തിരുവനന്തപുരം: വ്യാജ മാന്‍പവര്‍ ഏജന്‍സികളുടെ പേരില്‍ വ്യാപാരികളേയും ഹോട്ടല്‍, റസ്‌റ്റോറന്റ് ഉടമകളേയും ചെറുകിട സംരംഭകരെയും ലക്ഷ്യംവച്ച് ഓണ്‍ലൈന്‍ സാമ്പത്തികത്തട്ടിപ്പ്. ‘സ്റ്റാഫിനെ നല്‍കാം’ എന്ന വ്യാജ വാഗ്ദാനവുമായാണ് തട്ടിപ്പുകാര്‍ സമൂഹ മാധ്യമങ്ങള്‍ വഴി വ്യാജ പരസ്യങ്ങള്‍ നല്‍കി തട്ടിപ്പ് നടത്തുന്നത്.
വിശ്വാസ്യതയുള്ള സ്ഥാപനങ്ങളുടെ പേരില്‍ വാട്‌സ്ആപ്പ് പോലുള്ള സോഷ്യല്‍ മീഡിയ പ്ലാറ്റ്‌ഫോമുകള്‍ വഴി വ്യാപാരികളുമായി തട്ടിപ്പുകാര്‍ ബന്ധപ്പെടുന്നു. രജിസ്റ്റര്‍ ചെയ്ത പരാതികളില്‍ സ്‌കാന്‍ ക്രൂ അല്ലെങ്കില്‍ ‘സ്‌കാന്‍ നെക്‌സസ്’ എന്നീ സ്ഥാപനങ്ങളുടെ പേരാണ് തട്ടിപ്പുകാര്‍ ഉപയോഗിച്ചിരിക്കുന്നത്.
ആവശ്യമായ ജീവനക്കാരെ ജോലിക്കായി എത്തിക്കാമെന്ന് വാഗ്ദാനം ചെയ്യുകയും, വിശ്വാസം നേടുന്നതിനായി വ്യാജ കരാറുകള്‍, മാര്‍ഗ നിര്‍ദേശങ്ങള്‍, മറ്റ് രേഖകള്‍ എന്നിവ പങ്കുവെക്കുകയും ചെയ്യുന്നു. തുടര്‍ന്ന് ‘അഡ്വാന്‍സ് ഫീസ്’, ‘യാത്ര ചെലവ്’ തുടങ്ങിയ കാരണങ്ങള്‍ പറഞ്ഞ് പണം ആവശ്യപ്പെടുകയും, പണം ലഭിച്ച ശേഷം വിവിധ കാരണങ്ങള്‍ പറഞ്ഞ് കാലതാമസം ഉണ്ടാക്കുകയും ഒടുവില്‍ വാഗ്ദാനം നല്‍കിയ സേവനങ്ങള്‍ നല്‍കാതെ കടന്നുകളയുകയും ചെയ്യുന്നു. വിശ്വാസ്യത ഉറപ്പാക്കിയശേഷം മാത്രം പണമിടപാടുകള്‍ നടത്തണമെന്നും തട്ടിപ്പിനിരയായാല്‍ 1930 എന്ന സൈബര്‍ ഹെല്‍പ്‌ലൈന്‍ നമ്പറിലോ https://cybercrime.gov.in എന്ന ദേശീയ സൈബര്‍ ക്രൈം പോര്‍ട്ടലിലോ പരാതി നല്‍കണമെന്ന് പോലീസ് അറിയിച്ചു.
