കൊല്‍ക്കത്ത: നിയമസഭാ തിരഞ്ഞെടുപ്പ് നടന്ന കേരളം ഉള്‍പ്പെടെ സംസ്ഥാനങ്ങളില്‍ ബിജെപിക്ക് വലിയ മുന്നേറ്റമുണ്ടാകുമെന്ന് പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ കത്വയില്‍ വിപുലമായ തിരഞ്ഞെടുപ്പ് റാലിയില്‍ സംസാരിക്കുകയായിരുന്നു പ്രധാനമന്ത്രി. കേരളത്തില്‍ നിലവിലുള്ള രാഷ്‌ട്രീയ സമവാക്യങ്ങളെ മറികടന്ന് ബിജെപി കരുത്ത് തെളിയിക്കുന്ന കാഴ്ചയാണ് വോട്ടിംഗ് ശതമാനത്തിലൂടെ തെളിയുന്നത്.
കേരളം, അസം, പുതുച്ചേരി എന്നിവിടങ്ങളില്‍ രേഖപ്പെടുത്തിയ ഉയര്‍ന്ന പോളിംഗ് ശതമാനം മാറ്റത്തിന്റെ സൂചനയാണെന്ന് നരേന്ദ്രമോദി പറഞ്ഞു. കേരളത്തില്‍ വലിയ തോതില്‍ സ്ത്രീ വോട്ടര്‍മാര്‍ പോളിംഗ് ബൂത്തുകളിലേക്ക് എത്തിയത് ബിജെപിക്ക് ഗുണം ചെയ്യും. ‘സ്ത്രീ വോട്ടര്‍മാരുടെ എണ്ണത്തില്‍ എവിടെയൊക്കെ വര്‍ധനവ് ഉണ്ടായിട്ടുണ്ടോ അവിടെയെല്ലാം ബിജെപി വന്‍ വിജയം നേടിയിട്ടുണ്ടെന്ന് മോദി ചൂണ്ടിക്കാട്ടി.കേരളത്തിലെ അമ്മമാരും സഹോദരിമാരും ബിജെപിയുടെ വികസന രാഷ്‌ട്രീയത്തില്‍ വിശ്വസിക്കുന്നു എന്നതിന്റെ തെളിവാണ് ബൂത്തുകളിലെ ഈ വലിയ പങ്കാളിത്തം.
കേരളത്തില്‍ പ്രധാന രാഷ്‌ട്രീയ ശക്തികളായ എല്‍ഡിഎഫിനും യുഡിഎഫിനും പരാജയഭീതിയാണ്. തിരഞ്ഞെടുപ്പ് കഴിഞ്ഞതോടെ ഇരുമുന്നണികള്‍ക്കും വിജയമുറപ്പിക്കാന്‍ കഴിയാത്ത സ്ഥിതിയാണ്. . പരമ്പരാഗതമായി മാറി മാറി ഭരിക്കുന്ന രീതിയില്‍ നിന്ന് മാറി വികസനത്തിന് വോട്ട് ചെയ്യുന്ന ഒരു ജനത കേരളത്തില്‍ വളര്‍ന്നുവരുന്നുണ്ട്. ബംഗാളിലെ സ്ഥിതിയും കേരളത്തിന് സമാനമാണെന്ന് നരേന്ദ്ര മോദി പറഞ്ഞു. തൃണമൂല്‍ കോണ്‍ഗ്രസിന്റെ അഴിമതി ഭരണത്തിന് അറുതി വരുത്താന്‍ ബംഗാള്‍ ജനത വിധി എഴുതും. വോട്ടെടുപ്പ് പൂര്‍ത്തിയാകുന്നതോടെ പശ്ചിമ ബംഗാളിലും കേരളത്തിലും ബിജെപിയുടെ സ്വാധീനം നിര്‍ണായകമായി മാറും.
