തിരുവനന്തപുരം: ബിഷപ്പ് ഫ്രാങ്കോ മുളയ്ക്കല് പ്രതിയായ ബലാത്സംഗ കേസില്‍ സ്‌പെഷ്യല്‍ പ്രോസിക്യൂട്ടറായി അഡ്വ. ബി ജി ഹരീന്ദ്രനാഥിനെ നിയമിക്കാന്‍ മുഖ്യമന്ത്രി പിണറായി വിജയന്‍ ഉത്തരവ് പുറത്തിറക്കി. ഇത് സംബന്ധിച്ച വിജ്ഞാപനം ഉടനെ പുറത്തിറങ്ങും.
മുന്‍ നിയമ സെക്രട്ടറിയാണ് അഡ്വ.ബി ജി ഹരീന്ദ്രനാഥ്.ഫ്രാങ്കോ മുളയ്‌ക്കലിനെതിരായി ഹൈക്കോടതിയില്‍ നല്‍കിയ അപ്പീലില്‍ സ്‌പെഷ്യല്‍ പ്രോസിക്യൂട്ടറെ നിയമിക്കണമെന്ന് ഏറെ കാലം മുമ്പേ മുഖ്യമന്ത്രിയെ കണ്ട് അപേക്ഷ സമര്‍പ്പിച്ചിട്ടും നടപടി ഉണ്ടായിട്ടില്ലെന്ന് അടുത്തിടെ ഒരു മാധ്യമത്തിന് നല്‍കിയ അഭിമുഖത്തില്‍ അതിജീവിത പറഞ്ഞിരുന്നു.
തനിക്ക് ഫ്രാങ്കോ മുളയ്‌ക്കലില്‍ നിന്നുമുണ്ടായ ദുരനുഭവവും പരാതി നല്‍കിയിട്ട് സഭാ അധികാരികള്‍ പുലര്‍ത്തിയ നിസംഗതയും ഇപ്പോള്‍ ഉളള ദുരവസ്ഥയും ആദ്യമായി മുഖം വെളിവാക്കിയാണ് സിസ്റ്റര്‍ റാണിറ്റ് പുറത്തുപറഞ്ഞത്. ശ്വസിക്കാനുള്ള വായു ഒഴികെ മറ്റെല്ലാം നിഷേധിക്കപ്പെട്ടുവെന്നാണ് അവര്‍ വെളിപ്പെടുത്തിയത്.തയ്യല്‍ തൊഴില്‍ ചെയ്താണ് ജീവിക്കുന്നത്.ഭക്ഷണത്തിന് പോലും ബുദ്ധിമുട്ടേണ്ടി വരുന്നുണ്ടെന്നും അവര്‍ പറഞ്ഞത് ഞെട്ടലാണ് ആള്‍ക്കാര്‍ക്ക് സമ്മാനിച്ചത്. വെളിപ്പെടുത്തലിന് പിന്നാലെ സര്‍ക്കാര്‍ സിസ്റ്റര്‍ റാണിറ്റിനും പിന്‍തുണയുമായി ഒപ്പമുളള രണ്ട് കന്യാസ്ത്രീകള്‍ക്കും റേഷന്‍ കാര്‍ഡ് അനുവദിച്ചു.
