ഇസ്ലാമാബാദ്: പാകിസ്ഥാൻ കടത്തിൽ മൂക്കറ്റം മുങ്ങിപ്പോയെന്നും കഷ്ടിച്ച് രക്ഷപ്പെട്ടത് അയൽ രാജ്യങ്ങൾ നീട്ടിയ കച്ചിത്തുരുമ്പിൽ പിടിച്ചാണെന്നും പ്രധാനമന്ത്രി ഷെഹബാസ് ഷെരീഫ്. പാകിസ്ഥാൻ ഭാരതത്തിനെതിരേ സൈനിക നീക്കങ്ങൾക്ക് സന്നാഹമൊരുക്കുന്നുവെന്ന് പലരും വ്യാഖ്യാനിച്ച വിദേശ രാജ്യ സന്ദർശനങ്ങളുടെ യാഥാർത്ഥ്യമാണിപ്പോൾ പുറത്തുവന്നിരിക്കുന്നത്. പ്രധാനമന്ത്രി ഷെരീഫ് നിക്ഷേപകരുമായി നടത്തിയ സംവാദത്തിലാണ് ഈ ഞെട്ടിക്കുന്ന വെളിപ്പെടുത്തൽ നടത്തിയത്.
ഇസ്ലാമാബാദിന്റെ നിലവിലുള്ള കടബാധ്യതയുടെ വ്യക്തിപരവും ദേശീയവുമായ നഷ്ടമാണ് പാകിസ്ഥാൻ പ്രധാനമന്ത്രി വെളിപ്പെടുത്തിയത്. രാജ്യത്തിന്റെ വിദേശ കടംവീട്ടാൻ താനും ഫീൽഡ് മാർഷൽ അസിം മുനീറും (കരസേനാ മേധാവി) സൗഹൃദ രാജ്യങ്ങളിൽ നിന്ന് കോടിക്കണക്കിന് വായ്‌പകൾ തേടാൻ നിർബന്ധിതരായി എന്ന് ഷെരീഫ് സമ്മതിച്ചു.
ബിസിനസുകാരുടെയും കയറ്റുമതിക്കാരുടെയും ഒരു സമ്മേളനത്തെ അഭിസംബോധന ചെയ്തുകൊണ്ട്, സൗഹൃദ രാജ്യങ്ങളുടെ പിന്തുണയ്‌ക്ക് അദ്ദേഹം നന്ദി പറയുകയും ചെയ്തു.
‘രാജ്യങ്ങൾ വായ്‌പകൾ തേടാൻ പോകുമ്പോൾ അവരുടെ തല കുനിഞ്ഞിരിക്കുമെന്ന് നിങ്ങൾക്കറിയാം, വായ്‌പകളുമായി ബന്ധപ്പെട്ട ബാധ്യതകളെക്കുറിച്ച് നിങ്ങൾക്ക് നന്നായി അറിയാം. ഫീൽഡ് മാർഷലും ഞാനും നിശബ്ദമായി പല രാജ്യങ്ങളും സന്ദർശിച്ച് ഐഎംഎഫ് (അന്താരാഷ്‌ട്ര നാണയ നിധി) പരിപാടി സുരക്ഷിതമാക്കുന്നതിനും വിദേശ കടത്തിന്റെ വിടവ് കുറയ്‌ക്കുന്നതിനും കോടിക്കണക്കിന് ഡോളറിന്റെ വായ്‌പകൾ നൽകണമെന്ന് അവരോട് അഭ്യർത്ഥിച്ചുവെന്ന് ഞാൻ തുറന്നു പറയാൻ ആഗ്രഹിക്കുന്നു,’ അദ്ദേഹം കൂട്ടിച്ചേർത്തു.
മറ്റ് രാജ്യങ്ങളിൽ നിന്ന് പണം തേടുന്നതിന് അവരുടെ ന്യായീകരിക്കാനാവാത്ത ആവശ്യങ്ങൾ പാലിക്കേണ്ടതുണ്ടെന്ന് ഷെരീഫ് ഓർമ്മിപ്പിച്ചു.
‘ഞങ്ങളെ ആതിഥേയത്വം വഹിച്ച സൗഹൃദ രാജ്യങ്ങളോട് ഞാൻ നന്ദിയുള്ളവനാണ്. എന്നിരുന്നാലും, മറ്റുള്ളവരിൽ നിന്ന് പണം ആവശ്യപ്പെടുമ്പോൾ, ആത്മാഭിമാനം കുറയ്‌ക്കുന്നതിന്റെ രൂപത്തിൽ ഒരു വില നൽകേണ്ടിവരുമെന്ന് നിങ്ങൾക്കറിയാം. വിട്ടുവീഴ്ചകൾ ചെയ്യേണ്ടിവരും. അത്തരം ആവശ്യങ്ങൾ നടപ്പിലാക്കുന്നതിന് പലപ്പോഴും ന്യായീകരണമില്ലെങ്കിൽ പോലും, വായ്‌പ നൽകുന്നവരുടെ ആഗ്രഹങ്ങളുടെ ഭാരം ഒരാൾ വഹിക്കേണ്ടിവരും,’ അദ്ദേഹം പറഞ്ഞു.
പാകിസ്ഥാനെ സഹായിച്ച രാജ്യങ്ങളിൽ ചൈനയാണ് മുൻപന്തിയിൽ നിൽക്കുന്നതെന്നും പ്രധാനമന്ത്രി ചൂണ്ടിക്കാട്ടി.
