തിരുവനന്തപുരം : നേമം മണ്ഡലത്തില് വി. ശിവന്കുട്ടി വമ്പന് മാര്ജിനില് തോല്ക്കുമെന്ന് തിരുവനന്തപുരം കോര്പറേഷന് മേയര് വി.വി. രാജേഷ് പറഞ്ഞു.കെ.എസ്. ശബരീനാഥന് മത്സരിക്കുന്നത് ബിജെപിക്കു ഗുണം ചെയ്യും.
ശ്രീലേഖയ്ക്ക് വട്ടിയൂര്ക്കാവ് സീറ്റ് നല്കിയത് ഒത്തുതീര്പ്പ് ഫോര്മുല പ്രകാരമല്ല. അങ്ങനെ ഒത്തുതീര്പ്പ് ഫോര്മുല ഉണ്ടാക്കുന്ന പാര്ട്ടിയല്ല ബിജെപിയെന്ന് രാജേഷ് വ്യക്തമാക്കി.കഴക്കൂട്ടത്ത് വി. മുരളീധരന് 2016ല് ഏഴായിരത്തിനകം വോട്ടിനാണ് പരാജയപ്പെട്ടത്.ഇപ്പോള് ആ സാഹചര്യമല്ല ഉളളത്.അവിടെ മുരളീധരന് വിജയിക്കും. 2011 മുതല് കാട്ടാക്കടയില് സജീവമായ പി.കെ. കൃഷ്ണദാസ് ഇത്തവണ വിജയിക്കും.
ബിജെപിക്ക് ഇതുവരെ കടന്നുച്ചെല്ലാന് സാധിക്കാതിരുന്ന പല മേഖലകളില് രാജീവ് ചന്ദ്രശേഖര് അധ്യക്ഷനായ ശേഷം എത്തിപ്പെടാനായി. പാര്ട്ടി കുറച്ചുകൂടി പ്രഫഷനലായി. മോദിയെ കാണാന് കൗണ്സിലര്മാര്ക്കൊപ്പം പോയത് ജീവിതത്തിലെ അവിസ്മരണീയ നിമിഷമാണ്. തുടക്കം മുതല് ഇന്നു വരെയുള്ള അനുഭവങ്ങള് അദ്ദേഹം ഞങ്ങളോടു പരമാവധി പങ്കുവച്ചു. അതില്നിന്ന് പഠിക്കാന് ധാരാളമുണ്ട്.
പ്രധാനമന്ത്രിയുടെ ഓഫിസുമായി നിരന്തരം ബന്ധപ്പെടുന്നുണ്ട്. അതനുസരിച്ച് കേന്ദ്ര സര്ക്കാരിന്റെ ഇടപെടല് തിരുവനന്തപുരത്തുണ്ടാകും. നഗരത്തില് ബിജെപി എംഎല്എമാര് ഉണ്ടായാല് കോര്പറേഷനു കൂടുതല് കാര്യങ്ങള് ചെയ്യാന് പറ്റുമെന്നും രാജേഷ് പറഞ്ഞു.
