കൊല്ക്കത്ത: ബംഗാളില് ബിജെപി സര്ക്കാര് രൂപീകരിച്ചാല് ആറ് മാസത്തിനുള്ളില് ഗൂര്ഖ സമുദായത്തോട് തൃണമൂല് കോണ്ഗ്രസ് ഇതുവരെ കാണിച്ച അനീതികള്ക്കെല്ലാം അവസാനം കാണുമെന്ന് കേന്ദ്ര ആഭ്യന്തര മന്ത്രി അമിത് ഷാ.
ഡാര്ജിലിങ് ജില്ലയിലെ കുര്സിയോങ്ങില് ബിജെപിയുടെ തെരഞ്ഞൈടുപ്പ് പ്രചരണറാലിയില് പങ്കെടുത്ത് സംസാരിക്കുകയായിരുന്നു അദ്ദേഹം. സംസ്ഥാനത്ത് ഗുര്ഖകള്ക്ക് സമാധാനത്തോടെ ജീവിക്കാന് സാധിക്കുന്നില്ല. ബിജെപി ഒഴികെ ഒരു പാര്ട്ടിക്കും ഇവരുടെ പ്രശ്നങ്ങള്ക്ക് പരിഹാരം കണ്ടെത്താന് സാധിക്കില്ല. അധികാരത്തില് എത്തിയാല് ഗൂര്ഖകള്ക്ക് സ്വീകാര്യമായ ഒരു പരിഹാരം വിഷയത്തില് കണ്ടെത്തും. ഗൂര്ഖാലാന്ഡ് പ്രസ്ഥാനത്തില് ഉള്പ്പെട്ട ആളുകള്ക്കെതിരായ കേസുകള് പിന്വലിക്കുമെന്നും അമിത് ഷാ വാഗ്ദാനം ചെയ്തു.
ബംഗാളിലെ ഗൂര്ഖ വംശജര്ക്കായി പ്രത്യേക സംസ്ഥാനം വേണമെന്നതാണ് ഇവരുടെ ദീര്ഘകാലമായുള്ള ആവശ്യം. ബിജെപി സര്ക്കാര് അധികാരത്തിലെത്തി ആറ് മാസത്തിനുള്ളില് തന്നെ എല്ലാ ഗൂര്ഖകളുടെയും മുഖത്ത് ഒരു പുഞ്ചിരി ഉണ്ടാകും. സമാധാന പൂര്ണമായ ജീവിതം അവരുടെ അവകാശമാണ്, അതിനുള്ള നടപടികള് ബിജെപി കൈക്കൊള്ളും. ഡാര്ജിലിങ് കുന്നുകളിലെ ജനങ്ങളുടെ പ്രശ്നങ്ങള് പരിഹരിക്കുന്നതില് മുന് സര്ക്കാരുകളെല്ലാം പരാജയപ്പെട്ടു. കോണ്ഗ്രസും ടിഎംസിയും ഡാര്ജിലിങ്ങിനോട് മാത്രമല്ല, നമ്മുടെ ഗൂര്ഖ സഹോദരന്മാരോടും അനീതി കാണിച്ചു. മൂന്ന് തവണ ബിജെപിയുടെ നേതൃത്വത്തില് യോഗങ്ങള് വിളിച്ചു ചേര്ത്തെങ്കിലും മുഖ്യമന്ത്രി മമത ബാനര്ജിയുടെ വിമുഖതയാണ് പ്രശ്നം പരിഹരിക്കാത്തത്തിന് കാരണം. ചര്ച്ചയില് സംസ്ഥാന പ്രതിനിധികളെ അവര് പങ്കെടുപ്പിച്ചില്ല. അതുകൊണ്ടാണ് ഒരു മധ്യസ്ഥനെ നിയമിക്കേണ്ടി വന്നത്, അദ്ദേഹം പറഞ്ഞു.
അതേസമയം എസ്ഐആറില് ചില ഗൂര്ഖകളുടെ പേരുകള് വോട്ടര് പട്ടികയില് നിന്ന് ഒഴിവാക്കിയതിനെക്കുറിച്ചും അമിത് ഷാ പരാമര്ശിച്ചു. ബിജെപി അധികാരത്തിലെത്തിയാല് ഈ പേരുകളെല്ലാം വീണ്ടും വോട്ടര് പട്ടികയില് ഉള്പ്പെടുത്തും. ഈ നിയമസഭാ തെരഞ്ഞെടുപ്പ് ടിഎംസിയുടെ കുറ്റകൃത്യങ്ങളില് നിന്ന് ബംഗാളിനെ മോചിപ്പിക്കാനുള്ളതാണ്. മമത ദീദിക്ക് ബംഗാള് ടാറ്റ നല്കാന് സമയമായി. ജനങ്ങള് ഇതിനായി തീരുമാനമെടുത്ത് കഴിഞ്ഞു. നമ്മുടെ അമ്മമാര്ക്കും സഹോദരിമാര്ക്കും സുരക്ഷ ഉറപ്പാക്കണം. എല്ലാ ബലാത്സംഗക്കാരെയും നമ്മള് ബിജെപി ജയിലാക്കും. അത് ഉറച്ച തീരുമാനമാണെന്നും അമിത് ഷാ കൂട്ടിച്ചേര്ത്തു.
