മലപ്പുറം: വാല്പ്പാറയില് നടന്ന ദാരുണമായ വാഹനാപകടത്തില് നിന്ന് അത്ഭുതകരമായി രക്ഷപ്പെട്ട 11കാരി മസ്നീന് ജീവിതത്തിലേക്ക് മടങ്ങിവരികയാണ്. തന്റെ എല്ലാമെല്ലാമായ ഉമ്മയുടെ മരണം അറിയാതെ.
മരുന്നുകളോട് ശരീരം പ്രതികരിക്കുന്നുണ്ടെന്ന് ഡോക്ടര്മാര് നല്കുന്ന വിവരത്തില് കുടുംബം ആശ്വസിക്കുന്നു. പരിക്കുകളോടെ രക്ഷപ്പെട്ട മസ്നീനെ പൊള്ളാച്ചിയില് നിന്ന് പെരിന്തല്മണ്ണ ജില്ലാ ആശുപത്രിയിലേക്ക് മാറ്റുകയായിരുന്നു.
തകര്ന്ന വാഹനത്തിനുള്ളില് കുടുങ്ങിയിരുന്ന കുട്ടിയെ പിന്നാലെ വന്ന ടാക്സി ഡ്രൈവറാണ് പുറത്തെടുത്തത്.
ഉടന് തന്നെ ആശുപത്രിയില് പ്രവേശിപ്പിച്ചു. മലപ്പുറം ജില്ലാ മെഡിക്കല് ഓഫീസറുടെ നിര്ദേശപ്രകാരം പിന്നീട് പെരിന്തല്മണ്ണ ജില്ലാ ആശുപത്രിയിലേക്ക് മാറ്റുകയും, ആവശ്യമായ ചികിത്സയും സൗകര്യങ്ങളും ഒരുക്കുകയും ചെയ്തതായി അധികൃതര് അറിയിച്ചു. ആരോഗ്യനില മെച്ചപ്പെടുന്നതുവരെ ഉമ്മ മരിച്ച വിവരം അറിയിക്കേണ്ടെന്നാണ് ഡോക്ടര്മാരുടെ തീരുമാനം.
സന്തോഷയാത്രയുടെ ഓര്മ്മകള് കണ്ണീരായി മാറിയ ദുരന്തത്തില് നിന്ന് ജീവന് തിരികെ നേടിയ മസ്നീന്, ഇപ്പോള് അറിയാത്ത വേദനയുടെ അരികിലാണ്.
സുഖം പ്രാപിക്കുന്ന ദിവസത്തില്, അവളെ കാത്തിരിക്കുന്നത് ജീവിതം മുഴുവന് നീറുന്ന വേദനയായിരിക്കും
