ബെംഗളൂരു: പൊതുസേവനത്തോടുള്ള പ്രതിബദ്ധതയുടെ യഥാര്ത്ഥ മാതൃകയാണ് ബി.എസ്. യെദിയൂരപ്പയെന്ന് കേന്ദ്ര ആഭ്യന്തര മന്ത്രി അമിത് ഷാ. കര്ണാടക മുന് മുഖ്യമന്ത്രിയും മുതിര്ന്ന ബിജെപി നേതാവുമായ യെദിയൂരപ്പയുടെ രാഷ്ട്രീയ ജീവിതത്തിന്റെ 50-ാം വാര്ഷികാഘോഷമായ ബി.എസ്.വൈ അഭിമാനോത്സവ പരിപാടിയില് പങ്കെടുത്ത് സംസാരിക്കുകയായിരുന്നു അദ്ദേഹം.
യെദിയൂരപ്പയുടെ അഞ്ച് പതിറ്റാണ്ട് രാഷ്ട്രീയ യാത്രയെ അമിത് ഷാ പ്രശംസിച്ചു. പോരാട്ടത്തിലൂടെയും പ്രത്യയശാസ്ത്രത്തിലൂടെയും, പൊതുസേവനത്തോടുള്ള പ്രതിബദ്ധതയിലൂടെയും സ്വന്തം പാത വെട്ടിയെടുത്ത നേതാവാണ് യെദിയൂരപ്പ. പൊതുജീവിതത്തില് 50 വര്ഷം പൂര്ത്തിയാക്കിയതിന് യെദിയൂരപ്പയെ അനുമോദിക്കുന്നതിനായി ചിത്രദുര്ഗയിലാണ് അഭിമാനോത്സവ പരിപാടി സംഘടിപ്പിച്ചത്.
രാഷ്ട്രീയത്തില് പ്രവേശിക്കാന് ആഗ്രഹിക്കുന്ന യുവാക്കള്ക്ക് അദ്ദേഹത്തിന്റെ രാഷ്ട്രീയ ജീവിതം ഒരു പ്രചോദനമായിരിക്കണമെന്ന് അമിത് ഷാ പറഞ്ഞു.
ചടങ്ങില് വെച്ച്, കെന്ദവരെ-കമല അരളിദ കഥെ, സദാന ശിക്കാരി-യെദിയൂരപ്പനവര ഗുഡുഗിന നുഡിഗലു എന്നീ രണ്ട് പുസ്തകങ്ങള് കേന്ദ്രമന്ത്രി പ്രകാശനം ചെയ്തു. പരിപാടിയില് മുന് മന്ത്രി സി.ടി. രവി യെദിയൂരപ്പയുടെ 50 വര്ഷത്തെ പൊതുസേവനത്തിന്റെ വിശദാംശങ്ങള് അവതരിപ്പിച്ചു. ബിജെപി ദേശീയ ജനറല് സെക്രട്ടറി ബി.എല്. സന്തോഷ് ഉള്പ്പെടെയുള്ളവര് സന്നിഹിതരായിരുന്നു.
