കരുനാഗപ്പള്ളി: ശ്രീരാമന്റെ ജീവിതവും ദര്ശനവും ആസ്പദമാക്കി രണ്ട് ദിവസങ്ങളിലായി അമൃതപുരി കാമ്പസില് നടന്ന ‘രാമക്ഷേത്രം രാഷ്ട്രക്ഷേത്രം’ ജന്മഭൂമി അന്താരാഷ്ട്ര സെമിനാര് രാമന് ലോകത്തിന് നല്കുന്ന സന്ദേശം എന്തെന്ന് വ്യക്തമാക്കുന്നതായി. രാമന്റെ വനവാസവും സീതാന്വേഷണത്തിലും കേരളത്തിലുള്ള സാന്നിധ്യം വ്യക്തമാക്കുന്ന നിരവധി തെളിവുകള് ചൂണ്ടിക്കാട്ടിയാണ് സെമിനാര് സമാപിച്ചത്. ശ്രീരാമന് എന്ന ധര്മനിരതനായ കഥാപാത്രത്തിന്റെ ആദര്ശങ്ങളും ആധുനിക സമൂഹത്തില് അതിന്റെ പ്രസക്തിയും സംബന്ധിച്ചായിരുന്നു പ്രധാന ചര്ച്ചകള്. രാമായണത്തിന്റെ നൈതികപാഠങ്ങള്, കുടുംബമൂല്യങ്ങള്, ഭരണതത്ത്വങ്ങള് എന്നിവയെക്കുറിച്ച് പ്രബന്ധങ്ങള് അവതരിപ്പിച്ചു. പ്രത്യേകിച്ച് രാമായണം ആസ്പദമാക്കിയുള്ള പഠനങ്ങള് ശ്രദ്ധ നേടി. സെമിനാറില് പങ്കെടുത്ത പ്രമുഖര് രാമന്റെ ജീവിതം സമകാലീന സമൂഹത്തിന് മാതൃകയാണെന്ന് അഭിപ്രായപ്പെട്ടു. യുവതലമുറയ്ക്ക് ആത്മീയബോധവും ദേശീയബോധവും വളര്ത്തുന്നതില് ഇത്തരത്തിലുള്ള സെമിനാറുകള് നിര്ണായകമാണെന്നും അവര് പറഞ്ഞു.
രണ്ടാം ദിവസത്തെ സെമിനാറുകളില് കേരളത്തിന്റെ രാമന് എന്ന വിഷയത്തില് ഡോ. ഹരികൃഷ്ണന് വി.പി., രാമരാജ്യം മുന്നോട്ടു വയ്ക്കുന്ന പൗരധര്മം എന്ന വിഷയത്തില് കെ.കെ. വാമനന്, മലയാള സാഹിത്യത്തില് രാമന്റെ പ്രഭാവം എന്ന വിഷയത്തില് ഡോ. ലക്ഷ്മിദാസ്, രാമോ വിഗ്രഹവാന് ധര്മഃ എന്ന വിഷയത്തില് ബ്രഹ്മചാരി അച്യുതാമൃത ചൈതന്യ, രാമന്റെ കല്യാണഗുണങ്ങള് എന്ന വിഷയത്തില് ശങ്കരാമൃത സ്വാമികള് എന്നിവര് പ്രബന്ധങ്ങള് അവതരിപ്പിച്ചു. പിന്നീട് നടന്ന സെഷനില് രാമായണം: ഭാരതത്തിന്റെ ഭൂമിശാസ്ത്രത്തില് എന്ന വിഷയത്തില് ധ്യാനാമൃത സ്വാമികള്, അഗസ്ത്യന്: ഏകാത്മകതയുടെ പ്രഥമചാലകന് എന്ന വിഷയത്തില് ഡോ. വൈഭവ് ഭൂഷണ്, രാമായണവും ആയുര്വേദവും എന്ന വിഷയത്തില് ഡോ. ശ്രീജിത് കര്ത്ത എന്നിവരും പ്രബന്ധങ്ങള് അവതരിപ്പിച്ചു.
ആദ്യദിനത്തിലെ സെമിനാറില് ജടായു സ്ത്രീസുരക്ഷയുടെ കാവലാള് എന്ന വിഷയത്തില് സംവിധായകനും ശില്പിയുമായ രാജീവ് അഞ്ചല്, ഹനുമായനം എന്ന വിഷയത്തില് ബ്രഹ്മചാരി ശിവാനന്ദന്, ശ്രീരാമന്- സാംസ്കാരിക ഏകതയുടെ ആധാരം എന്ന വിഷയത്തില് ഡോ. രാം അവതര് ശര്മയും പേപ്പറുകള് അവതരിപ്പിച്ചിരുന്നു. ഡോ. ശ്യാം വിനയന്, ഡോ. ഹരിത ചന്ദ്രന്, ഡോ. കാദംബരി, ഡോ. ഡെല്വിന് ടി. റോബിന്, ഡോ. വിഷ്ണു. യു. എന്നിവര് വിവിധ സെഷനുകളില് മോഡറേറ്റര്മാരായി.
