മോസ്കോ: ഓർത്തഡോക്സ് ഈസ്റ്റർ പ്രമാണിച്ച് യുക്രെയ്നുമായി താൽക്കാലിക വെടിനിർത്തൽ പ്രഖ്യാപിച്ച് റഷ്യ. റഷ്യൻ പ്രസിഡൻ്റ് വ്ലാഡിമിർ പുട്ടിൻ പ്രഖ്യാപിച്ച ഈ തീരുമാനം യുക്രെയ്ൻ മുന്നോട്ടുവച്ച നിർദേശം പരിഗണിച്ചാണെന്ന് ക്രെംലിൻ അറിയിച്ചു. ഏപ്രിൽ 11 വൈകിട്ട് 4 മണി മുതൽ ഏപ്രിൽ 12 അർധരാത്രി വരെയാണ് വെടിനിർത്തൽ പ്രാബല്യത്തിൽ വരിക.
നാലുവർഷമായി തുടരുന്ന റഷ്യ–യുക്രെയ്ൻ യുദ്ധത്തിനിടെ സമാധാന ചർച്ചകൾ പലവട്ടം വഴിമുട്ടിയ സാഹചര്യത്തിലാണ് ഈ പുതിയ നീക്കം ശ്രദ്ധ നേടുന്നത്. യുക്രെയ്ൻ പ്രസിഡൻ്റ് വൊളൊദിമിർ സെലെൻസ്കി നേരത്തേ തന്നെ ഈസ്റ്റർ വെടിനിർത്തൽ നിർദേശം യുഎസ് മുഖേന കൈമാറിയതായി വ്യക്തമാക്കിയിരുന്നു. അതിന്റെ തുടർച്ചയായാണ് റഷ്യയുടെ ഈ പ്രഖ്യാപനം ഉണ്ടായതെന്ന് വിലയിരുത്തപ്പെടുന്നു.
വെടിനിർത്തൽ കാലയളവിൽ എല്ലാ മേഖലകളിലും സൈനിക നടപടികൾ നിർത്തിവെക്കാൻ നിർദേശം നൽകിയതായി ക്രെംലിൻ അറിയിച്ചു. യുദ്ധരംഗങ്ങളിലെ സംഘർഷങ്ങൾ താൽക്കാലികമായി ശമിക്കാനാണ് ഈ നീക്കമെന്ന വിലയിരുത്തലുണ്ട്. എന്നാൽ, ശത്രുപക്ഷത്തുനിന്ന് ഏതെങ്കിലും പ്രകോപനം ഉണ്ടായാൽ അതിനെ ശക്തമായി നേരിടാൻ സൈന്യം പൂർണ സജ്ജമാണെന്നും റഷ്യ വ്യക്തമാക്കിയിട്ടുണ്ട്.
റഷ്യയുടെ ഈ നീക്കത്തെ യുക്രെയ്നും പിന്തുടരുമെന്ന പ്രതീക്ഷയും ക്രെംലിൻ പ്രകടിപ്പിച്ചു. യുദ്ധം തുടർന്നുകൊണ്ടിരിക്കുന്ന സാഹചര്യത്തിൽ ഇത്തരത്തിലുള്ള വെടിനിർത്തൽ പ്രഖ്യാപനങ്ങൾ മാനുഷിക സഹായ പ്രവർത്തനങ്ങൾക്കും സാധാരണ ജനങ്ങളുടെ സുരക്ഷയ്‌ക്കും ഏറെ സഹായകരമാകുമെന്ന് അന്താരാഷ്‌ട്ര നിരീക്ഷകർ വിലയിരുത്തുന്നു.
അതേസമയം, ഈ താൽക്കാലിക വെടിനിർത്തൽ ദീർഘകാല സമാധാനത്തിന് വഴിയൊരുക്കുമോ എന്നത് ഇപ്പോഴും അനിശ്ചിതത്വത്തിലാണ്. നിരവധി ശ്രമങ്ങൾ നടന്നിട്ടും സമഗ്രമായ സമാധാന കരാർ സാധ്യമാകാത്ത സാഹചര്യത്തിൽ, ഈസ്റ്റർ വെടിനിർത്തൽ പുതിയ രാഷ്‌ട്രീയ-രാജതന്ത്ര നീക്കങ്ങൾക്ക് വാതിൽ തുറക്കുമോയെന്ന് ലോകം ഉറ്റുനോക്കുകയാണ്.
