തിരുവനന്തപുരം:പ്രയാര് ഗോപാലകൃഷ്ണന് തിരുവിതാംകൂര് ദേവസ്വം ബോര്ഡ് പ്രസിഡന്റായിരുന്നപ്പോള് ശബരിമലയിലെ കൊടിമരത്തിലുണ്ടായിരുന്ന വാജി വാഹനം തന്ത്രി കണ്ടര് രാജീവര്ക്ക് കൈമാറിയത് തന്റെ അറിവോടെ അല്ലെന്ന് ദേവസ്വം ബോര്ഡ് മുന് അംഗം കെ.രാഘവന്. വാജി വാഹനം കൈമാറുന്നതുമായി ബന്ധപ്പെട്ട കാര്യങ്ങളൊന്നും താന് പങ്കെടുത്ത ബോര്ഡ് യോഗങ്ങളില് വന്നിട്ടില്ല.
ഉത്തരവാദിത്തം പ്രയാര് ഗോപാലകൃഷ്ണനും അജയ് തറയിലിനുമാണ്. കോണ്ഗ്രസ് അംഗങ്ങളായിരുന്നു ബോര്ഡില് ഭൂരിപക്ഷം. താന് പ്രതിപക്ഷ അംഗം മാത്രമായിരുന്നുവെന്നും സിപിഎം ആലപ്പുഴ ജില്ലാ സെക്രട്ടേറിയേറ്റ് അംഗം കെ രാഘവന് പറഞ്ഞു.
തന്റെ അസാന്നിധ്യത്തില് പല തീരുമാനങ്ങളും എടുത്തപ്പോള് ഹൈക്കോടതിയെ സമീപിച്ചിരുന്നു. താന് ദേവസ്വം ബോര്ഡ് അംഗമാകുന്നതിന് മുമ്പാണ് കൊടിമരം മാറ്റാനുള്ള തീരുമാനം എടുത്തത്. നെയ്യഭിഷേക അഴിമതിക്കെതിരെയും അന്നു പ്രതികരിച്ചിരുന്നുവെന്ന് കെ.രാഘവന് പറഞ്ഞു.
വാജിവാഹനം തന്ത്രിക്ക് കൈമാറിയത് കീഴ്വഴക്കമനുസരിച്ചാണ്. ബോര്ഡിലെ സിപിഎം അംഗമായിരുന്ന രാഘവന്റെയും അറിവോടു കൂടിയാണ് ഇതെന്നും അജയ് തറയില് മുന്പ് പറഞ്ഞിരുന്നു. എന്നാല്, പ്രയാര് ഗോപാലകൃഷ്ണനും അജയ് തറയിലും അംഗങ്ങളായ കോണ്ഗ്രസ് പ്രതിനിധികള്ക്ക് ബോര്ഡില് ഭൂരിപക്ഷം ഉണ്ടായിരുന്നതിനാല് പല തീരുമാനങ്ങളും താനറിയാതെയാണ് കൈക്കൊണ്ടതെന്നാണ് രാഘവന്റെ പ്രതികരണം.
