പാലക്കാട്: പതിറ്റാണ്ടുകളായി കേരളം രണ്ട് രാഷ്‌ട്രീയ പാര്‍ട്ടികളുടെ വഞ്ചനയില്‍പെട്ട് കിടക്കുകയാണെന്ന് പ്രധാനമന്ത്രി നരേന്ദ്രമോദി. എല്‍ഡിഎഫിന്റെയും യുഡിഎഫിന്റെയും എല്ലാ നയങ്ങളും വോട്ട് ബാങ്ക് രാഷ്‌ട്രീയമാണ്.കേരളത്തിന്റെ വികസനത്തെപ്പറ്റി അവര്‍ ചിന്തിക്കുന്നില്ല.എന്‍ ഡി എ സര്‍ക്കാര്‍ വികസിത കേരളം സൃഷ്ടിക്കുമെന്നത് മോദിയുടെ ഗ്യാരന്റിയാണ്. മാറാത്തത് ഇനി മാറും, കേരളം വളരും. യുഡിഎഫും എല്‍ഡിഎഫും ഒത്തുചേര്‍ന്ന് കേരളത്തെ കൊള്ളയടിച്ചു. കേരളം ഈ വിചിത്ര സഖ്യത്തില്‍ കുടുങ്ങി കിടന്നു
പാലക്കാട് കോട്ട മൈതാനിയില്‍ ബിജെപി തെരഞ്ഞെടുപ്പ് പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം. കല്‍പാത്തി വിശാലാക്ഷി സമേത വിശ്വനാഥ സ്വാമിക്ക് പ്രണാമം അര്‍പ്പിച്ച് കൊണ്ടാണ് മോദി തന്റെ പ്രസംഗം ആരംഭിച്ചത്.
കോണ്‍ഗ്രസ് ബിജെപിയുടെ ബി ടീമാണെന്ന് സിപിഎം പറയുന്നു. സിപിഎം ബിജെപിയുടെ ബി ടീമാണെന്ന് കോണ്‍ഗ്രസും പറയുന്നു. ഈ തെരഞ്ഞെടുപ്പില്‍ എ ടീമായി ഉളളത് ബിജെപി മാത്രമാണെന്ന് രണ്ട് കൂട്ടരും സമ്മതിച്ചിട്ടുണ്ട്. ഇത്തവണ കേരളം മാറ്റത്തിന്റെ സന്ദേശം നല്‍കുമെന്ന് പ്രധാനമന്ത്രി പറഞ്ഞു.
എല്‍ഡിഎഫും യുഡിഎഫും ബിജെപിയെ ഉന്നം ലക്ഷ്യമിടുകയാണ്.ഇവര്‍ ആരെയെങ്കിലും ഭയക്കുന്നുണ്ടെങ്കില്‍ അത് ബിജെപിയെ മാത്രമാണ്. കേരളത്തില്‍ ബിജെപി സര്‍ക്കാര്‍ ഉണ്ടായാല്‍ ഇവരുടെ അഴിമതികള്‍ പുറത്തുക്കൊണ്ടു വരും. ബിജെപി അധികാരത്തില്‍ വന്നാല്‍ എല്‍ഡിഎഫിന്റെയും യുഡിഎഫിന്റെയും സര്‍വ കുംഭകോണങ്ങളെപ്പറ്റിയും അന്വേഷിക്കും.
കേരളത്തിലെ യുവാക്കളുടെ വിശ്വാസവും സ്ത്രീകളുടെ സ്‌നേഹവും ബിജെപിയോടും എന്‍ഡിഎയോടും ആണ്.ഇവിടെ തടിച്ച് കൂടിയ ജനക്കൂട്ടം ഇതിന് തെളിവാണ്. ഈ മാറ്റത്തിനു പിന്നില്‍ കേരളത്തിലെ ജനങ്ങളുടെ അനുഗ്രഹമാണ്. നമ്മുടെ എത്രയോ പ്രവര്‍ത്തകര്‍ രാഷ്‌ട്രീയ ആക്രമണങ്ങളില്‍ ജീവന്‍ ബലി അര്‍പ്പിച്ചു. ആ പ്രവര്‍ത്തകര്‍ക്ക് പ്രണാമം അര്‍പ്പിക്കുന്നു. കേരളം സുന്ദരമാണെന്ന് പാലക്കാട് വരുമ്പോള്‍ മനസിലാകും. പാലക്കാട് പ്രകൃതിയുടെ അത്ഭുത കവാടമാണ്. കേരളത്തിന്റെ പ്രതിഭകളുടെ കേന്ദ്രമാണ് പാലക്കാട്. ഈ പാവന ഭൂമിയെ ഞാന്‍ നമസ്‌കരിക്കുന്നു. ശ്രീനാരായണ ഗുരു, ചട്ടമ്പി സ്വാമി, മന്നത്ത് പത്മനാഭന്‍, അയ്യങ്കാളി, കുര്യാക്കോസ് ഏലിയാസ് ചാവറ എന്നീ മഹാ തേജസ്വികള്‍ക്ക് പ്രണാമം അര്‍പ്പിക്കുന്നതായും പ്രധാനമന്ത്രി പറഞ്ഞു.
