തിരുവനന്തപുരം:ജലവിഭവ വകുപ്പിന്റെ പൊതുമേഖലാ സ്ഥാപനമായ കേരള ഇറിഗേഷന്‍ ഇന്‍ഫ്രാസ്‌ട്രെക്ചര്‍ ഡവലപ്‌മെന്റ് കോര്‍പറേഷന്‍ ബയോ ഡീഗ്രേഡബിള്‍ കുപ്പികളില്‍ ‘ഹില്ലി അക്വ’ കുടിവെള്ളം പുറത്തിറക്കി.തുടക്കത്തില്‍ 300 മില്ലി ലിറ്റര്‍ കുപ്പികളിലാണ് വെള്ളം പുറത്തിറക്കിയത്. ജലവിഭവ മന്ത്രി റോഷി അഗസ്റ്റിന്‍ വിതരണം ഉദ്ഘാടനം ചെയ്തു.
പ്ലാസ്റ്റിക് മാലിന്യം കുറയ്‌ക്കുന്നതിന് സര്‍ക്കാര്‍ ശ്രമം നടത്തിവരുമ്പോള്‍ ബയോ ഡീഗ്രേഡബിള്‍ കുപ്പികളില്‍ കുപ്പിവെള്ളം വിതരണം ചെയ്യുന്നത് ഹരിതപെരുമാറ്റച്ചട്ടം നിലവിലുള്ള വിനോദസഞ്ചാര കേന്ദ്രങ്ങളിലുള്‍പ്പെടെ സഹായകമാകുമെന്ന് മന്ത്രി പറഞ്ഞു.നിലവില്‍ തൊടുപുഴയില്‍നിന്നും അരുവിക്കരയില്‍നിന്നുമാണ് ഹില്ലി അക്വ കുപ്പിവെള്ളം പുറത്തിറക്കുന്നത്. കട്ടപ്പനയിലും ആലുവയിലും പ്ലാന്റുകള്‍ ഒരുമാസത്തിനുള്ളില്‍ പ്രവര്‍ത്തനസജ്ജമാകും.
മറ്റൊരു പ്ലാന്റ് പെരുവണ്ണാമൂഴിയില്‍ തുടങ്ങുന്നതിനുള്ള പ്രവര്‍ത്തനങ്ങളും നടന്നുവരുന്നുണ്ടെന്ന് മന്ത്രി പറഞ്ഞു. റേഷന്‍ കടകള്‍, കെഎസ്ആര്‍ടിസി, റെയില്‍വേ തുടങ്ങിയ സ്ഥാപനങ്ങളിലൂടെയും ഹില്ലി അക്വ കുപ്പിവെള്ളം വിതരണം ചെയ്യുന്നുണ്ട്. വിദേശരാജ്യങ്ങളിലേക്കു സര്‍ക്കാര്‍ ഉത്പന്നമായ കുപ്പിവെള്ളം കയറ്റി അയയ്‌ക്കുന്ന ആദ്യസംസ്ഥാനമായി കേരളം മാറിയെന്നും മന്ത്രി വെളിപ്പെടുത്തി.
