കണ്ണൂര്‍:വോട്ടെടുപ്പ് ദിവസം സംസ്ഥാനത്ത് വിവിധ ഇടങ്ങളില്‍ അക്രമം.തളിപ്പറമ്പ്, മട്ടന്നൂര്‍ മണ്ഡലങ്ങളിലെ എന്‍ഡിഎ സ്ഥാനാര്‍ത്ഥികളുടെ ബൂത്ത് ഏജന്റുമാരെ സിപിഎം പ്രവര്‍ത്തകര്‍ ആക്രമിച്ചു.ധര്‍മ്മടം,മട്ടന്നൂര്‍,തലശേരി, പയ്യന്നൂര്‍, പേരാവൂര്‍ മണ്ഡലങ്ങളിലെ യുഡിഎഫ് ബൂത്ത് ഏജന്റുമാര്‍ക്ക് നേരെയും ആക്രമണം നടന്നെന്നാണ് വിവരം. പരിക്കേറ്റ ബൂത്ത് ഏജന്റുമാര്‍ വിവിധ ആശുപത്രികളില്‍ ചികിത്സ തേടി. സിപിഎം പ്രവര്‍ത്തകരാണ് ആക്രമണങ്ങള്‍ക്ക് പിന്നിലെന്നാണ് യുഡിഎഫ് ആരോപണം. നാദാപുരത്തും ബാലുശേരിയിലും ബൂത്ത് ഏജന്റുമാര്‍ക്ക് എല്‍ഡിഎഫ് പ്രവര്‍ത്തകരുടെ ആക്രമണത്തില്‍ പരിക്കേറ്റു.
മട്ടന്നൂരില്‍ കോണ്‍ഗ്രസ് മന്ദിരം അടിച്ചു തകര്‍ത്തു. തളിപ്പറമ്പ് മലപ്പട്ടത്ത് വോട്ട് ചെയ്യാന്‍ എത്തിയ സി പി എം കണ്ണൂര്‍ ജില്ലാ സെക്രട്ടേറിയറ്റ് മുന്‍ അംഗവും യുഡിഎഫ് സ്ഥാനാര്‍ത്ഥിയുമായ ടി കെ ഗോവിന്ദനെ സിപിഎം പ്രവര്‍ത്തകര്‍ കൂകിവിളിച്ചു.
തളിപ്പറമ്പ് മണ്ഡലത്തിലെ മലപ്പട്ടത്ത് എല്‍ഡിഎഫ്- യുഡിഎഫ് സംഘര്‍ഷമുണ്ടായി. പരിക്കേറ്റ രണ്ട് യുഡിഎഫ് പ്രവര്‍ത്തകരെ ആശുപത്രിയില്‍ പ്രവേശിപ്പിച്ചു. കാസര്‍ഗോഡ്, തൃക്കരിപ്പൂര്‍, പേരാമ്പ്ര, കുറ്റ്യാടി മണ്ഡലങ്ങളിലെ യുഡിഎഫ് ബൂത്ത് ഏജന്റുമാരെ എല്‍ഡിഎഫ് പ്രവര്‍ത്തകര്‍ മര്‍ദ്ദിച്ചെന്നും പരാതിയുണ്ട്. വാണിമേല്‍ നെടും പറമ്പില്‍ യുഡിഎഫ് ബൂത്ത് ഏജന്റിനെയും പഞ്ചായത്ത് യുഡിഫ് കണ്‍വീനര്‍ അടക്കം 6 യുഡിഎഫ് നേതാക്കളെയും സിപിഎം പ്രവര്‍ത്തകര്‍ ആക്രമിച്ചു.ഇവരെ നാദാപുരം ഗവണ്‍മെന്റ് ആശുപത്രിയില്‍ പ്രവേശിപ്പിച്ചു. കുറ്റ്യാടി നടുപ്പൊയിലില്‍ കള്ളവോട്ട് ചോദ്യം ചെയ്ത യുഡിഎഫ് ബൂത്ത് ഏജന്റുമാരെ മര്‍ദിച്ചെന്നും പരാതിയുണ്ട്. മര്‍ദനമേറ്റ രാഹുല്‍ ചാലില്‍, ഷഫീക് എന്നിവരെ കുറ്റ്യാടി താലൂക്ക് ആശുപത്രിയില്‍ പ്രവേശിപ്പിച്ചു.
കാസര്‍കോട് ഉദിനൂരില്‍ യുഡിഎഫ് വനിതാ ബൂത്ത് ഏജന്റിനെതിരെ നായ്‌ക്കുരണ പൊടി പ്രയോഗിച്ചു. ബൂത്ത് ഏജന്റ് രതിലയേയും മറ്റൊരു യുഡിഎഫ് പ്രവര്‍ത്തകയെയും ആശുപത്രിയില്‍ പ്രവേശിപ്പിച്ചു. ആക്രമണത്തിന് പിന്നില്‍ എല്‍ഡിഎഫ് പ്രവര്‍ത്തകരെന്ന് യുഡിഎഫ് ആരോപിച്ചു. സംഭവത്തില്‍ കേസെടുക്കാന്‍ മുഖ്യ തെരഞ്ഞെടുപ്പ് ഓഫീസര്‍ നിര്‍ദേശം നല്‍കി. പേരാവൂര്‍ മണ്ഡലത്തിലെ യുഡിഎഫ് ബൂത്ത് ഏജന്റിനെ ആക്രമിച്ചതായും ദേഹത്ത് നായിക്കുരണ പൊടി വിതറിയെന്നും പരാതിയുണ്ട്. മുഴക്കുന്ന് ഗവ. യുപി സ്‌കൂളിലാണ് അതിക്രമം.
തിരുവനന്തപുരം പെരുമാതുറയില്‍ ബൂത്തിനകത്ത് പാര്‍ട്ടി പ്രവര്‍ത്തകര്‍ കയറിയതിനെ ചൊല്ലി എല്‍ഡിഎഫ് -യുഡിഎഫ് പ്രവര്‍ത്തകര്‍ തമ്മിലുണ്ടായ സംഘര്‍ഷം പൊലീസ് ഇടപെട്ട് നിയന്ത്രിച്ചു. പട്ടാമ്പിയിലെ എല്‍ഡിഎഫ് സ്ഥാനാര്‍ഥി മുഹമ്മദ് മുഹ്‌സിന്‍ പോളിംഗ് ബൂത്ത് സന്ദര്‍ശിക്കുന്നതിനിടെയും സംഘര്‍ഷമുണ്ടായി. ബൂത്തില്‍ വച്ച് വോട്ട് ചോദിച്ചു എന്ന് ആരോപിച്ചാണ് മുഹ്‌സിനെ യുഡിഎഫ് പ്രവര്‍ത്തകര്‍ തടഞ്ഞത്. മദ്യപിച്ചെത്തിയ യുഡിഎഫ് പ്രവര്‍ത്തകര്‍ തന്നെ ആക്രമിച്ചു എന്നാരോപിച്ച് മുഹ്‌സിന്‍ പരാതി നല്‍കി. അതേസമയം, പേരാമ്പ്രയില്‍ പ്രായമുള്ള അയല്‍വാസിയെ വോട്ട് ചെയ്യാന്‍ കൊണ്ടുവന്ന സ്ത്രീയെ സിപിഎം പഞ്ചായത്ത് വൈസ് പ്രസിഡന്റ് മര്‍ദ്ദിച്ചെന്നും പരാതി ഉയര്‍ന്നു.