കഴിഞ്ഞ 10 വര്‍ഷത്തിനുള്ളില്‍ സംസ്ഥാന സര്‍ക്കാര്‍ യുവാക്കള്‍ക്ക് തൊഴില്‍ നല്‍കുന്ന രീതിയിലുള്ള ഒരു സ്ഥാപനം പോലും തുടങ്ങിയില്ല. കോണ്‍ഗ്രസും ഇടതും എവിടെയൊക്കെ അധികാരത്തില്‍ വന്നിട്ടുണ്ടോ അവിടെയെല്ലാം നശിപ്പിച്ചിട്ടേയുള്ളൂ. കേരളവും ഈ ചക്രവ്യൂഹത്തില്‍ പെട്ടുപോയി. കേരളത്തില്‍ സര്‍ക്കാര്‍ ജീവനക്കാരുടെ ശമ്പളം കൃത്യമായി കൊടുക്കുന്നില്ലെന്ന വാര്‍ത്ത വരുന്നു. പാലക്കാട് 22 വര്‍ഷം ഭരിച്ചത് ഇടത് എംഎല്‍എമാരായിരുന്നു. 5 പതിറ്റാണ്ട് കോണ്‍ഗ്രസ് എംഎല്‍എമാരും പ്രതിനിധീകരിച്ചു. എന്നിട്ടും ഈ മണ്ഡലം വികസിച്ചില്ല. കേന്ദ്രത്തില്‍ ബിജെപി വന്ന ശേഷമാണ് പാലക്കാട്ടിനു വികസനമുണ്ടായി തുടങ്ങിയത്.എന്‍ ഡി എയുടെ ഗാരണ്ടി എല്ലാ യുവജനങ്ങള്‍ക്കും അവരുടെ കഴിവിനനുസരിച്ച് അവസരം ഇവിടെ തന്നെ നല്‍കുക എന്നാണ്.
കേരളത്തില്‍ ടീം എന്‍ഡിഎ, സര്‍ക്കാര്‍ ഉണ്ടാക്കുന്ന മത്സരത്തില്‍ മൈതാനത്ത് ഇറങ്ങിയിരിക്കുകയാണ്. സര്‍ക്കാര്‍ ഉണ്ടാക്കുക തന്നെ ചെയ്യും. കേരളത്തിന് ആവശ്യമായ എല്ലാ കാര്യങ്ങളും ഞങ്ങള്‍ ചെയ്യും. ഇന്ന് കേരളം അഞ്ച് ലക്ഷം കോടിയിലധികം രൂപ കടം കയറിയ നിലയിലാണ്. കേരളത്തിന് അവകാശപ്പെട്ട പണം എവിടെ പോയി ? ഇതിനൊരു ഒറ്റ ഉത്തരമേയുള്ളൂ. എല്‍ഡിഎഫുകാരുടെ കീശയില്‍ പോയി.
ശോഭാ സുരേന്ദ്രനെ പേരെടുത്ത് പറഞ്ഞ് വന്‍ ഭൂരിപക്ഷത്തില്‍ വിജയിപ്പിക്കണമെന്ന് മോദി പറഞ്ഞു. 12 മണ്ഡലങ്ങളിലെയും സ്ഥാനാര്‍ത്ഥികളെ മോദി വേദിയില്‍ അണിനിരത്തി വോട്ടഭ്യര്‍ത്ഥിച്ചു.
