ന്യൂദല്ഹി: ഇന്ത്യന് പേയ്മെന്റ് സിസ്റ്റത്തെ ആധുനികവല്ക്കരിക്കുന്നതിന്റെ ഭാഗമായി ഇലക്ട്രോണിക് ചെക്കുകള് പുറത്തിറക്കാനൊരുങ്ങി ആര്.ബി.ഐ. പഴയ പേപ്പര് ചെക്കുകളുടെ സ്ഥാനത്താണ് ആര്.ബി.ഐ ഇ-ചെക്കുകളും ഇറക്കാന് ഒരുങ്ങുന്നത്.
പഴയ ചെക്കുകളുടെ വിശ്വാസ്യതക്കൊപ്പം കൂടുതല് കാര്യക്ഷമതയും വേഗതയും സുരക്ഷയും ഇ-ചെക്കില് ഉറപ്പാക്കാന് കഴിയുമെന്നാണ് ആര്.ബി.ഐ പറയുന്നത്. തട്ടിപ്പുകള് തടയുന്ന രീതിയിലാവും പുതിയ ഇ-ചെക്കുകള് പുറത്തിറക്കുകയെന്നും ആര്.ബി.ഐ വ്യക്തമാക്കി.
ആര്.ബി.ഐയുടെ പേയ്മെന്റ് വിഷന് 2028 റിപ്പോര്ട്ടിലാണ് ഇതുസംബന്ധിച്ച പരാമര്ശമുള്ളത്. പേപ്പര് ചെക്കിന്റെ ഡിജിറ്റല് വേര്ഷനാണ് പുതിയ സംവിധാനം. ഡിജിറ്റലായി ചെക്ക് പൂരിപ്പിച്ച് ഒപ്പിട്ട് ഓണ്ലൈനായി അയക്കാന് സാധിക്കും. സാധാരണ ചെക്ക് പരിശോധിക്കുന്നത് പോലെ തന്നെ ഇതും പരിശോധിച്ച് ബാങ്ക് തുടര്നടപടികള് സ്വീകരിക്കും.
മറ്റ് പേയ്മെന്റ് രീതികളെ അപേക്ഷിച്ച് ചെക്കുകള് സവിശേഷമായ ചില നേട്ടങ്ങള് വാഗ്ദാനം ചെയ്യുന്നുണ്ട്. 2010-ല് നിലവില് വന്ന സി.ടി.എസ്-2010 മാനദണ്ഡങ്ങള്ക്ക് പുറമെ, ബാങ്കുകള് സ്വന്തം നിലയില് കൂടുതല് സുരക്ഷാ ഫീച്ചറുകള് ഉള്പ്പെടുത്തിയത് ഈ സംവിധാനത്തില് മാറ്റങ്ങള്ക്ക് കാരണമായിട്ടുണ്ടെന്ന് ആര്.ബി.ഐയുടെ പേയ്മെന്റ് സിസ്റ്റം റിപ്പോര്ട്ട് വ്യക്തമാക്കുന്നു. കൂടാതെ, അതിര്ത്തി കടന്നുള്ള പണമിടപാടുകളുടെ കാര്യക്ഷമത വര്ദ്ധിപ്പിക്കുന്നതിനായി നിലവിലുള്ള ചട്ടക്കൂടുകള് പുനഃപരിശോധിക്കുമെന്നും, ഇതിന്റെ ഭാഗമായി പ്രത്യേക റിപ്പോര്ട്ടുകള് പ്രസിദ്ധീകരിക്കുമെന്നും ആര്.ബി.ഐ അറിയിച്ചു.
കൂടാതെ, ബിസിനസ്സ് എളുപ്പമാക്കുന്നതിനും സൗകര്യം വര്ദ്ധിപ്പിക്കുന്നതിനുമായി, പി.എസ്.എസ് ആക്ട് (PSS Act, 2007), ഫെമ (FEMA, 1999) എന്നിവ പ്രകാരമുള്ള അതിര്ത്തി കടന്നുള്ള പണമിടപാട് അനുമതി നടപടികള് ലഘൂകരിക്കും. ഒപ്പം ചെറുകിട പേയ്മെന്റ് സേവന ദാതാക്കളെ (Small Payment System Providers) ഒരു പെര്പെച്വല് റെഗുലേറ്ററി സാന്ഡ്ബോക്സ് ഘടനയ്ക്ക് കീഴില് അംഗീകരിക്കുന്ന കാര്യം പരിശോധിക്കും. പേയ്മെന്റ് സ്വിച്ചിംഗ് സര്വീസ് (PaSS) നടപ്പിലാക്കുന്നതിലൂടെ ഉപഭോക്താക്കള്ക്ക് തടസ്സങ്ങളില്ലാതെ ഒരു പേയ്മെന്റ് സേവന ദാതാവില് നിന്ന് മറ്റൊന്നിലേക്ക് മാറാനുള്ള സൗകര്യം നല്കുന്ന കാര്യവും പരിഗണനയിലാണ്. ഡിജിറ്റല് പേയ്മെന്റുകള് സുഗമമാക്കുന്നതില് നിര്ണ്ണായക പങ്ക് വഹിക്കുന്ന സ്ഥാപനങ്ങളെ വ്യവസ്ഥാപിത സുരക്ഷിതത്വത്തിനായി നിയന്ത്രണ പരിധിയില് കൊണ്ടുവരുമെന്നും റിപ്പോര്ട്ട് വ്യക്തമാക്കുന്നു.’
