തിരുവനന്തപുരം: സിപിഐ ജില്ലാ കമ്മിറ്റി അംഗം ബി എസ് സുലോചനനെ പാര്ട്ടി സസ്പെന്ഡ് ചെയ്തു. നേമത്തെ എല്ഡിഎഫ് സ്ഥാനാര്ഥി വിദ്യാഭ്യാസ മന്ത്രി വി ശിവന്കുട്ടിയ്ക്കെതിരെ പ്രവര്ത്തിച്ചെന്ന് ആരോപിച്ചാണ് അച്ചടക്ക നടപടി.
വി ശിവന്കുട്ടിയെ അപകീര്ത്തിപ്പെടുത്തുന്ന പരാമര്ശങ്ങള് സുലോചനന് നടത്തി. ഇത്തരം പരാമര്ശങ്ങള് അടങ്ങിയ ഓഡിയോ നേമം മണ്ഡലത്തിലാകെ പ്രചരിക്കുകയും ചെയ്തു. ശബ്ദം സുലോചനന്റെത് തന്നെയെന്ന് ഉറപ്പാക്കിയെന്നാണ് സി പി ഐ ജില്ലാ നേതൃത്വം പറയുന്നത്.ജില്ലാ എക്സിക്യൂട്ടീവ് ചേര്ന്നാണ് ബി എസ് സുലോചനനെ പാര്ട്ടിയുടെ പ്രാഥമിക അംഗത്വത്തില് നിന്ന് സസ്പെന്ഡ് ചെയ്യാന് തീരുമാനിച്ചത്.
ശിവന്കുട്ടിയുമായി തനിക്ക് പല കാര്യത്തിലും അഭിപ്രായ വ്യത്യാസമുണ്ടെന്നും ശിവന്കുട്ടിയ്ക്കെതിരെയാകും ഈ തിരഞ്ഞെടുപ്പില് താന് പ്രവര്ത്തിക്കുകയെന്നും സുലോചനന് സൂചിപ്പിക്കുന്ന ഓഡിയോ സന്ദേശമാണ് പുറത്തുവന്നത്.പിന്നാലെ സിപിഎം സൈബര് ഗ്രൂപ്പുകളിലും ഇതിനെതിരെ വലിയ വിമര്ശനം ഉയര്ന്നു. എല്ഡിഎഫില് ഇക്കാര്യം ചര്ച്ചയായപ്പോഴാണ് തിരഞ്ഞെടുപ്പ് ഫലം കാത്തുനില്ക്കാതെ സുലോചനനെതിരെ പാര്ട്ടി അടിയന്തരമായി അച്ചടക്ക നടപടിയെടുത്തത്.
