ന്യൂദൽഹി: ഏതാനും മാസങ്ങള്ക്ക് മുന്പ് ഇന്ത്യയെയും മോദിയെയും ശത്രുവായി കാണുകയും ചൈനയെ പങ്കാളിയായി കാണുകയും ചെയ്ത മലേഷ്യ എന്ന മുസ്ലിം രാജ്യത്തെ തനിക്ക് അനുകൂലമായി തിരിക്കാന് കഴിഞ്ഞത് മോദിയുടെ നയതന്ത്ര വിജയത്തിലെ വലിയൊരു നാഴികക്കല്ലാണെന്ന് പറയാതെ വയ്യ. ഇപ്പോഴിതാ മലേഷ്യാ സന്ദര്ശനത്തില് ചൈനയെ നേരിടാനുള്ള ആയുധമെന്ന നിലയില് മലേഷ്യയുടെ പക്കലുള്ള സുഖോയ് യുദ്ധവിമാനങ്ങളെ പരിഷ്കരിച്ചു നല്കാനുള്ള വമ്പന് കരാറിനെ ഉറ്റുനോക്കുകയാണ് ശനിയാഴ്ച മലേഷ്യയില് എത്തിയ മോദി. പ്രതിരോധരംഗത്തെ സഹകരണം വര്ധിപ്പിക്കുക വഴി മലേഷ്യയെ ചൈനയ്ക്ക് എതിരായ ഗ്രൂപ്പില് നിര്ത്താനാണ് ഇന്ത്യ ശ്രമിക്കുക.
മലേഷ്യയുടെ കയ്യിലുള്ള സുഖോയ് 30 വിഭാഗത്തില്പ്പെടുന്ന യുദ്ധവിമാനങ്ങള് കാലപ്പഴക്കമുള്ളവയാണ്. ഇവയുടെ നവീകരണത്തിനും പുതിയ സാങ്കേതികവിദ്യകള് ചേര്ത്ത് അപ്ഗ്രേഡിനും മിഡ് ലൈഫ് അറ്റകുറ്റപ്പണികള്ക്കും ഉള്ള സഹായം വാഗ്ദാനം ചെയ്തിരിക്കുകയാണ് ഇന്ത്യ എന്ന കാര്യം വിദേശകാര്യമന്ത്രാലയസെക്രട്ടറി പി. കുമാരനാണ് വെളിപ്പെടുത്തിയത്. ചൈനയ്ക്കെതിരെ ഉപയോഗിക്കാവുന്ന യുദ്ധവിമാനമാണ് സുഖോയ് 30.
പ്രതിരോധത്തിന് പുറമെ ഡിജിറ്റല് മേഖലയിലും സെമികണ്ടക്ടര് രംഗത്തും സഹകരണം ഉറപ്പാക്കാന് ശ്രമിക്കുന്നുണ്ട്.
ഇന്ത്യ നിര്മ്മിക്കുന്ന ഡോണിയര് വിമാനങ്ങള് മലേഷ്യയ്ക്ക് വില്ക്കുന്നതിനെക്കുറിച്ച് ആലോചനയിലുണ്ട്. മലേഷ്യയുടെ സ്കോര്പീന് അന്തര്വാഹിനികള് നവീകരിക്കുന്ന കരാര് ഏറ്റെടുക്കാനും ഇന്ത്യ ശ്രമിക്കുന്നുണ്ട്. നിലവിലുള്ള സ്കോര്പീനില് പുതിയ സാങ്കേതികവിദ്യയോ ആധുനിക ഇലക്ട്രോണിക്സ് സംവിധാനമോ ചേര്ക്കാനുള്ള റെട്രോഫിറ്റിംഗ് കരാറിനും ഇന്ത്യ ശ്രമിക്കുന്നു. ഇന്ത്യന് കപ്പല് ശാലകളില് മലേഷ്യയ്ക്ക് വേണ്ടി കപ്പലുകള് നിര്മ്മിയ്ക്കാനോ വിതരണം ചെയ്യാനോ ഉള്ള കരാറില് ഏര്പ്പെടാന് കഴിയുമെന്നും ഇന്ത്യ വിശ്വസിക്കുന്നു.
മലാക്ക കടലിടുക്കിലും ഇന്ത്യയ്ക്ക് നോട്ടം
മലേഷ്യയ്ക്കും ഇന്തോനേഷ്യ്ക്കും ഇടയില് കിടക്കുന്ന മലാക്ക കടലിടുക്ക് ഏറെ പ്രാധാന്യമുള്ളതാണ്. ലോകത്തിലെ 40 ശതമാനം ചരക്കുകപ്പലുകളും ഇതുവഴി കടന്നുപോകുന്നു. അത്രയ്ക്ക് തന്ത്രപ്രധാന്യമുണ്ട് മലാക്ക കടലിടുക്കിന്. ഇവിടെ ചൈനയുടെ ആധിപത്യം കുറയ്ക്കാന് ഇന്ത്യ ആഗ്രഹിയ്ക്കുന്നു. അതിനുള്ള വഴിയൊരുക്കാന് ഒരു പ്രധാന നാഴികക്കല്ലാണ് മലേഷ്യയുമായുള്ള ഗാഢസൗഹൃദം. മലാക്ക കടലിടുക്കില് ആധിപത്യം നേടിയാല് അത് വലിയ കരുത്താണ്. ഇന്ത്യയുടെ കിഴക്കന് ഏഷ്യയില് ആധിപത്യം ഉറപ്പിക്കാനുള്ള തന്ത്രത്തില് മലാക്ക കടലിടുക്കിന് ഏറെ പ്രാധാന്യമുണ്ട്.
ഇത് മലേഷ്യയില് നിന്നും വരുമാനം നേടുക എന്നതിനേക്കാള് ചൈനയ്ക്ക് എതിരായ ചേരിയില് മലേഷ്യയെ നിലനിര്ത്തുക എന്നതാണ് ഇന്ത്യയുടെ തന്ത്രം. ഒരു കാലത്ത് മോദിയെയും ഇന്ത്യയെയും പുറന്തള്ളി ചൈനയോട് ചേര്ന്ന് നിന്ന മലേഷ്യ കഴിഞ്ഞ എത്രയോനാളുകളായി ഇന്ത്യയുടെ അടുത്ത സുഹൃത്തായി മാറി എന്നത് ഏഷ്യയിടെ അധികാരസമവാക്യത്തില് ഇന്ത്യയ്ക്ക് ഏറെ ഗുണം ചെയ്യും.
