കോഴിക്കോട് :തെരഞ്ഞെടുപ്പില് എല്ഡിഎഫിന് പിന്തുണയുമായി സമസ്ത എപി വിഭാഗം.തങ്ങള്ക്ക് എല്ലാം ചെയ്ത് തന്നത് ഇടത് സര്ക്കാരാണ്. എല്ഡിഎഫ് സ്ഥാനാര്ഥികള്ക്ക് വോട്ട് ചെയ്യണമെന്ന് നിര്ദേശിക്കുന്ന വീഡിയോ പുറത്തെത്തി. മണ്ഡലമോ സ്ഥാനാര്ഥിയോ നോക്കാതെ ഇടതിനൊപ്പം നില്ക്കണമെന്നാണ് തീരുമാനം.
മുഴുവന് മണ്ഡലങ്ങളിലും എല്ഡിഎഫിനെ പിന്തുണയ്ക്കണമെന്ന് കോഴിക്കോട് വച്ച് നടന്ന യോഗത്തിലാണ് തീരുമാനമെടുത്തത്.നേരത്തെ നമ്മളെ സഹായിച്ചതിനാലും ഇപ്പോഴും സഹായിക്കുന്നതിനാലും എല്ഡിഎഫിന് വോട്ട് ചെയ്യണമെന്നാണ് പുറത്തുവിട്ട വീഡിയോയില് പറയുന്നത്.
ഭരിക്കുന്ന മുന്നണി ചെയ്തു നല്കിയ കാര്യങ്ങള് എണ്ണിപ്പറഞ്ഞാണ് എല്ഡിഎഫിന് വോട്ട് ചെയ്യാനുളള ആഹ്വാനം.മുസ്ലീം ലീഗ്, മുജാഹിദ് വിഭാഗത്തെ വഴിവിട്ട് സഹായിക്കുന്നു എന്ന് ആരോപിച്ചാണ് എപി വിഭാഗം സമസ്തയുമായും ലീഗുമായും അകലുന്നത്. സമസ്തയുടെ നൂറാം വാര്ഷികവുമായി ബന്ധപ്പെട്ടുകൊണ്ട് ഇരുവിഭാഗവും ജമാഅത്തെ ഇസ്ലാമിയുമായി ഒരു ബന്ധവും വച്ചു പുലര്ത്തില്ലെന്ന് കാണിച്ച് പ്രമേയം അവതരിപ്പിച്ചിരുന്നു.എന്നാല് ഇതിനെ പൂര്ണമായും അവഗണിച്ചാണ് യുഡിഎഫ് ജമാഅത്തെ ഇസ്ലാമിയുടെ പിന്തുണ സ്വീകരിക്കുമെന്ന് വെളിപ്പെടുത്തിയത്.
