മട്ടാഞ്ചേരി: കൊച്ചിന്‍ കപ്പല്‍ശാലയുടെ സിഎംഡി മധു എസ്. നായര്‍ ഇന്ന് വിരമിക്കും. പത്ത് വര്‍ഷത്തെ കപ്പല്‍ശാലയുടെ നേതൃത്വം പൂര്‍ത്തിയാക്കിയാണ് അദ്ദേഹം വിരമിക്കുന്നത്. കപ്പല്‍ശാലയിലെ വിവിധ തസ്തികകളിലായി 37 വര്‍ഷക്കാലം സേവനമനുഷ്ഠിച്ചാണ് മധു എസ്. നായര്‍ വിരമിക്കുന്നത്.
2016 ജനുവരി 1 നാണ് സിഎംഡിയായി ചുമതലയേല്‍ക്കുന്നത്. 1988 ജൂണില്‍ മാനേജ്‌മെന്റ് ട്രെയിനിയായി സേവനം ആരംഭിച്ച് വിവിധ പ്രധാന പ്രവര്‍ത്തന മേഖലകളില്‍ പ്രവര്‍ത്തിച്ചു. കൊച്ചി സര്‍വകലാശാലയില്‍ നിന്ന് നേവല്‍ ആര്‍ക്കിടെക്ചര്‍ ആന്‍ഡ് ഷിപ്പ് ബില്‍ഡിങ്ങില്‍ ബിരുദവും, ജപ്പാനിലെ ഒസാക്ക സര്‍വകലാശാലയില്‍ നിന്ന് നേവല്‍ ആര്‍ക്കിടെക്ചര്‍ ആന്‍ഡ് ഓഷ്യന്‍ എന്‍ജിനീയറിങ്ങില്‍ മാസ്റ്റര്‍ ബിരുദവും നേടി. ജാപ്പനീസ് സര്‍ക്കാരിന്റെ സ്‌കോളര്‍ഷിപ്പില്‍ ഗവേഷണ പ്രവര്‍ത്തനങ്ങള്‍ നടത്തിയ അദ്ദേഹം, ഐഎച്ച്‌ഐ ഷിപ്പ്യാര്ഡ്, കുറെ എന്നിവിടങ്ങളില്‍ അഡ്വാന്‍സ്ഡ് ട്രെയിനിങ്ങും ജിക്കയുടെ പ്രത്യേക പരിശീലനവും പൂര്‍ത്തിയാക്കി. യുകെയിലെ റോയല്‍ ഇന്‍സ്റ്റിറ്റിയൂഷന്‍ ഓഫ് നേവല്‍ ആര്‍കിടെക്റ്റ്‌സ്, ഇന്ത്യ ഇന്‍സ്റ്റിറ്റിയൂഷന്‍ ഓഫ് നേവല്‍ ആര്‍കിടെക്റ്റ്‌സ് എന്നിവയുടെ ഫെലോയുമാണ് അദ്ദേഹം.
ഗുരുവായൂര്‍ സ്വദേശിയാണ് മധു എസ്. നായര്‍. ഭാര്യ: കെ. രമീഥ, എന്‍പിഒഎല്‍ സീനിയര്‍ സയന്റിസ്റ്റ് ആണ്. മകള്‍ പാര്‍വതി നായര്‍ ഹാര്‍വാര്‍ഡ് യൂണിവേഴ്‌സിറ്റിയില്‍ എംബിഎ വിദ്യാര്‍ത്ഥിനിയാണ്. മകന്‍ കൃഷ്ണന്‍ നായര്‍ ഹൈദരാബാദിലെ ബിറ്റ്‌സ് പിലാനിയില്‍ പഠിക്കുന്നു. സിഎസ്എലിന്റെ ചെയര്‍മാന്‍ & മാനേജിങ് ഡയറക്ടറുടെ അധിക ചുമതല ഡയറക്ടര്‍ (ഫിനാന്‍സ്) ജോസ് വി.ജെ. വഹിക്കും.
