തിരുവനന്തപുരം: നെടുമങ്ങാട് ജില്ലാ ആശുപത്രിയില് ചികിത്സ പിഴവ് ഉണ്ടായെന്ന ആരോപണത്തെ തുടര്ന്ന് ഡിഎംഒ തല അന്വേഷണം പ്രഖ്യാപിച്ച് ആരോഗ്യവകുപ്പ്. മുഖ്യമന്ത്രിക്ക് ലഭിച്ച പരാതി പ്രകാരമാണ് അന്വേഷണം. ചികിത്സ രേഖകളുമായി ശനിയാഴ്ച രാവിലെ ആശുപത്രിയില് എത്താന് നിര്ദേശം ലഭിച്ചതായി പരാതിക്കാരിയുടെ കുടുംബം അറിയിച്ചു.
ഡിഎംഒ, ആര് സി എച്ച്, ജില്ലാ നഴ്സിംഗ് ഓഫീസര് അടങ്ങുന്ന സംഘമാണ് പരാതി അന്വേഷിക്കുക. നെടുമങ്ങാട് ജില്ലാ ആശുപത്രിയില് പ്രസവിച്ച ഹസ്നാ ഫാത്തിമക്കാണ് ചികിത്സാ പിഴവ് കാരണം ദുരനുഭവം ഉണ്ടായത്. അശാസ്ത്രീയമായി എപ്പിസോട്ടമി ചെയ്തതിനാല് മലദ്വാരത്തിലെ ഞരമ്പ് മുറിഞ്ഞെന്ന് യുവതി പറഞ്ഞു. മൂത്രനാളിയിലൂടെ മലമൂത്ര വിസര്ജനം നടക്കുന്നതിനാല് വീണ്ടും ശസ്ത്രക്രിയ നടത്തേണ്ടി വന്നു.
പ്രസവത്തിനായി വിതുര സ്വദേശിനി ഹസ്ന ഫാത്തിമ 2025 ജൂണ് 18നാണ് നെടുമങ്ങാട് ജില്ല ആശുപത്രിയില് അഡ്മിറ്റായത്.19ന് പ്രസവിച്ചു. പ്രസവശേഷം അശാസ്ത്രീയമായി എപ്പിസോട്ടമി ഇട്ടത്തിന് ശേഷം മലദ്വാരത്തിലേക്കുള്ള ഞരമ്പ് മുറിഞ്ഞതിനാല് മലമൂത്ര വിസര്ജനം മൂത്രനാളിയിലൂടെയായിരുന്നെന്നാണ് ഹസ്നയുടെ പരാതി. ഗൈനകോളജിസ്റ്റായ ഡോ. ബിന്ദു സുന്ദറിന്റെ നേതൃത്വത്തിലായിരുന്നു ശസ്ത്രക്രിയ. ജില്ലാ ആശുപത്രിയില് നിന്ന് ഡിസ്ചാര്ജ് ചെയ്തെങ്കിലും വീണ്ടും ആരോഗ്യപ്രശ്നങ്ങളുണ്ടായപ്പോള് മെഡിക്കല് കോളേജിലേക്ക് റഫര് ചെയ്തു. പ്ലാസ്റ്റിക് സര്ജറി ഉള്പ്പടെ നടത്തിയിട്ടും ഫലമുണ്ടായില്ല.സ്വകാര്യ ആശുപത്രിയിലെത്തിയപ്പോഴാണ് ശസ്ത്രക്രിയ കുടലിനെ ബാധിച്ചെന്ന് കണ്ടെത്തിയതെന്ന് ഹസ്ന പറഞ്ഞു.
