വാഷിംഗ്ടണ് :റഷ്യന് പ്രസിഡന്റ് പുടിന്റെ ഭീഷണി ഭയന്ന് അറ്റ് ലാന്റിക് സമുദ്രത്തില് നിന്നും പിടിച്ചെടുത്ത മറിനെറ എന്ന റഷ്യന് കൊടിവെച്ച എണ്ണ ടാങ്കറിലെ രണ്ട് റഷ്യന് തൊഴിലാളികളെ മോചിപ്പിച്ച് അമേരിക്ക. കഴിഞ്ഞ ദിവസം അറ്റ് ലാന്റിക് സമുദ്രത്തില് നിന്നാണ് റഷ്യയുടെ മറിനെറ എന്ന എണ്ണ ടാങ്കറിനെ അമേരിക്ക പിടിച്ചെടുത്തത്.
വെനസ്വേലയില് നിന്നും പുറപ്പെട്ട ബെല്ല 1 എന്ന പേരുള്ള എണ്ണ ടാങ്കറിനെ ഷാഡോ കപ്പലാണെന്ന് തോന്നി അമേരിക്കയുടെ നാവികക്കപ്പല് ഈ എണ്ണ ടാങ്കറിനെ പിന്തുടര്ന്നു. അമേരിക്കയുടെ ഉപരോധം ലംഘിച്ച് നിയമവിരുദ്ധമായി വെനസ്വേലയില് നിന്നുള്ള എണ്ണ അനധികൃതമായി കയറ്റിക്കൊണ്ടുപോകുന്ന കപ്പലുകളെയാണ് ഷാഡോ കപ്പല് എന്ന് വിളിക്കുന്നത്. കരിങ്കടലില് നിന്നും അറ്റ് ലാന്റിക് സമുദ്രത്തില് എത്തിയതോടെ ഈ ടാങ്കിന്റെ പേര് മറിനെറ എന്ന് ആക്കിമാറ്റുകയും ഇതില് റഷ്യന് കൊടി ഉയര്ത്തുകയുംചെയ്തു. ഈ കപ്പലിന് റഷ്യന് കപ്പല് എന്ന നിലയില് രജിസ്ട്രേഷനും രജിസ്റ്ററില് രേഖപ്പെടുത്തപ്പെട്ടു. എന്നാല് വെനസ്വേലയില് നിന്നുള്ള എണ്ണയ്ക്ക് അവകാശി അമേരിക്ക മാത്രമാണെന്നും ഇനിയും ഇവിടെ നിന്നുള്ള എണ്ണ മറ്റാര്ക്കും നല്കില്ലെന്നും ഉള്ള പിടിവാശിയില് റഷ്യയുടെ കപ്പല് മറിനെറയെ പിന്തുടരുകയായിരുന്നു അമേരിക്കയുടെ നാവികസേനാക്കപ്പല്.
എന്നാല് പൊടുന്നനെ മറിനെറ എന്ന എണ്ണടാങ്കറിന് സുരക്ഷയേകാന് റഷ്യയുടെ മുങ്ങിക്കപ്പല് അവിടെ എത്തിയതോടെ കാര്യങ്ങള് കുഴഞ്ഞുമറിഞ്ഞു. ഇതോടെ റഷ്യയും അമേരിക്കയും തമ്മില് കടലില് ഒരു നാവിക യുദ്ധമുണ്ടായേക്കുമെന്ന ഭീതി പരന്നു. എന്നാല് ഒന്നും നോക്കാതെ രാത്രിയോടെ അമേരിക്കയുടെ സൈനികര് ഈ എണ്ണടാങ്കറിനുള്ളില് അതിക്രമിച്ച് കയറി ടാങ്കര് പിടിച്ചെടുത്തതായി പ്രഖ്യാപിച്ചു. എന്നാല് അത്ഭുതമെന്ന് പറയട്ടെ റഷ്യയുടെ മുങ്ങിക്കപ്പല് അമേരിക്കന് നാവികസേനയ്ക്കെതിരെ ചെറുവിരല് അനക്കിയില്ല.
എന്തായാലും ഈ നടപടി കഴിഞ്ഞ ഉടന് റഷ്യ അമേരിക്കയെ ശക്തമായ ഭാഷയില് വിമര്ശിച്ചിരുന്നു. അന്ന് രാത്രിയാണ് റഷ്യ ഉക്രൈനില് ഒറെഷ്നിക് മിസൈല് അയച്ച് അമേരിക്കയെ അമ്പരപ്പിച്ചത്. ശബ്ദത്തേക്കാള് പത്ത് മടങ്ങ് വേഗത്തില് കുതിക്കുന്ന ഒറെഷ്നിക് എന്ന ബലിസ്റ്റിക് മിസൈല് ഉക്രൈനിലേക്ക് അയച്ച് അമേരിക്കയെ റഷ്യ ഞെട്ടിച്ചതിന് പിന്നില് ലക്ഷ്യമുണ്ടായിരുന്നു. ആണവ പോര്മുനകള് മാറ്റിവെച്ചാണ് ഒറെഷ്നിക് ഉക്രൈന് നേരെ അയച്ചതെങ്കിലും ശക്തമായ സ്ഫോടനമാണ് പടിഞ്ഞാറന് ഉക്രൈന് നഗരമായ ലീവില് നടന്നത്. ഇതിന് പിന്നാലെയാണ് മറിനെറ എന്ന എണ്ണ ടാങ്കറിലെ മൂന്ന് റഷ്യന് ജീവനക്കാരെ ഉടന് വിട്ടയയ്ക്കാന് റഷ്യ അമേരിക്കയോട് ആവശ്യപ്പെട്ടത്. , ഭയന്ന അമേരിക്ക രണ്ടാമതൊന്ന് ആലോചിക്കാതെ രണ്ട് റഷ്യന് ജീവനക്കാരെയും മോചിപ്പിച്ചു. അതേ സമയം മറിനെറയില് ജോലി ചെയ്തിരുന്ന മൂന്ന് ഇന്ത്യക്കാരുള്പ്പെടെയുള്ള ജീവനക്കാര് അമേരിക്കയുടെ കസ്റ്റഡിയിലാണ്.
