തിരുവനന്തപുരം: വലിയവിള വാര്‍ഡിലെ ഹിന്ദു ഏകതാ സമ്മേളനം കുണ്ടമണ്‍ ഭാഗം ദേവീക്ഷേത്ര മൈതാനിയില്‍ നടന്നു. വലിയവിള ജംഗ്ഷനില്‍ നിന്നും സാംസ്‌കാരിക ഘോഷയാത്ര സംഘടിപ്പിച്ചു. ചെങ്കല്‍ ശിവപാര്‍വ്വതി ക്ഷേത്ര മഠാധിപതി സ്വാമി മഹേശ്വരാനന്ദ സരസ്വതി ഭദ്രദീപം കൊളുത്തി ഉദ്ഘാടനം ചെയ്തു.
ആര്‍എസ്എസ് സംസ്ഥാന ബൗദിക് പ്രമുഖ് ടി. ജി. ഉണ്ണികൃഷ്ണന്‍ മുഖ്യ പ്രഭാഷണം നടത്തി. എസ്. ടി പെരുമാള്‍ അധ്യക്ഷനായി. എന്‍എസ്എസ് കരയോഗം സെക്രട്ടറി റ്റി. പി. സതീഷ് ബാബു, കെപിഎംഎസ് ഭാരവാഹി ബാബു, കുണ്ടമണ്‍ ഭാഗം ദേവി ക്ഷേത്ര പ്രസിഡന്റ് എം. ശ്രീകുമാരന്‍ നായര്‍, സെക്രട്ടറി യോഗേഷ്, ജനറല്‍ കണ്‍വീനര്‍ എസ്. രാധാകൃഷ്ണന്‍ നായര്‍ തുടങ്ങിയവര്‍ സംസാരിച്ചു.
3000 വര്‍ഷം പഴക്കമുള്ള നാണയങ്ങള്‍, താളിയോല ഗ്രന്ഥങ്ങള്‍, പുരാതന എഴുത്ത് സാമഗ്രികള്‍, നാരായം, വിവിധ ഗ്യാലണ്ടറി അവാര്‍ഡുകള്‍, സൈനികര്‍ക്ക് നല്‍കുന്ന മെഡലുകള്‍ തുടങ്ങിയവയുടെ പ്രദര്‍ശനവും നടന്നു. ചടങ്ങില്‍ 30 ലധികം വിശിഷ്ട വ്യക്തികള്‍ക്ക് പുരസ്‌കാരങ്ങള്‍ നല്‍കി ആദരിച്ചു.
ആറ്റിങ്ങല്‍: അഞ്ചുതെങ്ങ് നെടുങ്ങണ്ടയില്‍ ഹിന്ദു ഏകതാ സമ്മേളനം സംഘടിപ്പിച്ചു. സമ്മേളനത്തിന്റെ ഉദ്ഘാടനം വര്‍ക്കല ബ്രഹ്മ കുമാരീസ് രേഷ്മ നിര്‍വ്വഹിച്ചു. റിട്ട. അധ്യാപകന്‍ ബൈജു ജി. എസ്. അധ്യക്ഷനായി. ആര്‍എസ്എസ് ജില്ലാ ബൗദ്ധിക് ശിക്ഷണ്‍ പ്രമുഖ് സുഖീന്ദ്രന്‍ മുഖ്യ പ്രഭാഷണം നടത്തി. കുടുംബശ്രീ റിസോഴ്‌സ് പേഴ്‌സണ്‍ ലെജുമോള്‍ കുടുംബശ്രീയും നൂതന സംരംഭങ്ങളും എന്ന വിഷയത്തില്‍ സെമിനാറിന് നേതൃത്വം നല്‍കി. ജ്യോതി റെനീഷ്, നിധിന്‍ .ആര്‍ വിഷയാവതരണം നടത്തി. തുടര്‍ന്ന് വിവിധ മേഖലകളില്‍ വ്യക്തിമുദ്ര പതിപ്പിച്ച വ്യക്തിത്വങ്ങളെ ആദരിച്ചു. എസ്എന്‍ഡിപി യോഗം പ്രസിഡന്റ് വിഷ്ണു ആര്‍. പ്രസാദ്, ബിഎംഎസ് പ്രതിനിധി ബി. അനില്‍കുമാര്‍, ബിജെപി അഞ്ചുതെങ്ങ് പഞ്ചായത്ത് കമ്മറ്റി പ്രസിഡന്റ് അഞ്ചുതെങ്ങ് സജന്‍ എന്നിവര്‍ സംസാരിച്ചു.
കാട്ടാക്കട: പൂവച്ചല്‍ പഞ്ചായത്ത് ഹിന്ദു ഏകത സമ്മേളനം ചേന്നംകാട് മഹാദേവ ക്ഷേത്രമൈതാനത്തു നടന്നു. മാതാ കോളേജ് ഓഫ് മെഡിക്കല്‍ ടെക്‌നോളജി ചെയര്‍പേഴ്‌സണ്‍ ജിജി ജോസഫ് ഉദ്ഘാടനം ചെയ്തു. ആര്‍എസ്എസ് പ്രാന്ത കാര്യകാരി അംഗം വി. മഹേഷ് മുഖ്യ പ്രഭാഷണം നടത്തി.
എസ്എന്‍ഡിപി ആര്യനാട് താലൂക്ക് യൂണിയന്‍ പ്രസിഡന്റ് സുകുമാരന്‍ അധ്യക്ഷനായി. എന്‍എസ്എസ് കാട്ടാക്കട താലൂക്ക് യൂണിയന്‍ ഭരണ സമിതി അംഗം ജയകുമാര്‍, അഖില കേരളവിശ്വകര്‍മ്മ മഹാ സഭ താലൂക്ക് സെക്രട്ടറി സതീഷ്‌കുമാര്‍, ആള്‍ ഇന്ത്യ നാടാര്‍ അസോസിയേഷന്‍ പ്രതിനിധി കെ. സുകുമാരന്‍, കേരള യോഗീശ്വര സംഘം സംസ്ഥാന സെക്രട്ടറി പി. അശോക് കുമാര്‍, ആര്‍എസ്എസ് ഖണ്ട് സംഘ ചാലക് കുട്ടപ്പന്‍, സംഘടക സമിതി ജനറല്‍ കണ്‍വീനര്‍ കൊണ്ണിയൂര്‍ ഹരി, സംയോജക് ഗിരീഷ് കുമാര്‍, സെക്രട്ടറി അഡ്വ. ജിഷ്ണു, വാര്‍ഡ് മെമ്പര്‍ സുരേഷ് കുമാര്‍, രഞ്ജിത്ത് എന്നിവര്‍ സംസാരിച്ചു.
