കൊച്ചി : മേയര്‍ വി. കെ മിനിമോള്‍ക്കെതിരെ കോര്‍പ്പറേഷന്‍ യോഗത്തില്‍ അഴിമതി ആരോപണം ഉന്നയിച്ച് പ്രതിപക്ഷ പ്രതിഷേധം. മേയറുടെ രാജി ആവശ്യപ്പെട്ട് ഇടത് കൗണ്‍സിലര്‍മാര്‍ നടുത്തളത്തില്‍ ഇറങ്ങി . പ്രതിപക്ഷ നീക്കം രാഷ്‌ട്രീയപ്രേരിതമെന്ന് മേയര്‍ പറഞ്ഞു.കൊച്ചി കോര്‍പ്പറേഷന്‍ കൗണ്‍സിലറായിരുന്ന വേളയില്‍ റോഡ് നിര്‍മ്മാണവുമായി ബന്ധപ്പെട്ട് മിനിമോള്‍ അഴിമതി നടത്തിയെന്നാണ് ആരോപണം.
അഴിമതി നടത്തിയ മേയര്‍ രാജി വെക്കണമെന്ന ബാനര്‍ ഉയര്‍ത്തിയാണ് ഇടത് അംഗങ്ങള്‍ കൗണ്‍സില്‍ യോഗത്തിന്റെ നടുത്തളത്തില്‍ ഇറങ്ങിയത്. ബഹളത്തില്‍ കൗണ്‍സില്‍ യോഗം സ്തംഭിച്ചു. വരും ദിവസങ്ങളില്‍ മേയര്‍ക്കെതിരെ പ്രതിഷേധം കടുപ്പിക്കും എന്ന് പ്രതിപക്ഷം അറിയിച്ചു.
ഏത് അന്വേഷണത്തെയും നേരിടാന്‍ തയാറാണെന്ന് മേയര്‍ പറഞ്ഞു.പ്രതിപക്ഷ പ്രതിഷേധം രാഷ്‌ട്രീയ പ്രേരിതമാണ്. ഇതുവരെ കേസുമായി ബന്ധപ്പെട്ട ഒരറിയിപ്പും തനിക്ക് ലഭിച്ചിട്ടില്ലെന്നും തന്റെ ഭാഗം കോടതിയെ ബോധ്യപ്പെടുത്തുമെന്നും മേയര്‍ മിനിമോള്‍ വ്യക്തമാക്കി.ബഹളം തുടര്‍ന്നതോടെ മേയര്‍ അജണ്ട അവതരിപ്പിച്ച് കൗണ്‍സില്‍ യോഗം അവസാനിപ്പിച്ചു.
