പാലക്കാട് : മമ്മൂട്ടി ഉറ്റസുഹൃത്താണെന്ന് സ്ഥാപിക്കാന്‍ ശ്രമിച്ച രമേഷ് പിഷാരടിയ്‌ക്ക് വേണ്ടി താരങ്ങള്‍ ആരും കാര്യമായി വന്നില്ല. രമേഷ് പിഷാരടിയുടെ ഉറ്റസുഹൃത്തായി കണക്കപ്പെടുന്നത് നടി മഞ്ജുവാര്യരെയാണ്. പക്ഷെ മഞ്ജുവാര്യര്‍ ഇതെല്ലാം മുന്‍കൂട്ടി അറിഞ്ഞിട്ടാണോ എന്നറിയില്ല, നേരത്തെ തന്നെ ഇന്ത്യയ്‌ക്ക് പുറത്താണ്. കക്ഷി രാഷ്‌ട്രീയത്തിന് തലവെച്ച് കൊടുത്ത് ബലിയാടാവാന്‍ മഞ്ജു വാര്യര്‍ തയ്യാറല്ല.
മഞ്ജുവാര്യരെപ്പോലും മണ്ഡലത്തില്‍ ഇറക്കാന്‍ കഴിയാത്ത പിഷരാടിയാണോ ഇനി മമ്മൂട്ടിയെ പാലക്കാട് കൊണ്ടുവരുന്നത്? എന്ന ചോദ്യമുയര്‍ത്തി വലിയ പരിഹാസമാണ് പിഷാരടിയ്‌ക്കെതിരെ ഉയരുന്നത്. തുടക്കം മുതലേ മമ്മൂട്ടിയുടെ പേര് ഉയര്‍ത്തുന്നതിന് പിന്നില്‍ പിഷാരടിയ്‌ക്ക് വ്യക്തമായ ലക്ഷ്യമുണ്ടായിരുന്നു. ന്യൂനപക്ഷവോട്ടുകള്‍. പക്ഷെ എല്‍ഡിഎഫ് സ്ഥാനാര്‍ത്ഥിയായി എന്‍എംആര്‍ റസാഖ് എന്ന പാലക്കാട്ടെ ഹോട്ടലുടമ എത്തിയതോടെ പിഷാരടിയുടെ ആ ഗൂഢലക്ഷ്യം പൊളിഞ്ഞു. ഇതോടെ കോണ്‍ഗ്രസ് നേതാവ് ഷാഫി പറമ്പില്‍ എപ്പോഴും പാലക്കാട് പിടിക്കാന്‍ ഉപയോഗിക്കുന്ന അതേ വര്‍ഗ്ഗീയക്കാര്‍ഡ് വീശുകയാണ്. എല്‍ഡിഎഫ് സ്ഥാനാര്‍ത്ഥിയായ റസാഖിന് പോകുന്ന ഓരോ വോട്ടും ബിജെപി ജയിക്കുന്നതിന് അനുകൂലമാകുമെന്ന രീതിയിലുള്ള പ്രചാരണമാണ് ഷാഫി പറമ്പില്‍ നടത്തുന്നത്.
എന്തായാലും പാലക്കാട് വന്‍താരനിര അണിനിരക്കും എന്ന കരുതിയവര്‍ക്കൊക്കെ തെറ്റി. ആകെ വന്നത് നാദിര്‍ഷയും മറ്റ് ചില ചെറിയ താരങ്ങളുമാണ്. ഇതോടെ സിനിമാരംഗത്തെ വലിയവര്‍ സുഹൃത്തുക്കളാണെന്ന പിഷാരടിയുടെ ജാഡയാണ് തകര്‍ന്നത്.
പാലക്കാട് ശോഭാ സുരേന്ദ്രന്‍ ജയിക്കുമെന്ന പ്രവചനങ്ങള്‍ ശക്തമാവുകയാണ്. ബിജെപി വിരുദ്ധ അജണ്ടയുള്ള മനോരമ പോലും പാലക്കാട് ശോഭ സുരേന്ദ്രനെ വിട്ടുകളയുന്നില്ല. രാഹുല്‍ മാങ്കൂട്ടത്തിലിന്റെ സ്ത്രീപീഢനവിഷയങ്ങള്‍, മോദിയുടെ സന്ദര്‍ശനം, രാഷ്‌ട്രീയമുന്‍പരിചയമില്ലാത്ത പിഷാരടിയുടെ സാന്നിധ്യം, ബിജെപിയ്‌ക്കുള്ളിലെ മുഴുവന്‍ പേരെയും ഒറ്റക്കെട്ടായി അണിനിരത്താന്‍ കഴിഞ്ഞത് – ഇങ്ങിനെ ശോഭ സുരേന്ദ്രന്റെ വിജയസാധ്യതയ്‌ക്ക് ഘടകങ്ങള്‍ ഒട്ടേറെ.
