വിശദവിവരങ്ങള്‍ www.nsd.gov.in ല്‍
ഏപ്രില്‍ 17 വരെ ഓണ്‍ലൈനില്‍ അപേക്ഷിക്കാം
പ്രവേശന പരീക്ഷ, ഓഡിഷന്‍, വര്‍ക്ക്‌ഷോപ്പ് എന്നിവയുടെ അടിസ്ഥാനത്തിലാണ് സെലക്ഷന്‍
കേന്ദ്ര സാംസ്‌കാരിക മന്ത്രാലയത്തിന് കീഴിലുള്ള സ്വയംഭരണ സ്ഥാപനമായ നാഷണല്‍ സ്‌കൂള്‍ ഓഫ് ഡ്രാമ വിവിധ സെന്ററുകളിലായി 2026 വര്‍ഷം നടത്തുന്ന ഡിപ്ലോമ, സര്‍ട്ടിഫിക്കറ്റ് കോഴ്‌സുകളില്‍ പ്രവേശനത്തിന് ഓണ്‍ലൈനില്‍ ഏപ്രില്‍ 17 വരെ അപേക്ഷിക്കാം. കോഴ്‌സുകളുടെ സംക്ഷിപ്ത വിവരങ്ങള്‍ ചുവടെ-
ത്രിവത്‌സര ഡിപ്ലോമ കോഴ്‌സ് ഇന്‍ ഡ്രമാറ്റിക്‌സ് (2026-27) ന്യൂദല്‍ഹി.
ഏകവര്‍ഷ സര്‍ട്ടിഫിക്കറ്റ് കോഴ്‌സുകള്‍ (2026-27)- 1. ഡ്രമാറ്റിക് ആര്‍ട്ട്-ഗാങ്‌തോക്ക്, സിക്കിം (2) തിയറ്റര്‍ എഡ്യൂക്കേഷന്‍- അഗര്‍ത്തല, ത്രിപുര (3) ആക്ടിങ്- ബെംഗളൂരു (4) ഇന്ത്യന്‍ ക്ലാസിക്കല്‍ തിയറ്റര്‍- വാരണാസി (യുപി).
ഡിപ്ലോമ കോഴ്‌സില്‍ 32 സീറ്റുകളും സര്‍ട്ടിഫിക്കറ്റ് കോഴ്‌സുകളില്‍ ഓരോന്നിലും 20 സീറ്റുകള്‍ വീതമുണ്ട്. പ്രവേശനം ലഭിക്കുന്നവര്‍ക്ക് ഡിപ്ലോമ കോഴ്‌സില്‍ 9500 രൂപയും സര്‍ട്ടിഫിക്കറ്റ് കോഴ്‌സുകളില്‍ 6000 രൂപയും പ്രതിമാസം സ്‌കോളര്‍ഷിപ്പ് അനുവദിക്കും.
പ്രവേശന യോഗ്യത: ഏതെങ്കിലും സ്ട്രീമില്‍ ബിരുദം. ഡിപ്ലോമ കോഴ്‌സില്‍ പ്രവേശനം തേടുന്നവര്‍ കുറഞ്ഞപക്ഷം വ്യത്യസ്തമായ 6 തിയറ്റര്‍ പ്രൊഡക്ഷനുകളില്‍ പങ്കെടുത്തിരിക്കണം. സര്‍ട്ടിഫിക്കറ്റ് കോഴ്‌സുകള്‍ക്ക് നാല് പ്രൊഡക്ഷനുകളില്‍ പങ്കെടുത്തിരുന്നാല്‍ മതി. പ്രാദേശിക ഭാഷയില്‍ പ്രാവീണ്യമുണ്ടായിരിക്കണം. ഫിസിക്കല്‍ ഫിറ്റ്‌നസുള്ളവരാകണം.
സെലക്ഷന്‍: മേയ്, ജൂണ്‍ മാസങ്ങളിലായി നടത്തുന്ന സംയുക്ത പ്രവേശന പരീക്ഷ, ഓഡിഷന്‍, ഫൈനല്‍ വര്‍ക്ക്‌ഷോപ്പ് എന്നിവയുടെ അടിസ്ഥാനത്തിലാണ് തെരഞ്ഞെടുപ്പ്.
