ഇസ്ലാമബാദ് : ഇന്ത്യയ്ക്ക് പാകിസ്ഥാനെ പേടിക്കേണ്ടതില്ലെന്നും അതിന് കാരണം പാകിസ്ഥാന്‍ സേനയ്‌ക്ക് ഉള്ളിലെ വിള്ളലാണെന്നും അസിം മുനീര്‍ തന്നെ അതിനാല്‍ അരക്ഷിതനാണെന്നും ദിനകര്‍ ശ്രീവാസ്തവ. ദീര്‍ഘകാലം പാകിസ്ഥാനില്‍ നയതന്ത്ര ഉദ്യോഗസ്ഥനായി ജോലി ചെയ്തിട്ടുള്ള ദിനകര്‍ ശ്രീവാസ്തവ ഈയിടെ ഒരു അഭിമുഖത്തിലാണ് ഇക്കാര്യം വെളിപ്പെടുത്തിയത്.
“പാകിസ്ഥാന്റെ ആണവായുധങ്ങളുടെ ചുമതല അസിം മുനീറിനാണ്. അദ്ദേഹത്തിന് വിരമിക്കേണ്ട പ്രായമായിട്ടും സേവനകാലാവധി നീട്ടിക്കൊടുത്തിരിക്കുകയാണ്. ഇത് അദ്ദേഹത്തിന്റെ അധികാരത്തിന്റെ സൂചനകളാണ് എങ്കിലും പാകിസ്ഥാന്‍ സേനയില്‍ വിള്ളല്‍ ഉണ്ട്” – ദിനകര്‍ ശ്രീവാസ്തവ പറയുന്നു.
ആര്‍മി ചീഫ് എന്നത് പാകിസ്ഥാനിലെ സേനയുടെ തലവന്‍ ആണ്. അസിം മുനീര്‍ പാകിസ്ഥാന്റെ ആര്‍മി ചീഫായിരുന്നു. എങ്കിലും അദ്ദേഹം ഫീല്‍ഡ് മാര്‍ഷല്‍ ഉള്‍പ്പെടെയുള്ള അധികപദവികള്‍ കൂടി കൂട്ടിച്ചേര്‍ത്തിരിക്കുന്നു. ഇതിന് പിന്നില്‍ അസിം മുനീറിന്റെ ഉള്ളിലുള്ള അരക്ഷിതാവസ്ഥയാണ് പ്രതിഫലിക്കുന്നത്. കാരണം അദ്ദേഹം നേതൃത്വം നല്‍കാന്‍ ശ്രമിക്കുന്നത് നെടുകെ പിളര്‍ന്നു കഴിഞ്ഞ പാകിസ്ഥാന്‍ സേനയെയാണ്. – ദിനകര്‍ ശ്രീവാസ്തവ ചൂണ്ടിക്കാട്ടുന്നു.
“പാകിസ്ഥാന്‍ സേനയ്‌ക്കുള്ളിലെ വിള്ളല്‍ വ്യക്തമായി പ്രതിഫലിച്ചു കണ്ടത് 2023 മെയ് മാസത്തില്‍ ആണ്. അന്ന് പാകിസ്ഥാന്‍ സേനയുടെ ഹെഡ് ക്വാര്‍ട്ടേഴ്സ് ഇമ്രാന്‍ ഖാന്‍ അനുകൂലികള്‍ ആക്രമിച്ചിരുന്നു. അന്ന് സൈന്യത്തിന്റെ 40 ഭരണനിര്‍വ്വഹണ ഓഫീസുകള്‍ക്ക് നേരെ ആക്രമണം നടന്നു. ലാഹോര്‍ കമാന്‍ഡര്‍മാരുടെ വീടുകള്‍ കത്തിച്ചു.. ഇസ്ലാമബാദ് ഹൈക്കോടതിയില്‍ ഹാജരാകുമ്പോള്‍ ഇമ്രാന്‍ ഖാനെ അറസ്റ്റ് ചെയ്യാന്‍ പ്രത്യേക ഉദ്യോഗസ്ഥരെ അയച്ച സര്‍ക്കാര്‍ നടപടിക്കെതിരെയായിരുന്നു ഇമ്രാന്‍ അനുകൂലികളുടെ ഈ പ്രതിഷേധം. ഇത്രയും അക്രമങ്ങള്‍ അഴിച്ചുവിട്ടിട്ടും അവര്‍ക്കെതിരെ എന്തുകൊണ്ട് സൈന്യത്തിന്റെ ചെറുത്തുനില്‍പ് ഉണ്ടായില്ല? പാകിസ്ഥാന്‍ സേനയില്‍ വിള്ളലുണ്ടെന്നതിന്റെ സൂചനയായിരുന്നു സൈന്യത്തിന്റെ പ്രകടനക്കാരുടെ നേര്‍ക്കുള്ള നിസ്സംഗതയ്‌ക്ക് പിന്നില്‍. സൈന്യത്തിലെ സീനിയര്‍ ഉദ്യോഗസ്ഥര്‍ അക്രമികള്‍ക്ക് നേരെ വെടിവെയ്‌ക്കാന്‍ മടിച്ചു. ഇതിന്റെ പേരില്‍ ആറ് പട്ടാള ജനറലുകളെയാണ് സൈന്യത്തില്‍ നിന്നും പുറത്താക്കിയത്.” – ദിനകര്‍ ശ്രീവാസ്തവ പറയുന്നു.
‘ഫൊര്‍ഗോട്ടന്‍ കശ്മീര്‍’ ഉള്‍പ്പെടെ നിരവധി പുസ്തകങ്ങള്‍ രചിച്ചിട്ടുള്ള വ്യക്തികൂടിയാണ് ദിനകര്‍ ശ്രീവാസ്തവ.
