കൊല്‍ക്കത്ത: വിജയത്തില്‍ കുറഞ്ഞ ഒന്നും മതിയാകാത്ത ഒരു പോരാട്ടത്തിനായി ഭാരതം വീണ്ടും. ട്വന്റി20 ലോകകപ്പ് സൂപ്പര്‍ 8ല്‍ നിന്നും മുന്നേറാന്‍ ഭാരത ടീമിന് ഇന്ന് വെസ്റ്റിന്‍ഡീസിനെതിരെ നടക്കുന്ന മത്സരത്തില്‍ കൂടി വിജയിച്ചേ മതിയാകൂ. വൈകീട്ട് ഏഴിന് കൊല്‍ക്കത്തയിലെ ഈഡന്‍ ഗാര്‍ഡന്‍ സ്റ്റേഡിയത്തിലാണ് മത്സരം.
സൂപ്പര്‍ 8 ഗ്രൂപ്പ് ഒന്നില്‍ ഭാരതം ഇപ്പോഴും മൂന്നാം സ്ഥാനത്താണ്. കളിച്ച രണ്ട് കളികളും ജയിച്ച ദക്ഷിണാഫ്രിക്ക സെമി ബെര്‍ത്ത് ഉറപ്പാക്കി. ഗ്രൂപ്പില്‍ നിന്നും മുന്നേറുന്ന രണ്ടാം ടീം ഏതെന്നറിയാന്‍ ഇന്നത്തെ മത്സരം നിര്‍ണായകമാണ്. ജയിക്കുന്നവര്‍ സെമിയിലെത്തും എന്ന സ്ഥിതിയിലാണ് മത്സരത്തിന്റെ ഘടന.
ഇന്നത്തെ രണ്ട് മത്സരങ്ങളും ഗ്രൂപ്പ് ഒന്നിലെ ടീമുകളുടേതാണ്. ആദ്യ മത്സരത്തിന്റെ ഫലം എന്തു തന്നെയായാലും രണ്ടാമത് നടക്കുന്ന ഭാരതം-വെസ്റ്റിന്‍ഡീസ് പോരാട്ടത്തെയും ഫലത്തെയും ബാധിക്കില്ല. വൈകീട്ട് മൂന്നിന് ദക്ഷിണാഫ്രിക്കയും സിംബാബ്‌വെയും തമ്മിലാണ് ആദ്യ പോരാട്ടം. സിംബാബ്‌വെ ജയിച്ചാല്‍ പോലും സെമി കാണില്ല. ഭാരതം-വെസ്റ്റിന്‍ഡീസ് പോരാട്ടത്തില്‍ ജയിക്കുന്നവര്‍ സെമിയിലെത്തുമെങ്കില്‍ മത്സരം ഏതെങ്കിലും കാരണത്താല്‍ നടക്കാതിരുന്ന് പോയിന്റ് പങ്കുവയ്‌ക്കേണ്ടിവന്നാല്‍ ഭാരതം പുറത്താകും. നിലവിലെ സ്ഥിതിയനുസരിച്ച് റണ്‍നിരക്കിന്റെ മുന്‍തൂക്കം വിന്‍ഡീസിനാണ്. അതിനാലാണ് ഭാരതത്തിനൊപ്പം രണ്ട് പോയിന്റുണ്ടായിട്ടും അവര്‍ രണ്ടാം സ്ഥാനത്ത് നില്‍ക്കുന്നത്.
ഭാരതത്തിന് മുമ്പ് സിംബാബ്‌വെയെ നേരിട്ട വിന്‍ഡീസ് 107 റണ്‍സിന് ജയിച്ചിരുന്നു. രണ്ടാം മത്സരത്തില്‍ ദക്ഷിണാഫ്രിക്കയോട് തോല്‍വി വഴങ്ങിയെങ്കിലും റണ്‍നിരക്കിനെ കാര്യമായി ബാധിച്ചില്ല. ഇത് രണ്ടും വിന്‍ഡീസിന് ഗുണം ചെയ്തു.
സിംബാബ്‌വെയ്‌ക്കെതിരായ കഴിഞ്ഞ മത്സരത്തിലെ വിജയത്തിലൂടെ ഭാരതത്തിന്റെ പ്രതീക്ഷ ഉയര്‍ന്നതിനൊപ്പം ബാറ്റര്‍മാര്‍ ഫോമിലേക്ക് ഉണര്‍ന്നിട്ടുണ്ട്. തുടര്‍ പരാജയമായിരുന്ന അഭിഷേക് ശര്‍മ വരെ അര്‍ദ്ധ സെഞ്ചുറി പ്രകടനം കാഴ്‌ച്ചവച്ചു. എന്നാല്‍ ഇന്നത്തെ എതിരാളികള്‍ സിംബാബ്‌വെയെ അപേക്ഷിച്ച് കുറേക്കൂടി കരുത്തരാണ്. സമ്മര്‍ദ്ദമേറിയ ഇന്നത്തെ നിര്‍ണായക ദിവസം സൂര്യകുമാറും യാദവും എങ്ങനെ അതിജീവിക്കുമെന്ന് കാത്തിരുന്നു കാണാം.
