാരമായി പരിക്കുള്ളതായി കണ്ടെത്തി. ആഴ്ച്ചകള് നീണ്ട വിശ്രമം വേണ്ടിവരുന്നതിനാല് സീസണിലെ ബാക്കി മത്സരങ്ങളില് താരം കളിക്കിറങ്ങില്ലെന്ന് ബാഴ്സ ഔദ്യോഗിക വാര്ത്താ കുറിപ്പില് അറിയിച്ചു.
കൃത്യമായ പരിചരണത്തിനും വിശ്രമത്തിനും ശേഷം ജൂണ്-ജൂലൈ മാസങ്ങളില് നടക്കുന്ന ഫിഫ ലോകകപ്പ് ഫുട്ബോളില് താരം ദേശീയ ടീമിനായി കളിക്കാനിറങ്ങുമെന്നാണ് അറിയുന്നത്. ആ സമയം കൊണ്ട് ഫിറ്റ്നസ് വീണ്ടെടുക്കാനുള്ള ശ്രമങ്ങളും പൂര്ത്തിയാക്കാന് സാധിച്ചേക്കുമെന്ന് റിപ്പോര്ട്ടുകളുണ്ട്. പരിക്ക് ഭേദമാകുന്നതിന്റെ പുരോഗതിയനുസരിച്ചായിരിക്കും ഇതിന്റെ അന്തിമ തീരുമാനം.
യമാല് കൂടി ഉള്പ്പെട്ട ബാഴ്സ ടീം ലാലിഗ കിരീട നേട്ടത്തിന്റെ വക്കിലാണ്. ചാമ്പ്യന്സ് ലീഗ് ക്വാര്ട്ടറില് ബാഴ്സ പുറത്താകുകയും സ്പെയിനിലെ മറ്റ് ചാമ്പ്യന്ഷിപ്പുകള് കഴിഞ്ഞ ആഴ്ച്ചത്തെ കോപ്പ ഡെല് റെ ഫൈനലോടെ സമാപിക്കുകയും ചെയ്തതിനാല് സീസണില് ലാലിഗ മാത്രമേ ബാഴ്സയ്ക്ക് കളിക്കാനുള്ളൂ. നിലവിലെ സ്ഥിതിയില് ബാഴ്സയ്ക്ക് പിന്നില് രണ്ടാം സ്ഥാനത്തുള്ള റയലിന് കപ്പടിക്കണമെങ്കില് വലിയ അത്ഭുതങ്ങള് കാട്ടേണ്ടിവരും. ഈ സാഹചര്യത്തില് യമാലിനെ സീസണിലെ ബാക്കി മത്സരങ്ങളില് നിന്ന് ഒഴിവാക്കുന്നതില് തെറ്റില്ലെന്നും ബാഴ്സ കണക്കുകൂട്ടുന്നതായി വിലയിരുത്തലുകളുണ്ട്.