പ്രവേശന വിജ്ഞാപനവും വിശദവിവരങ്ങളടങ്ങിയ പ്രോസ്‌പെക്ടസും www.nsd.gov.in, www.onlinedmissions.nsd.gov.in എന്നീ വെബ്‌സൈറ്റുകളില്‍ ലഭ്യമാണ്. അപേക്ഷാ ഫീസ് 50 രൂപ. ക്രഡിറ്റ്/ഡബിറ്റ് കാര്‍ഡ്, യുപിഐ, നെറ്റ് ബാങ്കിങ് വഴി ഫീസ് അടയ്‌ക്കാം. അപേക്ഷാ സമര്‍പ്പണത്തിനുള്ള മാര്‍ഗ്ഗനിര്‍ദ്ദേശങ്ങളും സെലക്ഷന്‍ നടപടികളും പ്രോസ്‌പെക്ടസിലുണ്ട്.
ദല്‍ഹിയില്‍ എംഎസ്‌സി നഴ്‌സിങ്; അപേക്ഷ ഏപ്രില്‍ 24 വരെ. വിശദവിവരങ്ങള്‍ www.rakcon.com- ല്‍
കേന്ദ്രസര്‍ക്കാരിന് കീഴില്‍ ന്യൂദല്‍ഹി രാജ്കുമാരി അമൃത്കൗര്‍ നഴ്‌സിങ് കോളേജ് ഓഫ് 2026-27 വര്‍ഷം നടത്തുന്ന എംഎസ്‌സി നഴ്‌സിങ് പ്രവേശനത്തിന് ഓണ്‍ലൈനില്‍ ഏപ്രില്‍ 24 വൈകിട്ട് 5 മണിവരെ അപേക്ഷിക്കാം. ദല്‍ഹി സര്‍വ്വകലാശാലയുമായി അഫിലിയേഷനുണ്ട്. പ്രവേശന വിജ്ഞാപനം, പ്രോസ്‌പെക്ടസ് www.rakcon.com ല്‍ ലഭിക്കും.
അംഗീകൃത ബിഎസ്‌സി നഴ്‌സിങ് 55 ശതമാനം മാര്‍ക്കോടെ പാസായിട്ടുള്ളവര്‍ക്ക് അപേക്ഷിക്കാം. (എസ്‌സി/എസ്ടി വിഭാഗത്തിന് 5 ശതമാനം മാര്‍ക്കിളവുണ്ട്). 100 കിടക്കകളുള്ള ഹോസ്പിറ്റലില്‍ നഴ്‌സിങ് ഓഫീസറായി ഒരുവര്‍ഷത്തെ പ്രവൃത്തി പരിചയമുണ്ടായിരിക്കണം. നഴ്‌സിങ് കൗണ്‍സിലില്‍ രജിസ്റ്റര്‍ ചെയ്തിരിക്കണം.
അപേക്ഷാ ഫീസ് 1500 രൂപ. അപേക്ഷിക്കേണ്ട രീതി പ്രോസ്‌പെക്ടസിലുണ്ട്. മേയ് 31ന് രാവിലെ 10 മണിക്ക് നടത്തുന്ന ടെസ്റ്റിലൂടെയാണ് സെലക്ഷന്‍.
നാല് സെമസ്റ്ററുകളായുള്ള രണ്ട് വര്‍ഷത്തെ റഗുലര്‍ കോഴ്‌സില്‍ 27 സീറ്റുകളാണുള്ളത്. നഴ്‌സിങ് എഡ്യൂക്കേഷന്‍, അഡ്വാന്‍സ് നഴ്‌സിങ് പ്രാക്ടീസ്, നഴ്‌സിങ് റിസര്‍ച്ച്, ക്ലിനിക്കല്‍ സ്‌പെഷ്യാലിറ്റി, സ്റ്റാറ്റിസ്റ്റിക്‌സ്, നഴ്‌സിങ് മാനേജ്‌മെന്റ് എന്നിവയാണ് പഠന മേഖലകള്‍. കൂടുതല്‍ വിവരങ്ങള്‍ക്കും അപ്‌ഡേറ്റുകള്‍ക്കും വെബ്‌സൈറ്റ് സന്ദര്‍ശിക്കുക.
