കോഴിക്കോട്: വനിതാശാക്തീകരണത്തില് ബിജെപിയും നരേന്ദ്ര മോദി സര്ക്കാറുമാണ് ആത്മാര്ത്ഥമായി പരിശ്രമിച്ചതെന്ന് തെന്നിന്ത്യന് സിനിമാതാരവും ബിജെപി തമിഴ്നാട് സംസ്ഥാന ഉപാദ്ധ്യക്ഷയുമായ ഖുശ്ബു.
കേരളത്തില് വനിതാ മുഖ്യമന്ത്രി വേണമെന്നാണ് ആഗ്രഹിക്കുന്നതെന്ന് രാഹുല് ഗാന്ധിയുടെ പ്രസ്താവനയോട് പ്രതികരിക്കുകയായിരുന്നു അവര്. രാഹുല് ഗാന്ധിയുടെ അഭിപ്രായങ്ങളെ ഗൗരവമായി എടുക്കേണ്ടതില്ല. തെരഞ്ഞെടുപ്പ് കാലത്തെ തട്ടിപ്പ് മാത്രമാണത്. കേരളത്തില് ശക്തരായ വനിതാ സ്ഥാനാര്ത്ഥികളെ മത്സരിപ്പിക്കുന്നത് ബിജെപി മാത്രമാണ്. സ്ത്രീശാക്തീകരണം എന്താണെന്ന് തെളിയിച്ചത് നരേന്ദ്ര മോദി സര്ക്കാരാണ്. അദ്ദേഹം നാരീശക്തിയുടെ പ്രാധാന്യത്തെക്കുറിച്ച് എപ്പോഴും ഓര്മിപ്പിക്കുന്നു. രാജ്യത്തിന്റെ ഭരണസിരാകേന്ദ്രങ്ങളില് സ്ത്രീകള്ക്ക് അര്ഹമായ പങ്കാളിത്തം ലഭിക്കുന്നു. ഓപ്പറേഷന് സിന്ദൂര് മുതല് കേന്ദ്രമന്ത്രിസഭയിലെ പ്രമുഖരായ അംഗങ്ങള് വരെ വനിതകളുടെ വന് പങ്കാളിത്തമാണ് ഇപ്പോഴുള്ളത്. സുഷമാ സ്വരാജ് മുതല് നിര്മല സീതാരാമന് വരെയുള്ള നിരവധി പേര് ഇതിന് തെളിവാണ്.
33 ശതമാനം സ്ത്രീസംവരണത്തിന് വേണ്ടി ബിജെപി ഏറെക്കാലമായി വാദിക്കുന്നു. അത് യാഥാര്ത്ഥ്യത്തോടടുക്കുന്നു. മുസ്ലിം വനിതകളുടെ താത്പര്യങ്ങളും സംരക്ഷിച്ചത് മോദി സര്ക്കാറാണ്. മുത്തലാഖ് നിര്ത്തലാക്കിയതിലൂടെ സ്ത്രീവിവേചനം ഇല്ലാതാക്കാന് കഴിയുന്നു. കോണ്ഗ്രസ് ഭരണകാലത്ത് നിരന്തരമായി ഉണ്ടായത് അഴിമതി മാത്രമാണ്. 12 വര്ഷമായി ഭരണരംഗത്ത് അഴിമതി ചൂണ്ടിക്കാണിക്കാനില്ല. സംശുദ്ധ ഭരണത്തിന് നേതൃത്വം കൊടുക്കുന്ന നരേന്ദ്ര മോദി ലോകനേതാവായി മാറി. രാഹുല് ഗാന്ധി ഇക്കാര്യങ്ങളൊന്നും മനസിലാക്കുന്നില്ല, അവര് പറഞ്ഞു. കോഴിക്കോട് നോര്ത്ത് മണ്ഡലം എന്ഡിഎ സ്ഥാനാര്ത്ഥി നവ്യ ഹരിദാസിന്റെ തെരഞ്ഞെടുപ്പ് പ്രചാരണത്തിന്റെ ഭാഗമായുള്ള റോഡ് ഷോയില് പങ്കെടുക്കാനെത്തിയതായിരുന്നു ഖുശ്ബു.
