ന്യൂദല്ഹി: തന്റെ ആത്മകഥ ഇതുവരെയും പ്രസിദ്ധീകരിക്കപ്പെട്ടിട്ടില്ലെന്ന് മുന് കരസേനമേധാവി എം.എം. നരാവനെ. ഇതോടെ നരാവനെയുടെ ഈ പുസ്തകം ഉയര്ത്തിപ്പിടിച്ച് മോദി സര്ക്കാരിനും പ്രതിരോധമന്ത്രി രാജ്നാഥ് സിങ്ങിനും എതിരെ രാഹുല് ഗാന്ധി നാണം കെട്ടു.
മുന് കരസേന മേധാവി എം.എം. നരാവനെ രാഹുല് ഗാന്ധിയെ തള്ളി ചൊവ്വാഴ്ച എക്സില് പങ്കുവെച്ച പോസ്റ്റ്:
This is the status of the book. https://t.co/atLtwhJvl0
— Manoj Naravane (@ManojNaravane) February 10, 2026
വിവാദം പൊട്ടിപ്പുറപ്പെട്ടതിന് ശേഷം ഇതാദ്യമായാണ് എം.എം. നരാവനെ പ്രതികരിക്കുന്നത്. എക്സില് പങ്കുവെച്ച പോസ്റ്റിലൂടെയാണ് എം.എം.നരാവനെയുടെ പ്രതികരണം. ഈ വിഷയത്തില് പെന്ഗ്വിന് പബ്ലിഷേഴ്സ് എന്താണോ പറയുന്നത് അതാണ് തന്റെയും അഭിപ്രംയ എന്നായിരുന്നു നരാവനെ പങ്കുവെച്ച് പോസ്റ്റ്. ഈ പോസ്റ്റിനൊപ്പം പെന്ഗ്വിന് പബ്ലിഷേഴ്സിന്റെ പത്രക്കുറിപ്പും നരാവനെ പങ്കുവെച്ചിരുന്നു. ചൊവ്വാഴ്ച രാവിലെ നരാവനെയുടെ പുസ്തകം പ്രസിദ്ധീകരിക്കാന് തയ്യാറായിരുന്ന പെന്ഗ്വിന് പബ്ലിഷേഴ്സും അവരുടെ നിലപാട് വ്യക്തമാക്കിയിരുന്നു. രാഹുല് ഗാന്ധിയ്ക്ക് എതിരായ നിലപാടായിരുന്നു പെന്ഗ്വിന്റേത്. നരാവനെയുടെ പുസ്തകം പുസ്തകരൂപത്തിലോ ഡിജിറ്റല് രൂപത്തിലോ പ്രസിദ്ധീകരിച്ചിട്ടില്ലെന്നായിരുന്നു പെന്ഗ്വിന് പ്രതികരിച്ചത്.
ഇതോടെ ഈ വിഷയത്തില് രാഹുല്ഗാന്ധിക്ക് കുരുക്ക് മുറുകുകയാണ്. നരാവനെയുടെ പുസ്തകം തന്റെ കയ്യിലുണ്ടെന്ന് പറഞ്ഞ് രാഹുല് ഗാന്ധി കഴിഞ്ഞ ദിവസം പാര്ലമെന്റില് ഈ പുസ്തകം ഉയര്ത്തിപ്പിടിച്ചിരുന്നു. പ്രസിദ്ധീകരിക്കാത്ത പുസ്തകം എങ്ങിനെ രാഹുല് ഗാന്ധിക്ക് ലഭിച്ചു എന്ന കാര്യത്തില് ദല്ഹി പൊലീസ് അന്വേഷണം ആരംഭിച്ചിട്ടുണ്ട്. പ്രസിദ്ധീകരിക്കാത്ത ഉള്ളടക്കം പ്രസിദ്ധീകരിച്ചതായി കാണിക്കുന്നത് പകര്പ്പാവകാശലംഘനമാണ്. ഇതിന് തടവ് ശിക്ഷവരെ ലഭിക്കാം. പെന്ഗ്വിന്റെയും നരാവനെയുടെയും പ്രതികരണം പുറത്തുവന്നതോടെ രാഹുല് ഗാന്ധിയ്ക്ക് തലവേദന കൂടുകയാണ്. ചൊവ്വാഴ്ച രാവിലെ നരാവനെ 2023ല് എക്സില് പങ്കുവെച്ച ഒരു പോസ്റ്റ് രാഹുല്ഗാന്ധി പുറത്തുവിട്ടിരുന്നു. ഇതില് തന്റെ പുസ്തകം പ്രസിദ്ധീകരിച്ചിട്ടുണ്ട് എന്നാണ് നരാവനെ പറയുന്നത്. ഈ പഴയ പോസ്റ്റ് ചൂണ്ടിക്കാട്ടി “ഒന്നുകില് നരാവനെ സത്യം പറയുന്നു അതല്ലെങ്കില് പെന്ഗ്വിന് സത്യം പറയുന്നു” എന്നായിരുന്നു രാഹുല് ഗാന്ധി പ്രതികരിച്ചത്. പക്ഷെ ഇപ്പോള് തന്റെ പുസ്തകം പ്രസിദ്ധീകരിക്കപ്പെട്ടിട്ടില്ലെന്ന നരാവനെയുടെ പുതിയ പ്രതികരണം പുറത്തുവന്നതോടെ പെന്ഗ്വിനും നരാവനെയും പറയുന്നത് ഒരേ കാര്യമാണ്- പുസ്തകം പ്രസിദ്ധീകരിക്കപ്പെട്ടിട്ടില്ല.
ഇപ്പോള് രക്ഷപ്പെടാന് രാഹുല് ഗാന്ധി ആമസോണിനെ കൂട്ടൂപിടിച്ചിരിക്കുകയാണ്. കെ.സി വേണുഗോപാലും ഈ അഭിപ്രായം ആവര്ത്തിച്ചിരുന്നു. രാഹുല് ഗാന്ധിക്ക് ഈ പുസ്തകം ലഭിച്ചത് ആമസോണില് നിന്നാണെന്നാണ് ഇരുവരും പറഞ്ഞിരിക്കുന്നത്. ഇനി ആമസോണിന്റെ പ്രതികരണം മാത്രമാണ് പുറത്തുവരാനുള്ളത്.
