കോട്ടയം: പാലാ മുരിക്കുംപുഴയില് വീടു നിര്മ്മാണത്തിനെത്തിയ നെടുമങ്ങാട് സ്വദേശിയെ ചവുട്ടി കൊലപ്പെടുത്തിയ പ്രതി അറസ്റ്റില്.
നെടുമങ്ങാട് സ്വദേശി ഷാജി ( 57) കൊല്ലപ്പെട്ട സംഭവത്തില് പ്രതിയായ നെടുമങ്ങാട് പള്ളിച്ചല് അനില് ഭവനില് ശ്യാംകുമാര് ആണ് അറസ്റ്റിലായത്. ഷാജി അസഭ്യം പറഞ്ഞതിലും പാത്രം കൊണ്ട് നെറ്റിയില് ഇടിച്ചതുമാണ് കൊലപാതകത്തിന് പ്രേരണയായതെന്ന് പ്രതി പൊലീസിനോടു പറഞ്ഞു. ഇന്നലെ രാത്രി മുരിക്കുംപുഴ ഭാഗത്തുള്ള താമസസ്ഥലത്ത് വെച്ച് വഴക്കുണ്ടാക്കി പിരിഞ്ഞുപോയ പ്രതി രാത്രി തിരികെ ഷാജി താമസിച്ചിരുന്ന വാടക വീട്ടിലെത്തി തള്ളിയിടുകയും ഇടിച്ചും ചവിട്ടിയും കൊലപ്പെടുത്തുകയുമായിരുന്നെന്ന് പൊലീസ് പറയുന്നു. ശ്യാംകുമാറിനെ കോടതിയില് ഹാജരാക്കി റിമാന്റ് ചെയ്തു. മുരിക്കുംപുഴയില് വീടു നിര്മ്മാണത്തിനെത്തിയവര് തമ്മിലുള്ള വഴക്കില് ഇത് രണ്ടാമത്തെ കൊലപാതകമാണ്.
