മാഹി: വികസിത ഭാരതം കര്‍മ്മപദ്ധതി നടപ്പിലാക്കുന്ന കേന്ദ്രവും അതേ പാത പിന്തുടരുന്ന സംസ്ഥാനവും ഭരിക്കുന്ന എന്‍.ഡി.എയുടെ പ്രതിനിധി തന്നെ മാഹിയില്‍ ജയിക്കേണ്ടത് മയ്യഴിയുടെ സമഗ്രമായ വികസനത്തിന് അനിവാര്യമാണെന്ന് ബിജെപി കേരള സംസ്ഥാന വൈസ് പ്രസിഡന്റ് സി. സദാനന്ദന്‍ മാസ്റ്റര്‍ എംപി മാഹിയില്‍ വാര്‍ത്താ സമ്മേളനത്തില്‍ പറഞ്ഞു.
എന്തുകൊണ്ട് മാഹിയില്‍ ഒരു എന്‍ഡിഎ ജനപ്രതിനിധി എന്ന ചോദ്യത്തിനുത്തരമാണിത്. ഒരു ട്രിപ്പിള്‍ എഞ്ചിന്‍ എന്ന പോലെയാണ് കേന്ദ്രവും സംസ്ഥാനവും മാഹിയിലെ എന്‍ഡിഎ പ്രതിനിധിയും പ്രവര്‍ത്തിക്കുക. മാഹി മണ്ഡലം എന്‍ഡിഎ സ്ഥാനാര്‍ഥി എ. ദിനേശന്റെ തെരഞ്ഞെടുപ്പ് പ്രചരണത്തിനായി മാഹിയിലെത്തിയതായിരുന്നു അദ്ദേഹം.
പതിറ്റാണ്ടുകളോളം മാഹിയില്‍ ജനപ്രതിനിധികളായവര്‍ക്ക് മയ്യഴിയുടെ വികസനത്തിനായി കാര്യമായി ഒന്നും ചെയ്യാനായിട്ടില്ല. മയ്യഴിയിലെ ജനങ്ങള്‍ക്ക് ഇവരെക്കൊണ്ട് പ്രയോജനമൊന്നുമുണ്ടായില്ലെന്ന് അദ്ദേഹം കുറ്റപ്പെടുത്തി. ദേശീയ തലത്തിലും സംസ്ഥാന തലത്തിലും ആവിഷ്‌കരിച്ച് നടപ്പിലാക്കുന്ന പദ്ധതികളുടെ പ്രയോജനം മയ്യഴിയിലെ ജനങ്ങള്‍ക്ക് ലഭ്യമാക്കാന്‍ മറ്റ് മുന്നണികളിലെ ജനപ്രതിനിധികള്‍ക്കായിട്ടില്ലെന്ന് ജനങ്ങള്‍ക്ക് ബോധ്യപ്പെട്ടിട്ടുണ്ട്. ഇത് മനസിലാക്കിയാണ് ജനങ്ങള്‍ വോട്ട് ചെയ്യേണ്ടത്.
പാര്‍ട്ടി അംഗമായ വ്യക്തി സ്വതന്ത്ര സ്ഥാനാര്‍ഥി കുപ്പായമണിയുകയെന്ന ആത്മവഞ്ചനയാണ് മാഹിയില്‍ നാം കാണുന്നത്. ഇന്ത്യ മുന്നണിയുടെ ഭാഗമായ കോണ്‍ഗ്രസും സിപിഎമ്മും മുസ്ലീം ലീഗും പരസ്പരം മത്സരിക്കുകയെന്ന കാപട്യവും മാഹിയില്‍ നമ്മള്‍ കാണുകയാണെന്നും അദ്ദേഹം പറഞ്ഞു. മയ്യഴിയില്‍ അടുത്ത കാലത്തുണ്ടായ വന്‍ തോതിലുള്ള വികസന പൂര്‍ത്തീകരണത്തിന് എന്‍ഡിഎ ഭരണവും ജനപ്രതിധിയും ആവശ്യമാണെന്ന് സദാനന്ദന്‍ മാസ്റ്റര്‍ പറഞ്ഞു.
