തിരുവനന്തപുരം: ആര്യ രാജേന്ദ്രൻ മേയറായിരുന്നപ്പോൾ ഹാളിൽ നിന്ന് നീക്കം ചെയ്ത ശ്രീചിത്തിര തിരുനാൾ ബാലരാമ വർമ്മയുടെ ചിത്രം പുനഃസ്ഥാപിച്ച് ബിജെപി . 1940-ൽ കോർപ്പറേഷൻ രൂപീകരിച്ചതിനുശേഷം മേയറുടെ വേദിക്ക് പിന്നിൽ സ്ഥാപിച്ചിരുന്ന ചിത്തിര തിരുനാളിന്റെ ചിത്രം മുൻ എൽഡിഎഫ് ഭരണസമിതിയുടെ അവസാന നാളുകളിലാണ് നീക്കം ചെയ്തത്.
പകരം, മഹാത്മാഗാന്ധിയുടെ ചിത്രം അതിന്റെ സ്ഥാനത്ത് സ്ഥാപിച്ചു. ഇതിനെതിരെ ബിജെപി പ്രതിഷേധിച്ചെങ്കിലും, ചിത്രം പുനഃസ്ഥാപിക്കാൻ എൽഡിഎഫ് ഭരണസമിതി തയ്യാറായില്ല. ഇപ്പോൾ ബിജെപി കോർപ്പറേഷൻ ഭരണം ഏറ്റെടുത്തതോടെയാണ് ചിത്രം പുനഃസ്ഥാപിച്ചത് . മഹാത്മാഗാന്ധിയുടെയും ചിത്തിര തിരുനാളിന്റെയും ചിത്രങ്ങൾ അടുത്തടുത്തായാണ് ഇപ്പോൾ സ്ഥാപിച്ചിരിക്കുന്നത് . എൽഡിഎഫ് ഇതിനെ എതിർത്തതോടെ ഈ നീക്കം പുതിയ രാഷ്‌ട്രീയ വിവാദത്തിന് തിരികൊളുത്തി. ആ ചിത്രം മുമ്പ് അവിടെ ഉണ്ടായിരുന്നുവെന്നും ഇപ്പോൾ അത് പുനഃസ്ഥാപിച്ചതാണെന്നും, വിവാദത്തിന് അടിസ്ഥാനമിലെന്നും മേയർ വി വി രാജേഷ് പറഞ്ഞു.
