തിരുന്നാവായ: മാഘ ഗുപ്ത നവരാത്രി ആരംഭ ദിനമായ നാളെ മഹാമാഘ മഹോത്സവത്തിന് കൊടിയേറും. രാവിലെ 11ന് ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ മഹാമാഘമഹോത്സവത്തിന്റെ ധര്‍മ്മ ധ്വജാരോഹണം നിര്‍വഹിക്കും. 16 മുതല്‍ പ്രായശ്ചിത്ത കര്‍മങ്ങളും പൂജകളും ആരംഭിച്ചെങ്കിലും മഹാമാഘ മഹോത്സവത്തിന്റെ ഔദ്യോഗിക തുടക്കം നാളെയാണ്. പ്രയാഗിലും മറ്റും കുംഭമേളയ്‌ക്കു നേതൃത്വം നല്‍കുന്ന നാഗ സംന്യാസിമാരുടെ സമൂഹമായ ജുനാ അഘാഡയാണ് തിരുനാവായയിലേയും മേള നടത്തുന്നത്. അഘാഡയുടെ മഹാമണ്ഡലേശ്വര്‍ സ്വാമി ആനന്ദവനം ഭാരതിയാണ് മഹാമാഘ മഹോത്സവത്തിന് നേതൃത്വം നല്‍കുന്നത്.
നാളെ മുതല്‍ ഫെബ്രുവരി മൂന്ന് വരെ നവകോടി നാരായണജപാര്‍ച്ചയും മഹാമാഘനഗരിയില്‍ നടക്കും. ഓരോ ക്ഷേത്രങ്ങളില്‍ നിന്നും ദീപവുമായി എത്തുന്ന ഭക്തസമിതികള്‍ക്ക് മാഘവൃഷവും രക്ഷാദേവതകളുടെ ആസ്താനവുമായ അശ്വത്ഥവൃക്ഷത്തൈ പ്രസാദമായി നല്‍കും. ഫെബ്രുവരി മൂന്നി
ന്, മാഘമാസത്തിലെ വിശിഷ്ട നക്ഷത്രമായ മകം നാളില്‍ രാവിലെ നടക്കുന്ന അമൃതസ്‌നാനത്തോടേയും യതിപൂജയോടെയുമാണ് മഹോത്സവം സമാപിക്കുന്നത്.
മാഘമാസത്തില്‍ വീടുകളിലും ജപാര്‍ച്ചന നടത്തുന്നുണ്ട്. നാളെ മുതല്‍ എല്ലാ ദിവസവും വൈകിട്ട് നിളാ ആരതിയുണ്ടാകും. രാവിലെ വേദ ഘോഷത്തോടെ നിളാ സ്നാനവും നടക്കും. മാഘമേളക്കെത്തിച്ചേരുന്ന വിവിധ പരമ്പരകളുടെ പ്രത്യേക അനുഷ്ഠാനങ്ങളും സത്സംഗങ്ങളും വിദ്വല്‍സദസ്സുകളും കളരി, യോഗ അനുഷ്ഠാനങ്ങളും, കലാ അവതരണങ്ങളും അടക്കം നിരവധി പരിപാടികള്‍ക്ക് നിളാതീരം വേദിയാകും.
18ന് മൗനി അമാവാസി, 19ന് മാഘപ്രതിപദം, 22ന് ഗണേശജയന്തി, 23ന് വസന്തപഞ്ചമി, 25ന് രഥ സപ്തമി, 26ന് ഭീഷ്മാഷ്ടമി, 27ന് മഹാനന്ദാനവമി, 28ന് ഗുപതവിജയദശമി, 29ന് ജയ ഏകാദശി, ഫെബ്രുവരി ഒന്ന് തൈപ്പൂയ്യവും മാഘപൗര്‍ണ്ണമിയും, മൂന്നിന് മകം നക്ഷത്രം എന്നിവയാണ് മാഘമഹോത്സവക്കാലത്തെ വിശിഷ്ടമായ തിഥികളും മുഖ്യ സ്‌നാനദിവസങ്ങളും.
