വാഷിങ്ടണ്‍: വെനിസ്വേലയില്‍ വ്യോമാക്രമണം നടത്തി പ്രസിഡന്റ് നിക്കോളാസ് മഡുറോയെയും ഭാര്യ സിലിയ ഫ്‌ളോറസിനേയും പിടികൂടിയതിനു പിന്നാലെ മെക്‌സിക്കോ, ക്യൂബ, കൊളംബിയ എന്നീ രാജ്യങ്ങള്‍ക്കുമെതിരെ നടപടിയുണ്ടാകുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപിന്റെ മുന്നറിയിപ്പ്. ലഹരി ഭീകരതയ്‌ക്കെതിരെ (നാര്‍കോ- ടെററിസം) രാജ്യം ശക്തമായ നടപടികള്‍ കൈക്കൊള്ളുമെന്നും ട്രംപ് താക്കിത് നല്‍കി. ഓപ്പറേഷന്‍ അബ്‌സല്യൂട്ട് റിസോള്‍വിന് പിന്നാലെ ട്രംപ് മെക്‌സിക്കോയ്‌ക്കും ക്യൂബയ്‌ക്കും മുന്നറിയിപ്പ് നല്‍കിക്കൊണ്ടുള്ള സന്ദേശങ്ങളും കൈമാറി.
ക്യൂബന്‍ പ്രസിഡന്റ് മിഗുവല്‍ ഡയസ് കനാലിന്റെ ഭരണം പരാജയമാണ്. പരാജയത്തിലേക്ക് നീങ്ങുന്ന രാജ്യമാണ് ക്യൂബ, അവിടുത്തെ ജനങ്ങളെ സഹായിക്കാന്‍ യുഎസ് ആഗ്രഹിക്കുന്നു. പ്രത്യാഘാതങ്ങള്‍ നേരിടുന്നതിനായി രാജ്യം സജ്ജമായിരിക്കാനും ട്രംപ് താക്കീത് നല്‍കി.
മെക്‌സിക്കന്‍ പ്രസിഡന്റ് ക്ലോഡിയ ഷീന്‍ബോമിന് രാജ്യത്തിനുമേല്‍ നിയന്ത്രണമില്ല. മയക്കുമരുന്ന് മാഫിയകളാണ് രാജ്യം ഭരിക്കുന്നത്. മെകിസിക്കോയിലെ മയക്കുമരുന്ന് മാഫിയകളെ തുരത്താന്‍ യുഎസ് സഹായം വാഗ്ദാനം ചെയ്തിരുന്നു. എന്നാല്‍ അവര്‍ അത് നിരസിച്ചു. മയക്കുമരുന്ന് വിതരണ ശൃംഖലകള്‍ക്കെതിരെ യുഎസ് നടപടിയുണ്ടാകുമെന്നും ട്രംപ് അറിയിച്ചു.
കൊളംബിയന്‍ പ്രസിഡന്റ് ഗുസ്താവോ പെട്രോയ്‌ക്ക് ചുരുങ്ങിയത് മൂന്ന് പ്രധാന കൊക്കെയ്ന്‍ ഫാക്ടറികളെങ്കിലും ഉണ്ടെന്ന് ട്രംപ് രൂക്ഷമായി വിമര്‍ശിച്ചു. കൊക്കെയ്ന്‍ നിര്‍മിച്ച് ഗുസ്താവോയുടെ നേതൃത്വത്തില്‍ യുഎസിലേക്ക് കയറ്റുമതി ചെയ്യുകയാണ്. ജാഗ്രത പാലിക്കണമെന്നും ട്രംപിന്റെ സന്ദേശത്തില്‍ പറയുന്നുണ്ട്.
