ന്യൂദൽഹി: അമേരിക്ക, ഇസ്രായേൽ, ഇറാൻ എന്നീ രാജ്യങ്ങൾ തമ്മിലുള്ള സംഘർഷം രൂക്ഷമായതിനെത്തുടർന്ന് മിഡിൽ ഈസ്റ്റിലെ മിക്ക രാജ്യങ്ങളിലെയും വ്യോമാതിർത്തി അടച്ചതിനാൽ, കുടുങ്ങിക്കിടക്കുന്ന യാത്രക്കാരെ തിരിച്ചുകൊണ്ടുവരാൻ ഇന്ത്യൻ വിമാനക്കമ്പനികൾ ബുധനാഴ്ച 58 വിമാനങ്ങൾ സർവീസ് നടത്തി.
മാർച്ച് 4 ന് ആകെ 58 വിമാനങ്ങൾ ആസൂത്രണം ചെയ്തിരുന്നെന്ന് സിവിൽ ഏവിയേഷൻ മന്ത്രാലയം അറിയിച്ചു. ഇതിൽ ഇൻഡിഗോയുടെ 30 വിമാനങ്ങളും എയർ ഇന്ത്യയുടെയും എയർ ഇന്ത്യ എക്സ്പ്രസിന്റെയും 23 വിമാനങ്ങളും ഉൾപ്പെടുന്നു. ഇന്ത്യയ്‌ക്കും ഗൾഫ് മേഖലയ്‌ക്കും ഇടയിൽ പറക്കുന്ന വിദേശ വിമാനക്കമ്പനികളും വ്യോമാതിർത്തിയും പ്രവർത്തന സാഹചര്യങ്ങളും അനുസരിച്ച് പരിമിതമായ സർവീസുകൾ മാത്രമേ നടത്തുന്നുള്ളൂ.
അതേ സമയം തന്നെ ഇന്ത്യൻ വിമാനക്കമ്പനികൾ അവരുടെ ഷെഡ്യൂളുകളിൽ സന്തുലിതമായ മാറ്റങ്ങൾ വരുത്തിയിട്ടുണ്ടെന്ന് മന്ത്രാലയം അറിയിച്ചു. എന്നാൽ നിയന്ത്രിത വ്യോമാതിർത്തി ഒഴിവാക്കി ബദൽ റൂട്ടുകളിലൂടെ ദീർഘദൂര, അൾട്രാ ലോങ്ങ് വിമാനങ്ങൾ ക്രമേണ പുനരാരംഭിക്കുന്നുണ്ട്.
എയർ ഇന്ത്യ, ഇൻഡിഗോ, സ്‌പൈസ് ജെറ്റ്, ആകാശ എയർ എന്നിവ ദുബായ്, ഫുജൈറ തുടങ്ങിയ ഗൾഫ് നഗരങ്ങളിൽ നിന്ന് നിരവധി പ്രത്യേക വിമാന സർവീസുകൾ നടത്തുമെന്ന് റിപ്പോർട്ടുകൾ പറയുന്നു. ഈ വിമാനങ്ങൾ ന്യൂദൽഹി, മുംബൈ, ബെംഗളൂരു, കൊച്ചി, അഹമ്മദാബാദ്, തിരുവനന്തപുരം തുടങ്ങിയ ഇന്ത്യൻ വിമാനത്താവളങ്ങളിൽ ഇറങ്ങും.
എന്നിരുന്നാലും ബന്ധപ്പെട്ട വിമാനക്കമ്പനികളിൽ നിന്ന് സ്ഥിരീകരിച്ച പുറപ്പെടൽ സമയം ലഭിക്കുന്നതുവരെ ദുബായ് അന്താരാഷ്‌ട്ര വിമാനത്താവളത്തിലേക്കോ അൽ മക്തൂം അന്താരാഷ്‌ട്ര വിമാനത്താവളത്തിലേക്കോ യാത്ര ചെയ്യരുതെന്ന് അധികൃതർ യാത്രക്കാരോട് അഭ്യർത്ഥിച്ചു. ദുബായിയുടെ വ്യോമാതിർത്തി ഭാഗികമായിട്ടാണ് തുറന്നിരിക്കുന്നത്. കൂടാതെ കുറച്ച് വിമാനങ്ങൾക്ക് മാത്രമേ അനുമതിയുള്ളൂ. എമിറേറ്റ്‌സും ഇൻഡിഗോയും പരിമിതമായ വിമാനങ്ങൾ സർവീസ് നടത്തുകയും അവരുടെ വെബ്‌സൈറ്റുകളിൽ പതിവായി അപ്‌ഡേറ്റുകൾ നൽകുകയും ചെയ്യുന്നുണ്ട്.
അതേ സമയം തന്നെ അബുദാബിയിൽ നിന്നുള്ള ഷെഡ്യൂൾ ചെയ്ത വിമാനങ്ങൾ റദ്ദാക്കിയതായും മാർച്ച് 5 ന് പ്രാദേശിക സമയം ഉച്ചയ്‌ക്ക് 2 മണി വരെ പ്രവർത്തനങ്ങൾ നിർത്തിവച്ചിരിക്കുമെന്നും ഇത്തിഹാദ് എയർവേയ്‌സ് അറിയിച്ചു. എന്നിരുന്നാലും ചില ചരക്ക്, യാത്രാ വിമാനങ്ങൾ യുഎഇ അധികൃതരുമായി ഏകോപിപ്പിച്ച് പ്രവർത്തിച്ചേക്കാം. ഇപ്പോൾ ഇന്ത്യയ്‌ക്കും ഗൾഫ് മേഖലയ്‌ക്കും ഇടയിൽ വിമാന സർവീസുകൾ നടത്തുന്ന വിദേശ വിമാനക്കമ്പനികളും പ്രവർത്തന, വ്യോമാതിർത്തി സാഹചര്യങ്ങളെ ആശ്രയിച്ച് പരിമിതമായ സേവനങ്ങൾ മാത്രമേ വാഗ്ദാനം ചെയ്യുന്നുള്ളൂ.
യാത്രക്കാർക്കുള്ള ഇന്ത്യൻ സർക്കാരിന്റെ പ്രത്യേക ഉപദേശം
യാത്രക്കാരുടെ സുരക്ഷയാണ് ഏറ്റവും പ്രധാനം. എല്ലാ വിമാനക്കമ്പനികളും യാത്രക്കാരുമായി സുതാര്യമായ ആശയവിനിമയം നിലനിർത്താനും റീഫണ്ടുകൾ, പുനഃക്രമീകരണം, മറ്റ് സഹായങ്ങൾ എന്നിവ സംബന്ധിച്ച ചട്ടങ്ങൾ പാലിക്കുന്നുണ്ടെന്ന് ഉറപ്പാക്കാനും നിർദ്ദേശം നൽകിയിട്ടുണ്ട് എന്ന് സിവിൽ ഏവിയേഷൻ മന്ത്രാലയം പറഞ്ഞു. ഈ കാലയളവിൽ ടിക്കറ്റ് നിരക്കുകളിൽ അനാവശ്യമായ വർദ്ധനവ് ഉണ്ടാകാതിരിക്കാൻ വിമാനക്കമ്പനികളുമായി നിരന്തരം ബന്ധപ്പെടുകയും വിമാന നിരക്കുകൾ നിരീക്ഷിക്കുകയും ചെയ്യുന്നുണ്ടെന്നും മന്ത്രാലയം അറിയിച്ചു.
