കണ്ണൂര്: കേന്ദ്രത്തിലും സംസ്ഥാനത്തും ഏറെ കാലമായി ഭരണമില്ലാത്തതില് ഖിന്നരാണ് കോണ്ഗ്രസ് നേതാക്കളും പ്രവര്ത്തകരും. കഴിഞ്ഞ ലോക് സഭാ തെരഞ്ഞെടുപ്പില് സംസ്ഥാനത്ത് നിന്ന് ജയിച്ച് ദല്ഹിയിലെത്തിയ എം പിമാര്ക്ക് നരേന്ദ്രമോദി വീണ്ടും പ്രധാനമന്ത്രിയാകുന്നത് കണ്ടു നില്ക്കേണ്ടി വന്നു. അതിന്റെ ‘ ചൊരുക്ക് ‘ സഭ സ്തംഭിപ്പിച്ചും ബഹളം ഉണ്ടാക്കിയും പാര്ലമെന്റില് തീര്ക്കുന്നുണ്ട് കോണ്ഗ്രസ് എം പിമാര്.അവിടെ അടുത്തെങ്ങും ഭരണത്തിലെത്താനാകുമെന്ന പ്രതീക്ഷയുമില്ല.
ഈ സാഹചര്യത്തിലാണ് കേരള നിയമസഭാ തെരഞ്ഞെടുപ്പ് വരുന്നത്.തുടര്ച്ചയായി പത്ത് വര്ഷം ഭരിച്ച പിണറായി സര്ക്കാരിന്റെ പ്രവര്ത്തനങ്ങളില് മനംമടുത്ത ജനം മാറി ചിന്തിക്കുമെന്നും അതിന്റെ ഗുണം തങ്ങള്ക്ക് ലഭിക്കുമെന്നുമുളള പ്രതീക്ഷയിലാണ് കോണ്ഗ്രസ് നേതാക്കള്. തദ്ദേശ സ്ഥാപന തെരഞ്ഞെടുപ്പ് ഫലം പ്രതീക്ഷകള്ക്ക് ആക്കം കൂട്ടുകയും ചെയ്യുന്നു.
ഈ സാഹചര്യത്തില് പല കോണ്ഗ്രസ് എം പിമാരും നിയമസഭയിലേക്ക് മത്സരിക്കാന് കണ്ണുവയ്ക്കുകയാണ്. ഭരണം കിട്ടുമെന്നും അങ്ങനെ വന്നാല് മന്ത്രി സ്ഥാനവുമൊക്കെ സ്വപ്നം കണ്ടാണ് നീക്കം.ഏറ്റവും ഒടുവില് നിയമസഭാ തെരഞ്ഞെടുപ്പില് മത്സരിക്കാന് താത്പര്യം പ്രകടിപ്പിച്ച പ്രമുഖന് കെ പി സി സി മുന് അധ്യക്ഷന് കെ സുധാകരനാണ്. പാര്ട്ടി പറഞ്ഞാല് നിയമസഭ തിരഞ്ഞെടുപ്പില് മത്സരിക്കുമെന്നാണ് കെ സുധാകരന് പറഞ്ഞത്. പാര്ട്ടി മത്സരിക്കാന് പറയുമെന്നാണ് പ്രതീക്ഷയെന്ന് കൂടി അദ്ദേഹം പറഞ്ഞു. രണ്ട് മൂന്ന് ദിവസത്തിനകം തീരുമാനം ഉണ്ടാകുമെന്നും സുധാകരന് വ്യക്തമാക്കി. മുഖ്യമന്ത്രി പദ മോഹികള് ഏറെയുളള കോണ്ഗ്രസില് സുധാകരന് മത്സരിച്ച് ജയിക്കുകയും കോണ്ഗ്രസ് അധികാരത്തിലെത്തുകയും കൂടി ചെയ്താല് ഈ പദവിയിലേക്ക് ന്യായമായും അവകാശവാദം ഉന്നയിക്കാനാകുന്ന ഒരാള് കൂടിയാണ് ഇദ്ദേഹം.
