തിരുവനന്തപുരം: പ്രധാനമന്ത്രി നരേന്ദ്ര മോദി ഇന്ന് രാവിലെ തലസ്ഥാനത്ത് എത്തും. സംസ്ഥാനത്തിന് അനുവദിച്ച മൂന്ന് അമൃത് ഭാരത് ട്രെയിനുകളുടെ ഫ്ലാഗ് ഓഫിനൊപ്പം വിവിധ വികസന പദ്ധതികളുടെ തറക്കല്ലിടലും പ്രധാനമന്ത്രി നിര്വഹിക്കും. പ്രധാനമന്ത്രി പിഎം സ്വനിധി ക്രെഡിറ്റ് കാര്ഡ് പുറത്തിറക്കുന്നതിനൊപ്പം വായ്പകളുടെ വിതരണവും ഉദ്ഘാടനം ചെയ്യും.
രാവിലെ 10.45 ഓടെ പുത്തരിക്കണ്ടം മൈതാനിയിലെ പ്രത്യേക വേദിയിലാണ് പ്രധാനമന്ത്രിയുടെ ഔദ്യോഗിക പരിപാടികള്. പുതിയ അമൃത് ഭാരത് ട്രെയിനുകള് അദ്ദേഹം ഫ്ലാഗ് ഓഫ് ചെയ്യും. തുടര്ന്ന് പിഎം സ്വനിധി ക്രെഡിറ്റ് കാര്ഡ് പുറത്തിറക്കും. തിരുവനന്തപുരത്തെ സിഎസ്ഐആര്എന്ഐഐഎസ്ടി ഹബ്ബിനും ശ്രീചിത്രയിലെ അത്യാധുനിക റേഡിയോ സര്ജറി സെന്ററിനും പ്രധാനമന്ത്രി തറക്കല്ലിടും. പൂജപ്പുര ഹെഡ് പോസ്റ്റ് ഓഫീസ് ഉദ്ഘാടനം ചെയ്യും.
ബിജെപി പ്രവര്ത്തകരും നേതാക്കളും പങ്കെടുക്കുന്ന സമ്മേളത്തെയും അദ്ദേഹം അഭിസംബോധന ചെയ്യും. രാവിലെ 10 മണിയോടെ വിമാനത്താവളത്തില് എത്തുന്ന അദ്ദേഹത്തെ ഗവര്ണര് രാജേന്ദ്ര വിശ്വനാഥ് ആര്ലേക്കര്, മുഖ്യമന്ത്രി പിണറായി വിജയന്, മേയര് വി.വി. രാജേഷ് തുടങ്ങിയവര് ചേര്ന്ന് സ്വീകരിക്കും. തമ്പാനൂര് ഓവര്ബ്രിഡിജില് നിന്നും പുത്തരിക്കണ്ടം വരെ റോഡ് ഷോയുമുണ്ട്.
പുത്തരിക്കണ്ടത്ത് രണ്ട് സ്റ്റേജുകളിലായാണ് പരിപാടികള് നടക്കുന്നത്. ഔദ്യോഗിക പരിപാടിയ്ക്കായി ഒരു സ്റ്റേജും മറ്റൊന്ന് ബിജെപിയുടെ പൊതു പരിപാടിയ്ക്കായും. വികസന പദ്ധതികളുടെ പ്രഖ്യാപനം നടക്കുന്ന വേദിയില് പ്രത്യേകം ക്ഷണിക്കപ്പെട്ടവര്ക്ക് മാത്രമെ പ്രവേശനം ഉള്ളൂ. സമ്മേളന വേദിയില് എല്ലാപേര്ക്കും പ്രവേശനം അനുവദിച്ചിട്ടുണ്ട്. 25,000 പ്രവര്ത്തകര് സമ്മേളനത്തില് പങ്കെടുക്കും.
പ്രധാനമന്ത്രിയെ വരവേല്ക്കാന് വലിയ ആവേശത്തിലാണ് പ്രവര്ത്തകര്. കോര്പ്പറേഷന് തെരഞ്ഞെടുപ്പില് ബിജെപി ഭരണത്തിലെത്തിയാല് 45 ദിവസത്തിനുള്ളില് പ്രധാനമന്ത്രി തലസ്ഥാനത്ത് എത്തി വികസന പദ്ധതികള് പ്രഖ്യാപിക്കുമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് പറഞ്ഞിരുന്നു. എന്നാല് 27-ാം ദിവസം തന്നെ പ്രധാമന്ത്രി എത്തുന്നതിനാല് വലിയ ആവേശത്തിലാണ് പ്രവര്ത്തകര്.
എന്ഡിഎയില് ചേരുമെന്ന് പ്രഖ്യാപിച്ച ട്വിന്റി 20 പ്രസിഡന്റ് സാബു ജേക്കബ് പ്രധാനമന്ത്രിയുമായി കൂടിക്കാഴ്ച നടത്തി ഔദ്യോഗിക പ്രഖ്യാപനം നടത്തും.
ട്രയിന് ഉള്പ്പെടെ നിരവധി പ്രഖ്യാപനങ്ങളാണ് പ്രധാനമന്ത്രി നടത്തുന്നത്. കേരളത്തിന്റെ വികസനത്തിന് ഉതകുന്നതും ആയിരക്കണക്കിന് തൊഴില് സാധ്യത ഉണ്ടാക്കുന്നതുമായ നിരവധി പദ്ധതികളാണ് പ്രധാനമന്ത്രി പ്രഖ്യാപിക്കാന് പോകുന്നത്. പ്രധാനമന്ത്രി കടന്നുവരുന്ന വിഥീകളില് ആയിരക്കണക്കിന് പേര് അദ്ദേഹത്തെ വരവേല്ക്കാന് എത്തിച്ചേരും.
