മലപ്പുറം: നടുക്കം മാറാതെ വിറങ്ങലിച്ച് പാങ് ഗ്രാമം. വിനോദയാത്രയ്ക്കിടെ ദുരന്തത്തില്പ്പെട്ടവരുടെ വേര്പാട് താങ്ങാനാകാതെ ആയിരങ്ങള് പാങ് അമ്പലപ്പറമ്പ് ഹയര് സെക്കന്ഡറി സ്കൂളില് കരച്ചിലടക്കാന് പാടുപെട്ടു.
കേരളത്തെ നടുക്കിയ വാല്പ്പാറ വാഹനാപകടത്തില് മരിച്ച ഒന്പതു പേരുടെ ഭൗതിക ദേഹം ഇന്നലെ സ്കൂള് ഗ്രൗണ്ടില് പൊതുദര്ശനത്തിന് വച്ചു. കണ്ണീരും കരച്ചിലുമായി വിദ്യാര്ത്ഥികളും രക്ഷിതാക്കളും നാട്ടുകാരും പരസ്പരം ആശ്വസിപ്പിക്കാനാകാതെ പകച്ചുനിന്നു. തങ്ങളുടെ പ്രിയ അദ്ധ്യാപകരെ അവസാനമായി കാണാനായി യൂണിഫോം ധരിച്ചാണ് പാങ് ജിഎല്പി സ്കൂളിലെ വിദ്യാര്ത്ഥികളെത്തിയത്. ഇന്നലെ കാലത്ത് ഒന്പതോടെ തമിഴ്നാട് ഹെല്ത്ത് സര്വീസിന്റെ ഒന്പത് ആംബുലന്സുകള് അമ്പലപ്പറമ്പ് ഹയര് സെക്കന്ഡറി സ്കൂളിന്റെ കവാടം കടന്ന് എത്തിയപ്പോള് ദുഃഖം അണപൊട്ടിയൊഴുകി.
മൃതദേഹങ്ങള് എത്തുന്നതിന് മണിക്കൂറുകള്ക്ക് മുമ്പുതന്നെ പ്രദേശത്തെ ആയിരങ്ങള് സ്കൂള് ഗ്രൗണ്ടില് എത്തിയിരുന്നു. ഒരു മണിക്കൂറാണ് വിദ്യാലയ പരിസരത്ത് പൊതുദര്ശനം ഉണ്ടായിരുന്നത്. പുലര്ച്ചെ 6.15നാണ് പോലീസ് അകമ്പടിയോടെ മൃതദേഹങ്ങള് കേരളത്തിലേക്ക് തിരിച്ചത്. പൊള്ളാച്ചി ആശുപത്രിയില് തലേന്ന് അര്ദ്ധരാത്രി ആരംഭിച്ച പോസ്റ്റ്മോര്ട്ടം നടപടികള് രാവിലെ 5.30ന് പൂര്ത്തിയാക്കിയിരുന്നു.
വീട്ടുവളപ്പിലും ഷോര്ണൂര് ശാന്തിതീരം പൊതുശ്മശാനത്തിലും മൂന്നു പള്ളികളിലുമായാണ് ഒന്പത് പേര്ക്കും അന്ത്യവിശ്രമം ഒരുക്കിയത്.
സ്കൂളിലെ പ്രധാനാധ്യാപിക അജിത(54)യുടെ സംസ്കാരം വൈകുന്നേരം ഏഴോടെ ഷൊര്ണൂര് ശാന്തി തീരത്തും അദ്ധ്യാപികയായ ആശ(41)യുടേത് കൊളത്തൂരിലെ വീട്ടുവളപ്പിലുമായി നടന്നു. അദ്ധ്യാപകന് അബ്ദുല് മജീദ് (43), മജീദിന്റെ ഭാര്യ റുഖിയ (39) എന്നിവരെ പാങ് മാട്ടാത്ത് ജുമാമസ്ജിദിലും അദ്ധ്യാപികയായ റംല (52), സ്കൂളിലെ പാചക തൊഴിലാളി സാജിത (45), പാങ് ഗവ. എല്പി സ്കൂളില് നിന്ന് സമീപത്തെ പാങ്ങ് ജിയുപി സ്കൂളിലേക്ക് അടുത്തിടെ മാറിയ അദ്ധ്യാപിക ഷക്കീന (37)എന്നിവരെ പാങ് വലിയ ജുമാഅത്ത് പള്ളിയിലും അദ്ധ്യാപിക സുഹറ (43), സുഹറയുടെ മകന് ഹിഷാം (12) എന്നിവരെ ഈസ്റ്റ് പാങ്ങ് ജുമാമസ്ജിദിലും ഖബറടക്കി.
മന്ത്രി വി. ശിവന്കുട്ടി, ബിജെപി സംസ്ഥാന വൈസ് പ്രസിഡന്റ് ഉണ്ണികൃഷ്ണന്, മുസ്ലിം ലീഗ് സംസ്ഥാന പ്രസിഡന്റ് പാണക്കാട് സാദിഖലി തങ്ങള്, അഖിലേന്ത്യാ ജനറല് സെക്രട്ടറി പി.കെ. കുഞ്ഞാലിക്കുട്ടി, ബിജെപി മലപ്പുറം സെന്ട്രല് ജില്ലാ പ്രസിഡന്റ് പി. സുബ്രഹ്മണ്യന്, ജില്ലാ സെക്രട്ടറി സേതുമാധവന്, സിപിഎം ജില്ലാ സെക്രട്ടറി വി.പി. അനില്, എംഎല്എമാരായ മഞ്ഞളാംകുഴി അലി, പി. ഉബൈദുള്ള, എ.പി. അനില്കുമാര്, ആബിദ് ഹുസൈന് തങ്ങള്, എന്. ഷംസുദ്ദീന്, ജില്ലാ പഞ്ചായത്ത് പ്രസിഡന്റ് പി.എ. ജബ്ബാര് ഹാജി, കളക്ടര് ഡോ. വിനയ് ഗോയല്, ജില്ലാ പോലീസ് മേധാവി ചൈത്ര തെരേസ ജോണ്, ബിജെപി മങ്കട മണ്ഡലം പ്രസിഡന്റ് രാജേഷ്, കൊളത്തൂര് മണ്ഡലം പ്രസിഡന്റ് സജേഷ് എന്നിവര് അന്ത്യാഞ്ജലിയര്പ്പിച്ചു.
