മലപ്പുറം: വാല്പാറയിലെ വാഹനാപകടത്തില് മരിച്ച അധ്യാപികയായ ആശയുടെ ഗാനാലാപന വീഡിയോ സമൂഹമാധ്യമങ്ങളില് വിങ്ങലാവുന്നു. ‘പൂക്കള് പനിനീര് പൂക്കള്.. നീയും കാണുന്നുണ്ടോ..’ എന്ന ഗാനമാണ് ആശ ആലപിക്കുന്നത്. ട്രാവലറിന്റെ മുന്സീറ്റില് ഒറ്റക്കിരുന്ന് ആസ്വദിച്ചാണ് പാടുന്നത്. സഹയാത്രികര് ആശയെ പ്രോത്സാഹിപ്പിക്കുന്നതും വീഡിയോയില് ദൃശ്യമാണ്. അപകടം നടന്ന വാഹനത്തിന്റെ ഉള്ളില് നിന്നുള്ള വീഡിയോ ആണോ എന്നത് വ്യക്തമല്ല.
എന്നാല് അപകടത്തില്പ്പെട്ട ട്രാവലറിന് സമാനമായ വാഹനത്തിനുള്ളില് ഇരുന്നാണ് ആശ ഈ ഗാനം പാടുന്നത്.
കോളേജ് ഗ്രൂപ്പില് നിന്നും ലഭിച്ച വീഡിയോ കണ്ണ് നിറയാതെ കണ്ടുതീര്ക്കാനാകുന്നില്ലെന്നും അവസാന യാത്രയ്ക്കിടയിലാണോ ഈ ഗാനം ആലപിച്ചത് എന്ന് അറിയില്ലെന്നുമുള്ള കുറിപ്പോടെയാണ് അഭിഭാഷകന് കെ.ആര് സുഭാഷ് ചന്ദ്രന് ഈ വീഡിയോ പങ്കുവച്ചിരിക്കുന്നത്. വളാഞ്ചേരി എംഇഎസ് കോളജില് സംഘടിപ്പിക്കപ്പെട്ട കോഴിക്കോട് സര്വകലാശാല യൂണിയന്റെ സി സോണ് കലോത്സവത്തിന്റെ പ്രധാന സംഘാടകരില് ഒരാളായിരുന്നു ആശ.
പഠനകാലത്ത് ആശ വിദ്യാര്ത്ഥി രാഷ്ട്രീയത്തില് സജീവമായിരുന്നു.
