ചെന്നൈ: തമിഴ് നടി തൃഷ കൃഷ്ണന്റെ ചെന്നൈ തേനാംപേട്ടിലെ വസതിക്ക് ബോംബ് ഭീഷണി. ചെന്നൈ സിറ്റി കൺട്രോൾ റൂമിലേക്ക് ഇമെയിൽ വഴിയാണ് ഭീഷണി സന്ദേശം എത്തിയത്. തൃഷയുടെ വീട്ടിൽ സ്ഫോടകവസ്തുക്കൾ സ്ഥാപിച്ചിട്ടുണ്ടെന്നായിരുന്നു സന്ദേശം.
ഭീഷണി സന്ദേശം ലഭിച്ചയുടൻ തന്നെ പോലീസും ബോംബ് ഡിറ്റക്ഷൻ ആൻഡ് ഡിസ്പോസൽ സ്ക്വാഡും തൃഷയുടെ വീട്ടിലെത്തി പരിശോധന നടത്തി. സ്നിഫർ നായകളുടെ സഹായത്തോടെ നടത്തിയ വിശദമായ പരിശോധനയിൽ സംശയാസ്പദമായ ഒന്നും കണ്ടെത്താനായില്ല. ഇതോടെ, സന്ദേശം വ്യാജമാണെന്ന് നിഗമനത്തിലെത്തുകയായിരുന്നു.
ചുരുങ്ങിയ സമയത്തിനുള്ളിൽ തൃഷയ്ക്കെതിരെ ഉണ്ടാകുന്ന രണ്ടാമത്തെ ബോംബ് ഭീഷണിയാണിത്. സംഭവത്തിൽ ചെന്നൈ പോലീസിന്റെ സൈബർ ക്രൈം വിഭാഗം അന്വേഷണം ആരംഭിച്ചു. ഇമെയിൽ അയച്ച ഐപി അഡ്രസ് കണ്ടെത്താനുള്ള ശ്രമത്തിലാണ് അധികൃതർ. ക്രിമിനൽ ഭീഷണി മുഴക്കിയതിനും തെറ്റായ വിവരം നൽകിയതിനും കേസെടുത്തിട്ടുണ്ട്.
