ന്യൂദല്‍ഹി: സര്‍വ ശിക്ഷ അഭിയാനും ശിക്ഷാ കേരളവും സംയോജിപ്പിച്ചുള്ള സമഗ്ര ശിക്ഷ കേരളം പദ്ധതിക്ക് കേന്ദ്രം പണം നല്‍കിയെന്ന് ഇടത് അധ്യാപക സംഘടന കെഎസ്ടിഎ സുപ്രീം കോടതിയില്‍ ബോധിപ്പിച്ചു. എന്നാല്‍ കേന്ദ്രം പണം നല്‍കിയില്ലെന്നാണ് കേരള സര്‍ക്കാരിന്റെ വാദം. ഇതുമായി ബന്ധപ്പെട്ട കേസ് പരിഗണിക്കവേയാണ് ഇടതു സര്‍ക്കാരിന്റെ കള്ളം കോടതിയില്‍ പൊളിഞ്ഞത്.
പദ്ധതിയില്‍ കേരളത്തിന് അര്‍ഹതപ്പെട്ട പണം നല്‍കുമെന്ന് കേന്ദ്രം വാഗ്ദാനം ചെയ്തുവെങ്കിലും പാലിച്ചില്ലെന്ന് സര്‍ക്കാര്‍ പറഞ്ഞു. അങ്ങനെയെങ്കില്‍ ഇക്കാര്യം ചൂണ്ടിക്കാട്ടി സത്യവാങ്മൂലം നല്‍കാന്‍ കോടതി സര്‍ക്കാരിനോട് നിര്‍ദേശിച്ചു.
എന്നാല്‍ ഫണ്ട് കിട്ടിയിട്ടും സംസ്ഥാന സര്‍ക്കാര്‍ അധ്യാപകരെ നിയമിക്കുന്നില്ല എന്നാണ്, കെഎസ്ടിഎ കോടതിയില്‍ പറഞ്ഞത്. ഇത് ഇടതു സര്‍ക്കാരിന്റെ വാദത്തിന് കടക വിരുദ്ധമാണ്. കേന്ദ്രത്തില്‍ നിന്ന് കേരളത്തിന് ഫണ്ട് ലഭിച്ചുവെന്ന് കെഎസ്ടിഎ കോടതിയില്‍ ബോധിപ്പിച്ചു. ഫണ്ട് ലഭിച്ചിട്ടും, സ്‌പെഷല്‍ എഡ്യൂക്കേറ്റര്‍മാരുടെ നിയമനത്തില്‍ സംസ്ഥാന സര്‍ക്കാര്‍ ഒരു നടപടിയും സ്വീകരിക്കുന്നില്ല, അവര്‍ ചൂണ്ടിക്കാട്ടി. സ്‌പെഷല്‍ എഡ്യൂക്കേറ്റര്‍മാരുടെ നിയമനവുമായി ബന്ധപ്പെട്ട ഹര്‍ജി പരിഗണിക്കുമ്പോഴാണ് സര്‍ക്കാര്‍ കള്ളക്കളി പൊളിഞ്ഞു വീണത്.
കേന്ദ്ര ഫണ്ട് ലഭിക്കാത്തതിനാലാണ് നിയമനം നടത്താത്തതെന്നാണ് കേരളം സുപ്രീം കോടതിയോട് നേരത്തെ പറഞ്ഞത്. എന്നാല്‍ ഫണ്ട് ലഭിച്ച ശേഷവും നിയമനം നടത്താത്തതിന് കേരളത്തിലെ ഉദ്യോഗസ്ഥരെ വിളിച്ച് വരുത്തി വിശദീകരണം തേടണമെന്നാണ് കെഎസ്ടിഎയുടെ ആവശ്യം. സര്‍ക്കാരിന്റെ സത്യവാങ്മൂലം തിങ്കളാഴ്ച ലഭിച്ച ശേഷം ഇക്കാര്യത്തില്‍ തീരുമാനം എടുക്കാമെന്ന് സുപ്രീംകോടതി വ്യക്തമാക്കി.
