കോട്ടയം: ആര്‍എസ്പി സംസ്ഥാന കമ്മിറ്റി അംഗം സജി ഡി ആനന്ദ് പാര്‍ട്ടിയില്‍ നിന്ന് രാജിവച്ചു.ഷിബു ബേബി ജോണിനോട് കലഹിച്ചാണ് സജി ഡി ആനന്ദ് പാര്‍ട്ടി വിട്ടത്.
എന്‍ കെ പ്രേമചന്ദ്രന് എംപിയുടെ മകന്‍ കാര്‍ത്തിക് പ്രേമചന്ദ്രന് ഇരവിപുരം സീറ്റ് നിഷേധിച്ചതിന് പിന്നാലെ ആര്‍എസ്പിയില്‍ കലഹം രൂക്ഷമായിരുന്നു.കാര്‍ത്തിക് പ്രേമചന്ദ്രന് എല്ലാ കമ്മിറ്റിയിലും ഭുരിപക്ഷമുണ്ടെന്നും അത് അംഗീകരിക്കാത്ത ഷിബു ബേബി ജോണ്‍ നേതാവ് അല്ലെന്നുമാണ് സജി ഡി ആനന്ദ് പറഞ്ഞത്.
പ്രേമചന്ദ്രന്റെ മകന്റെ അയോഗ്യത ജയിക്കും എന്നതാണ്. പ്രേമചന്ദ്രന്റെ മകന്‍ ജയിച്ചാല്‍ കുഴപ്പമാകുമെന്ന് ചിന്തിക്കുന്നവരാണ് അവര്‍.കാര്‍ത്തിക് ജയിച്ച് മന്ത്രിയായാല്‍ അധികാരമെല്ലാം ഒരു വീട്ടിലേക്ക് പോകും. പാര്‍ട്ടിയുടെ പിടിയും ആ വീട്ടിലേക്ക് പോകുമെന്ന ഭയമാണ്.
രണ്ട് തവണ പരാജയപ്പെട്ട ഷിബു ബേബി ജോണ്‍ മാറി നിന്ന് ചവറയില്‍ യുവാക്കളെ പരീക്ഷിച്ചാല്‍ ജയിക്കും. രാഷ്‌ട്രീയമില്ലാതെ പ്രവര്‍ത്തിച്ചാലും ആര്‍എസ്പിക്കാരനായി ഇനി പ്രവര്‍ത്തിക്കില്ലെന്നും സജി ഡി ആനന്ദ് പറഞ്ഞു.
ഷിബു ബേബി ജോണിന്റെ ശക്തമായ എതിര്‍പ്പാണ് കാര്‍ത്തിക് പ്രേമചന്ദ്രന് വിനയായത്.കാര്‍ത്തികിനെ സ്ഥാനാര്‍ത്ഥിയാക്കിയാല്‍ താന്‍ പാര്‍ട്ടി വിടുമെന്ന് ഷിബുബേബി ജോണ്‍ ഭീഷണി മുഴക്കിയിരുന്നു.
