തിരുവനന്തപുരം: തലസ്ഥാന ജനതയ്ക്ക് നല്കിയ വാക്ക് പാലിച്ച് നഗരസഭാ ഭരണ സമിതി. വര്ഷങ്ങളായി മുടങ്ങിക്കിടന്ന ആചാരം പുനരാരംഭിക്കാന് മുന്കൈയെടുത്ത് ബിജെപി നേതൃത്വത്തിലുള്ള നഗരസഭാ ഭരണസമിതി.
ആചാരങ്ങള് അനുഷ്ഠിക്കുന്നതിന്റെ ഭാഗമായി പുത്തരിക്കണ്ടത്ത് നിറപുത്തരി ചങ്ങുകള്ക്കുപയോഗിക്കാനായി ഞാറ് നട്ടു. പുത്തരിക്കണ്ടത്ത് വിളയുന്ന നെല്ക്കതിരുകളാണ് ഭഗവാന്റെ നിറപുത്തരിക്ക് ഉപയോഗിക്കുന്നത് എന്നാണ് സങ്കല്പ്പം. എല്ലാവര്ഷവും കോര്പ്പറേഷന്റെ നേതൃത്വത്തില് പുത്തരിക്കണ്ടത്ത് നെല്ല് വിളയിച്ച് നിറപുത്തരിക്കായി ഇവിടെ നിന്നും കതിര് അമ്പലത്തിലേക്ക് കൊണ്ടുപോകുകയാണ് ചെയ്യുന്നത്. കഴിഞ്ഞ ചില വര്ഷങ്ങളായി പുത്തരിക്കണ്ടത്ത് നെല്ല് വിളയിക്കാത്തതിനാല് പുറത്ത് നിന്ന് കതിര് കൊണ്ടുവന്നാണ് ചടങ്ങ് നടത്തിയത്. എന്ഡിഎ നേതൃത്വത്തിലുള്ള ഭരണസമിതി അധികാരത്തില് വന്നാല് പുത്തരിക്കണ്ടത്ത് തന്നെ ഞാറ് വിളയിച്ച് ഭഗവാന് നിറപുത്തരിക്കായി കാഴ്ചവയ്ക്കുമെന്ന് നഗരസഭാ തെരഞ്ഞെടുപ്പിന് മുമ്പ് തന്നെ ബിജെപി പറഞ്ഞിരുന്നു.
ശ്രീപത്മനാഭസ്വാമി ക്ഷേത്രം പുരാതനകാലം മുതലുള്ള എല്ലാ ആചാരങ്ങളും അനുഷ്ഠാനങ്ങളും അതുപോലെ പരിപാലിച്ചു പോരുന്ന ക്ഷേത്രങ്ങളില് ഒന്നാണ്. ജൂണ് ജൂലായ് മാസങ്ങളിലാണ് നിറപുത്തരി വരുന്നത്. അന്ന് പാകമാകുന്നതിന് വേണ്ടിയാണ് ഇപ്പോള് ഞാറ് നടുന്നതെന്നും ഞാറ് നടീല് ഉദ്ഘാടനം ചെയ്ത മേയര് വി.വി. രാജേഷ് പറഞ്ഞു. എല്ലാ ആചാരാനുഷ്ഠാനങ്ങളും അതുപോലെ തന്നെ നിര്വഹിക്കാന് ഈ ഭരണ സമിതി പ്രതിജ്ഞാബദ്ധമാണെന്നും മേയര് വി.വി. രാജേഷ് പറഞ്ഞു.
ഡെപ്യൂട്ടി മേയര് ജി.എസ്. ആശാനാഥ്, സ്റ്റാന്ഡിംഗ് കമ്മറ്റി ചെയര്മാന്മാരായ എം.ആര്. ഗോപന്, കരമന അജിത്ത്, പാറ്റൂര് രാധാകൃഷ്ണന്, മഞ്ജു ജി.എസ്., സിന്ധു ശശി, കൗണ്സിലര്മാരായ നീറമണ്കര ഹരി, ബീന ആര്.സി., എസ്.കെ.പി. രമേശ്, വി.സുദേവന് നായര്, ടി. രാജലക്ഷ്മി, ശ്രൂതി എസ്.എസ്., പാളയം കൃഷി വകുപ്പ് മേധാവികള്, കൃഷി ഓഫീസര്, സംസ്ഥാന കൃഷി വകുപ്പ് ഉദ്യോഗസ്ഥര് തുടങ്ങിയവര് ചടങ്ങില് പങ്കെടുത്തു.
