തിരുവനന്തപുരം: ബിജെപിയുടെ പുതിയ ദേശീയാദ്ധ്യക്ഷനായി തെരഞ്ഞെടുക്കപ്പെട്ട നിധിൻ നവീൻ ആദ്യമായി കേരളത്തിലേക്ക്. ഫെബ്രുവരി 6,7 തീയതികളിൽ അദ്ദേഹം എറണാകുളം, തൃശൂർ ജില്ലകളിൽ 7 വിവിധ പരിപാടികളിൽ പങ്കെടുക്കും.
ആറാം തീയതി ഉച്ചയോടെ നെടുമ്പാശേരി വിമാനത്താവളത്തിലെത്തുന്ന നിധിൻ നവീന് അവിടെ പാർട്ടി പ്രവർത്തകർ ഉജ്ജ്വല സ്വീകരണം നൽകും. തുടർന്ന് അവിടെ നേതാക്കന്മാരുമായി കൂടിക്കാഴ്ചയുണ്ടാകും.
തുടർന്ന് അങ്കമാലി അഡ്ലക്സ് ഇന്റർനാഷണൽ കൺവൻഷൻ സെന്ററിൽ ദേശീയാദ്ധ്യക്ഷന് വൈകിട്ട് പൗരസ്വീകരണം നൽകും.
തുടർന്ന് എറണാകുളം, ആലപ്പുഴ ജില്ലകളിലെ 6000 ൽ പരം ബിജെപി ബൂത്ത് പ്രസിഡന്റുമാരുടെ സമ്മേളനം ഉദ്ഘാടനം ചെയ്യും.
വൈകിട്ട് പാലാരിവട്ടത്ത്, ബിജെപി ജില്ലാ പ്രസിഡന്റഐമാർ, ജനറൽ സെക്രട്ടറിമാർ, 140 നിയമസഭാ മണ്ഡലങ്ങളുടെ ഭാരവാഹികൾ എന്നിവർ പങ്കെടുക്കുന്ന യോഗത്തിൽ സംസാരിക്കും.
ഏഴാം തീയതി കാലടിയിലെ ശൃംഗേരി ആദിശങ്കരമഠം സന്ദർശിക്കും. തുടർന്ന് തൃശൂരിൽ നടക്കുന്ന കേന്ദ്ര ബജറ്റ് ചർച്ചയും കേരള വികസനവും എന്ന വിഷയത്തിലെ ചർച്ചയിൽ സാമ്പത്തിക വിചക്ഷണർ അടക്കം പ്രമുഖരുമായി സംവദിക്കും. വൈകിട്ട് തൃശൂർ അസംബ്ലി നിയോജക മണ്ഡലത്തിലെ നേതൃയോഗത്തിൽ പങ്കെടുത്ത് ദൽഹിക്ക് മടങ്ങും.
