ലോക്സഭയിൽ വനിതാ സംവരണ ബിൽ പരാജയപ്പെട്ടതിന് പിന്നാലെ പ്രതിപക്ഷത്തിനെതിരെ രൂക്ഷമായ ആക്രമണവുമായി ഉത്തർപ്രദേശ് വനിതാ കമ്മീഷൻ വൈസ് ചെയർപേഴ്സൺ അപർണ്ണ യാദവ്. ബിൽ പാസാക്കാതിരുന്ന പാർലമെന്റിലെ നടപടി സ്ത്രീകളുടെ അന്തസ്സിനോടുള്ള പ്രതിപക്ഷത്തിന്റെ എതിർപ്പാണ് കാണിക്കുന്നതെന്ന് അവർ ആരോപിച്ചു. പ്രതിപക്ഷത്തിന്റെ യഥാർത്ഥ മുഖം ഇതോടെ തുറന്നുകാട്ടപ്പെട്ടുവെന്നും രാജ്യത്തെ സ്ത്രീകൾ ഒരിക്കലും ഇവർക്ക് മാപ്പ് നൽകില്ലെന്നും അവർ വ്യക്തമാക്കി.
സ്ത്രീ വിരുദ്ധ നിലപാടാണ് പ്രതിപക്ഷത്തിന്റേതെന്ന് അപർണ്ണ യാദവ് ആരോപിച്ചു. “ഇത് 1996-ലും 1998-ലും 2003-ലും സംഭവിച്ചതാണ്, ഇപ്പോൾ 2026-ലും ആവർത്തിച്ചിരിക്കുന്നു. സാധാരണ കുടുംബങ്ങളിൽ നിന്നുള്ള സ്ത്രീകൾ മുന്നോട്ട് വരുന്നത് കാണാൻ പ്രതിപക്ഷത്തിന് താൽപ്പര്യമില്ല. സ്വന്തം കുടുംബങ്ങളെ പ്രോത്സാഹിപ്പിക്കുക മാത്രമാണ് അവരുടെ ലക്ഷ്യം. പ്രതിപക്ഷത്തിന്റെ യഥാർത്ഥ മുഖം സ്ത്രീ വിരുദ്ധമാണ്,” അപർണ്ണ യാദവ് പറഞ്ഞു.
