തിരുനാവായ: കേരളത്തിന്റെ കുംഭമേളയെന്നു വിശേഷിപ്പിക്കുന്ന മഹാമാഘ മഹോത്സവത്തിന് ഇന്ന് ധ്വജമുരും. ഇന്ന് മുതല് ഫെബ്രുവരി മൂന്നുവരെ തിരുനാവായയില് ഭാരതപ്പുഴയുടെ തീരത്താണ് മഹാമാഘ മഹോത്സവം. മാഘ ഗുപ്ത നവരാത്രി ആരംഭദിനമായ ഇന്ന് രാവിലെ 11ന് ഗവര്ണര് രാജേന്ദ്ര വിശ്വനാഥ് ആര്ലേക്കര് ധര്മ ധ്വജാരോഹണം നടത്തി മേള ഉദ്ഘാടനം ചെയ്യും.
ചടങ്ങില് മഹാമാഘ സഭാപതി മഹാമണ്ഡലേശ്വര് സ്വാമി ആനന്ദവനം ഭാരതി, വര്ക്കിങ് ചെയര്മാന് കെ. ദാമോദരന്, ചീഫ് കോര്ഡിനേറ്റര് കെ. കേശവദാസ്, സാമൂതിരി കുടുംബാംഗമായ കെ.സി. ദിലീപ് രാജ അരിക്കര, സുധീര് നമ്പൂതിരി എന്നിവര് പങ്കെടുക്കും.
നാവാമുകുന്ദക്ഷേത്രപരിസരത്തും ഭാരതപ്പുഴയിലും ഒരുക്കങ്ങള് പൂര്ത്തിയായി. ഇന്ന് മുതല് രാവിലെ നിളാസ്നാനവും വൈകിട്ട് കാശിയിലെ പണ്ഡിറ്റുമാരുടെ നേതൃത്വത്തില് നിളാ ആരതിയും നടക്കും. രാജ്യത്തിന്റെ വിവിധ ഭാഗങ്ങളില് നിന്ന് സംന്യാസിമാര് ഉള്പ്പെടെയുള്ളവര് എത്തിക്കഴിഞ്ഞു.
ഭാരതപ്പുഴ ആരംഭിക്കുന്ന തമിഴ്നാട്ടിലെ തിരുമൂര്ത്തി മലയില് നിന്ന് ഇന്ന് രാവിലെ ശ്രീചക്രവുമായി തിരുനാവായയിലേക്ക് രഥയാത്ര പുറപ്പെടും. ഭാരതീയധര്മ പ്രചാരസഭ ആചാര്യന് യതീശാനന്ദനാഥന് നയിക്കുന്ന രഥയാത്ര വിവിധ സ്ഥലങ്ങളിലെ സ്വീകരണത്തിനുശേഷം 22ന് വൈകിട്ട് തിരുനാവായയിലെത്തിച്ചേരും.
വിവിധ ദേശങ്ങളിലെ ക്ഷേത്രങ്ങളില് നിന്ന് ദീപവുമായി എത്തുന്ന ഭക്തസമിതികള്ക്ക് അരയാല്ത്തൈ പ്രസാദമായി നല്കും. വിവിധ പരമ്പരകളുടെ പ്രത്യേക അനുഷ്ഠാനങ്ങളും സത്സംഗങ്ങളും വിദ്വല്സദസ്സുകളും കളരി, യോഗ അനുഷ്ഠാനങ്ങളും കലാഅവതരണങ്ങളും അടക്കം ഒട്ടേറെ പരിപാടികള്ക്ക് നിളാതീരം വേദിയാകുമെന്ന് സംഘാടകര് അറിയിച്ചു.
