ന്യൂദല്ഹി: ഗുവാഹത്തിയില് നടന്ന ബഗുരുംമ്പ ദ്വൗ ഉത്സവത്തില് ബോഡോ വിഭാഗത്തിലെ പെണ്കുട്ടികള് പുതിയ റെക്കോര്ഡ് സൃഷ്ടിച്ചതിനെ പ്രശംസിച്ച് പ്രധാനമന്ത്രി നരേന്ദ്ര മോദി.
10,000ത്തിലധികം കലാകാരന്മാരുടെ ഊര്ജവും ഖാമിന്റെ താളവും സിഫംഗിന്റെ ഈണവും ചേര്ന്ന ബഗുരുംമ്പയുടെ അസാധാരണമായ അവതരണം എല്ലാവരുടെയും മനം മയക്കിയെന്ന് മോദി പറഞ്ഞു. ബഗുരുംമ്പയുടെ അനുഭവം കണ്ണുകളെ സ്പര്ശിക്കുകയും ഹൃദയത്തിലേക്ക് എത്തുകയും ചെയ്തു. അസമിലെ കലാകാരന്മാരുടെ കഠിനാധ്വാനത്തെയും തയാറെടുപ്പിനെയും ഏകോപനത്തെയും പ്രശംസിച്ച പ്രധാനമന്ത്രി, ഇത് ശരിക്കും അത്ഭുതകരമാണെന്ന് വിശേഷിപ്പിച്ചു.
ബഗുരുംമ്പ ദ്വൗ ഉത്സവത്തില് പങ്കെടുത്ത എല്ലാ കലാകാരന്മാരെയും അദ്ദേഹം അഭിനന്ദിച്ചു. ഈ പരിപാടിയെ രാജ്യത്തും ലോകമെമ്പാടും എത്തിക്കുന്നതില് വലിയ പങ്ക് വഹിച്ച സാമൂഹ്യ മാധ്യമ ഇന്ഫ്ളുവന്സര്മാര്ക്കും ടെലിവിഷന് മാധ്യമങ്ങള്ക്കും അദ്ദേഹം നന്ദി അറിയിച്ചു. ആസാമില് നിന്നുള്ള രണ്ട് അമൃത് ഭാരത് എക്സ്പ്രസുകളുടെ ഫ്ളാഗ്ഓഫും പ്രധാനമന്ത്രി നിര്വ്വഹിച്ചു. ഗവര്ണര് ലക്ഷ്മണ് പ്രസാദ് ആചാര്യ, മുഖ്യമന്ത്രി ഹിമന്ത ബിശ്വ ശര്മ്മ, കേന്ദ്രമന്ത്രിമാരായ സര്ബാനന്ദ സോനോവാള്, പബിത്ര മാര്ഗരിറ്റോ തുടങ്ങിയവരും ചടങ്ങില് പങ്കെടുത്തു.
