കൊച്ചി: പട്ടികജാതി വികസന വകുപ്പ് ഡയറക്ടറേറ്റില് സര്ക്കാര് ഉത്തരവ് കാറ്റില്പ്പറത്തി അനധികൃത നിയമനങ്ങള് നടക്കുന്നതായി ആക്ഷേപം. ഭരണാനുകൂല യൂണിയന്റെ കിരാതവാഴ്ച്ചക്കെതിരേ അതിശക്തമായ പ്രതിഷേധമുയരുന്നു. ഇത് സംബന്ധിച്ച് മുഖ്യമന്ത്രി, വകുപ്പ് മന്ത്രി, വകുപ്പ് ഡയറക്ടര് എന്നിവര്ക്ക് പരാതി ലഭിച്ചതായി സൂചന.
സ്ഥാനക്കയറ്റം, സ്ഥലംമാറ്റം, ആശ്രിത നിയമനം എന്നിവ പ്രകാരം സംസ്ഥാനത്തെ വിവിധ സര്ക്കാര് വകുപ്പുകളുടെ ആസ്ഥാന ഓഫീസുകളില് വരുന്ന ഒഴിവുകള് നികത്തരുത് എന്ന് 2016 ലെ കേരളപ്പിറവി ദിനത്തില് സ.ഉ.(പി) നം.29/2016/ നമ്പര് ഉത്തരവ് ഇറക്കിയെങ്കിലും, പട്ടികജാതി വികസന വകുപ്പ് ആസ്ഥാനത്ത് നടപ്പിലാക്കിയിട്ടില്ല. ഉത്തരവ് ഇറങ്ങി പത്ത് വര്ഷം കഴിഞ്ഞിട്ടും വകുപ്പ് ആസ്ഥാനത്തെ അനേകം ഒഴിവുകള് നികത്തിയത് സ്ഥാനക്കയറ്റം, സ്ഥലംമാറ്റം, ആശ്രിത നിയമനം എന്നിവ മുഖേനയാണ്. എന്ട്രി കേഡര് തസ്തികളായ ക്ലാര്ക്ക്, ഒ എ പോസ്റ്റുകളിലാണ് ഇത്തരത്തില് ചട്ടവിരുദ്ധ നിയമനങ്ങള് നടന്നതെന്നാണ് ആരോപണം.
പുതിയതായി ജോലിയില് പ്രവേശിക്കുന്നവര്ക്ക് സര്വ്വീസ് നിയമങ്ങള്, വകുപ്പ്തല പരീക്ഷകള് ഉള്പ്പെടെയുള്ള വിവിധ സര്വീസ് കാര്യങ്ങളെക്കുറിച്ച് എളുപ്പത്തില് പരിചയപ്പെടാനും മറ്റും വകുപ്പ് ആസ്ഥാനത്ത് ജോലിയില് പ്രവേശിക്കുന്നത് സഹായകരമാണ്. എന്നാല് ഉത്തരവ് ഇറക്കി പത്ത് വര്ഷമായിട്ടും പട്ടികജാതി വികസന വകുപ്പ് ആസ്ഥാനത്തെ ഒഴിവുകള് ഭരണാനുകൂല യൂണിയന് നേതാക്കള് കൈയടക്കിവെച്ചിരിക്കുകയാണ്. ചട്ടവിരുദ്ധമായി വകുപ്പ് ആസ്ഥാനത്ത് ജോലിയില് പ്രവേശിച്ചവരെ അവരുടെ ടേണ് അനുസരിച്ച് ഒഴിവുള്ള ജില്ലകളിലേക്ക് മാറ്റി നിയമിക്കുന്നതിന് വകുപ്പ് ഡയറക്ടര് അനുമതി നല്കിയിട്ടും ബന്ധപ്പെട്ട സെക്ഷനില് നിന്ന് ഫയലില് ഇതുവരെ നടപടികള് സ്വീകരിച്ചിട്ടില്ല.
പിഎസ്സി റാങ്ക് പട്ടികയില് ഉള്പ്പെട്ട നിയമനത്തിനായി കാത്തിരിക്കുന്ന ഉദ്യോഗാര്ത്ഥിള്ക്ക് അര്ഹമായ ഒഴിവുകള് പിഎസ്സിക്ക് റിപ്പോര്ട്ട് ചെയ്യാത്തതിനാല് അവരുടെ നിയമനം തടസപ്പെട്ട നിലയിലാണെന്ന് പി. എന്. തമ്പാന് വിവരാവകാശ നിയമപ്രകാരം നല്കിയ അപേക്ഷക്ക് ലഭിച്ച മറുപടിയില് നിന്ന് വ്യക്തമാണ്.
ജന്മഭൂമി ഓണ്ലൈന്